奶袋彙整 - 小藍筆記

育兒 – 返工泵奶篇

好彩臨生之前年幾，轉左大公司，有一個好好嘅哺乳室，入邊有洗手盆、熱水機、雪櫃、沙發。所以要準備嘅嘢比其他媽媽少。

無論你係全職家庭主婦定係在職媽媽，選擇得餵人奶嘅，就要對奶袋有認識。無論係雪奶定係冰奶都需要用到儲奶袋。

第一胎嘅時候我會將泵出嚟嘅人奶倒落奶樽，然後直接放喺雪櫃，要餵嘅時候先加加減減咁倒適合嘅份量出嚟。放冰格嘅冰奶，先至用奶袋。同埋當時奶量唔算多（應該係多奶嘅時候，個女就厭奶；塞奶嘅時候個女就掹長期），所以對奶袋嘅使用仲未到爐火純青。慢慢就發現放響奶樽啲雪奶，好似會有啲蘇味。

第一胎餵到差唔多歲半，大概一歲開始我就將雪奶都用奶袋去裝，係冇咁環保，但係可能少咗同空氣接觸，倒出嚟嘅奶感覺上同埋味道上，都好似保鮮啲。

然後第二胎上奶好成功，完全供過於求。又加上有朋友不停送唔要嘅、唔同牌子嘅奶袋俾我，所以就可以生成呢篇文章。

餵唔餵人奶都只不過係媽媽嘅選擇，本住「關你屁事」嘅原則，對奶喺自己嘅，其他人係唔可以咁多聲氣。而想餵人奶，前提梗係要有奶啦，無嘅話我哋都無得選擇亦無得強求，都係要喂奶粉架啦，唔通餓死佢咩「孕期 – 奶粉選擇」。

想當然，健康院、醫院、政府都一定會推你餵母乳，亦都會有好多唔同嘅方法，肉體上、精神上去協助你上奶。詳情可以睇迫死媽媽系列 – 人奶vs奶粉。

去到選擇咗餵人奶，又會分為兩大類，一係親餵埋身，二係全泵媽，或者係一半半。再佛系少少，有幾多餵幾多，唔強求，冇咪補奶粉囉。只要有陽光空氣同水份，隻嘢就會長大。