爬文嘅時候睇到一句覺得好精警，嬰幼兒每日最主要嘅工作就係玩，個問題係要俾啲乜嘢佢玩。
呢幾年出世嘅小朋友，因為疫情冇得上playgroup，又冇得出街社交能力差。朋友話佢小朋友嘅幼稚園老師都話，「媽媽唔需要擔心，因為成級小朋友都會一齊變蠢，所以係呢樣嘢係成個學年、成個世界嘅事，唔係淨係你一個」。多謝你呀老師，你咁講真係令到我好放心啊⋯⋯
不過留意番，我target QQ都係入happy School，並冇諗住報咩學之園呀（呃，最後都有報黎玩，傳送門）、傳統名校呀咁，我並無打算要有系統地催谷佢。如果有心想要催谷，就千祈唔好跟呢一套hea hea嘅書單。反而要入返名幼媽媽谷，去考其他嬰兒牌（好似咩嬰兒行山、划艇、騎馬、攀石、平衡車牌照咁）。
我唔可以算係一個好努力嘅媽媽，只係有加入大大小小唔同媽媽group，將啲有用嘅資訊結集整理，然後照跟。無論買乜嘢書本、玩具都好，最緊要，最緊要係要有親子時間同佢伴讀、伴玩，唔係嘅話都係浪費金錢、地球上嘅資源嘅啫。真係無捷徑架。人人都話要磨耳朵，但係就算一個大人都好，你俾佢磨耳朵磨足一年阿拉伯文，如果冇動畫或者冇影像幫你去連結單字句子同埋個意思，點磨都係嘥時間。
Summary: Pinkfong Animal Songs Book / Pororo讀卡機 / That’s Not My Bunny / The very hungry caterpillars (Eric Carle) 配點讀筆 / brown bear what do you see 系列+ dear zoo / 幼幼撕不破小小書 / Peppa Pig 小猪佩奇100册 / 小金魚逃走了 / 抱抱 / 小黃點 / ⋯⋯開始亂買書 / 漢字基礎500
延伸閱讀：書櫃 – 自從越來越多書同玩具，就響淘寶物色咗個好好用嘅書櫃。將好難收拾整齊嘅毛公仔、玩具，全部抌晒落去最底嘅籃到，冇眼屎乾淨盲。
