20230930 AB 2y1m22 CD 3m10
其實都係買個蛋糕啫，點解我哋都可以搞到咁歡樂？
$1000 一大一細，件衫加間條白色每隻$30
IG: t.s_cake
賣家做完之後都同我講有個壞消息，家姐塊面有少少花咗，同埋家姐件衫嘅間條背脊位置雪完就甩咗幾條，但就唔影響影相，細佬最完整冇穿冇爛。
以往可能啲熊仔個pat pat係溶咗少少可以黐住個底，然後再雪硬佢就唔會走熊。但買家驚我哋要半個鐘頭車程，驚隻熊仔會溶向半路，所以較低左冰格嘅溫度，雪得勁硬，好似冰磚咁。
好彩我有先見之明，蛋糕一上車就影咗幾張相，起碼留返個回憶先。
點知開車唔夠2分鐘，兩隻熊仔家姐細佬就開始跳舞，向前向後線嚟線去。
全部英文字母都甩晒，但其實買家係有用熱嘅刀去將啲英文字母黐實個底，所以我懷疑都係之前唔夠溶，然後冰格雪得太凍，雪到全部變晒冰，然後兩嚿冰一齊去撞花中間個蛋糕。
當時嘅Live語音記錄：
「可能因為佢係一嚿冰，個pat pat好滑，特別係細佬，佢已經轉左一個圈」
「可能因為係我對仔女個屎窟都係尖嘅，坐唔定」
「我本身想撞返家姐細佬個背脊去另外一邊，但係而家細佬轉左身，如果我撞過去細佬個鼻就會撞花咗」
「同埋家姐細佬而家隻腳鉗實咗個蛋糕，我驚我一西過去，會二次傷害過蛋糕」
「冇喇冇喇，家姐踩左落個蛋糕度」
然後細佬隻耳仔同埋後尾枕又係咁hi住個盒邊，但因為有花紋，同埋都雪得幾硬，都唔覺得有太大問題。
車程嘅最後，我直接喺雙手懸浮蛋糕，務求令到佢哋唔會去撞邊，直頭好似玩緊奸爸爹電流急急棒咁。
響架車度嘅跳舞相
喺屋企急救完， 排返好啲字， 本身諗住想救吓家姐塊面，但係發現救唔返，唯有閂蓋，然後拎入冰格。
往事不堪回首，呢張係細佬倒台之前，仲要留意番我啲字已經砌錯咗。
點知老公一拎起個盒，細佬就瞓低咗，佢仲要話係細佬本身重心有問題。
然後唔理啦，扶住細佬個背脊同佢個Pat，夾硬坐返起身，成個背脊啲間條紋都花晒咁滯。
然後我閂埋個盒嘅時候又界咗落去家姐左耳一下，然後老公仲鬧我，叫我唔好搞咁多嘢越搞越衰，然後快快脆脆放入冰格，向閂門之前我見到佢哋仲係坐喺度。
真心多災多難。
到第二朝起身泵奶，打開睇吓家姐細佬嘅情況，就發現細佬痴實左家姐。由於溶咗再雪，所以而家成個整體係一嚿冰磚，完全分唔開。
我估應該係琴晚食飯或者雪奶嘅時候，有人大力閂門，所以細佬重心不穩瞓低咗，然後就變成沒有然後了。
我驚再融今晚唔食得，同埋細佬隻耳仔同家姐隻手已經完美融合咗。佢背脊啲間條已經甩得7788。如果仍然都係扶不起的阿斗，咁就由佢哋黐實啦。
On show
去到酒樓，快快脆脆救番細佬。家姐話：CD咬家姐件衫呀。
背脊簡直不堪回首，細佬個頭禿左，甚至乎我仲攞支牙籤去頂返住細佬，隻手都殘廢咁滯，好在影相唔覺嘅。
快快手做埋 decoration，撐住呀細佬。
由於又碌咗兩次落枱，所以隻耳仔都斷埋，我用牙籤撳返落去。🤣
去到切餅嘅時候，細佬已經要依偎住家姐，所以我哋要用埋個茶杯嚟頂住。
成件事真係好好笑。
到切嚟食嘅時候，發現佢入邊真係好實淨，有好香嘅伯爵茶味道，唔算太甜，可能預咗俾小朋友食。
估唔到兩隻熊仔睇落去好似份量好細，但係我哋切咗15份，大家都食唔晒。