荃灣港安彙整 - 小藍筆記

二胎記錄 – 1. 極速生產日

高速快播：

生產個日「三日產房之旅 – 生仔都要趕deadline」，全日淨係食左芝士包、幾粒提子同飲水，居然一啲都唔肚餓（好似打完止痛針定吊催生之後有一段時間肚餓，但好快就要生要打仗，所以唔得閒肚餓），生死邊緣真係好恐怖。繼續閱讀「三日兩夜病房餵奶遊戲」

再睇番生個日發生嘅事真係好正，點解我事後都可以記得咁多野，非常佩服自己。黎個summary先：48個鐘等宮頸自己軟，11點幾吊催生藥開度數，3點打咗止痛針，有聞笑氣，為左趕止痛針藥效嘅死線，傍晚就生咗，順產，有剪，生完打咗子宮收縮針。

未能夠幸運地可以好似我朋友咁，響產假第一日就穿水生得，實行前0後14。我響屋企經歷咗足足兩個星期前2產假，一路睇奧運，開始訓唔到，可能要開始適應餵夜奶嘅生理時鐘。

懷孕後期症狀

我有嘗試同阿女傾計，叫佢出力幫媽媽推d便便出黎，反正多便便，都係佔用緊佢既空間，屙得出就一家便宜兩家著。

響羊水已經好充足嘅情況底下，阿女好似住豪宅咁，成日喐身喐勢，肚皮可以見到有明顯嘅波幅。肚臍都突埋出嚟。有時佢郁身嘅時候肚臍仲會有泛起白頭浪。

由於佢喺入邊要吞吐羊水，學習點樣呼吸，可能一時唔覺意濁親就會打C EGG。

食咗甜野，或者食飽飯，或者臨瞓嘅按摩時間，都可以feel到佢有明顯嘅郁動。正常人應該係咁，但我身邊發生嘅嘢都應該唔多正常，佢連響返工時間、搭緊車，都可以有明顯嘅郁動。我好擔心，佢點解唔瞓覺。