Learning Habitat LH 學之園 VE 青衣 – 2023/24 N班 interview

LH VE係向媽媽谷入面廣受認證嘅神校。明明佢本身係happy school，但可能係因為收生要求高（對家長同對小朋友能力而言），亦係整個大西北嘅精英bb目標學校，加上N班收生得56個位，所以被label為神校。

甚至有啲家長話，LH咁多間分校，揀得VE青衣都係對自己小朋友能力有信心。其實對部分懶媽媽而言，有時只不過係因為VE最近屋企渣⋯⋯

2023/24 嘅N班報名向2022年尾開始就如火如荼咁進行緊（2023/24 PN班報名情況 (1Y+)）。

去到2023年1月，最後一間報名學校就比左LH，作為一隻8月細B，試一試囉，$40蚊報名費啫，阿媽比得起。

first interview

1/3，向3/3前交左片，5分鐘一條片，完全係考驗媽媽嘅剪片功力。媽媽對imoive嘅認知度，同埋對秒數時間嘅掌握已經去到爐火純青嘅階段。

本身VEO已經有8分鐘嘅片，最後都係大部分要去重新拍過，因為差一個月真係差好遠，語言能力同認知能力都有質躍性嘅進步。當成一條5分鐘嘅成長片段咁剪，都幾滿足，交完片，upload多一條dummy片，from time to time自己圍爐JJ佢。

18/3 9:00準時login in，細B居然有second in，當贏左。

Second interview

25/3 9:00 second in，第一組。炒曬粉XD 。

總結就係，大肌肉零分，顏色分唔到，插花插唔好，但係有開聲講野。

開波

• 今朝一朝早就用pancakes召喚佢起床，然後比朱古力奶佢飲boost up佢。
• 未入學校就見到其他小朋友，都係食緊零食boost up緊。
• 入學校之前，前面位小朋友有啲阻礙。QQ向門口排隊，踎響度側頭睇雀雀，「雀雀飛左囉」，飛左去邊呀，「果度」。可惜前面位小朋友阻住左老師嘅視線，睇唔到QQ呢一面，勁得意，如果唔係要interview，我原地就會拍佢片。
• 排到啦，我去交文件，中文加普通話。爸爸陪QQ貼名貼紙（前面個小朋友係咁話唔要），搓搓手。

玩樂區

• 然後就入去玩樂區，有啲大肌肉遊戲。要跨過obstacle，跟住腳板仔行，仲有砌積木。唔知點解我哋QQ冇老師跟住打分，其他家長都有一個廣東話或者普通話老師跟住。唔通8月b都係被遺棄的孩子？
• 前面小朋友分左隻蕉比QQ，QQ就揸住隻蕉。然後行左上舊木當平衡木咁玩，前面老師話呢舊係obstacle，要跨過去。一開始播歌apple banana之後，QQ自己話要上台玩，上到台就揸住隻蕉即興跳舞，我環顧一周，又係無miss睇到。
• 然後跳左一首歌嘅時間，我見唔對路，就放佢落去跟腳板仔行，然後跨過obstacle，然後叫佢clean up砌積木，佢仲hey yo hey yo扮到好辛苦咁搬磚。我又環顧一周，都係無miss理。
• 然後就嗌名，排隊等入班房。響排隊入第一間課室嘅時候，有一位普通話老師話QQ面珠墩好可愛，搣咗佢面珠墩一下。我內心有輕微不滿，係咪摵完唔喊會加分先。好彩佢無喊，但下一環節hello song僵硬咗，明顯被嚇親。

第一間房

• 入到第一間班房，見到有個Flowershop，所有小朋友坐響前面張綠色凳仔度，父母坐響後邊凳仔。老師用英文同小朋友打招呼，然後唱hello song。我見到有六張小朋友凳，但係現場得五位小朋友。
• 有啲小朋友好乖咁坐喺張凳度。雖然QQ喺出邊跳晒舞，但入到嚟之後就冇乜反應。應該係面豬墎事件後遺症。
• 然後英文Miss就叫小朋友名揀返相應顏色嘅花，然後就插落去花店相同顏色嘅花樽度。第一個BB冇乜反應，所以老師話最後先搵返佢，中間三個BB都好叻又揀到花又插到花。而QQ係第四位，好彩佢模仿力強，見到前邊兩個都叫做有模仿嘅空間。雖然等待過程中間佢周圍遊蕩，都好驚Miss覺得佢坐唔定。
• 然後終於到QQ，頭三個揀咗黃色紅色藍色，以為老師會叫佢揀白色，所以啱啱有教定佢白色姐係white。點知老師又抽咗幾多花出嚟，叫佢揀Red。佢指住red，講「red」，但到要抽支花出嚟嘅時候，佢打側個頭望吓朵花嘅花徑，miss又遮住咗又捉實左啲，佢就即刻唔想攞。然後佢拎咗橙色嘅花，miss 話are you sure? nice try.拎返佢支花，叫佢再嘗試。
• 然後我有鼓勵佢叫佢自己拎，點知佢話「媽咪攞」我即刻話，媽咪help you?佢有復述「媽咪help you」，點知我見到後邊miss 耷低頭mark緊其他人嘅分，好似見唔到、聽唔到咁。然後miss叫佢拎住支花去插落花樽，佢見到四個花樽，只有白色嗰個係空嘅，所以佢就插落去。佢應該唔明紅色花要插番落紅色花樽度。miss有俾多次機會佢叫佢再插過，但係佢都係插返落白色花樽度。
• 然後佢都好似知道自己做得唔啱，跟住就跑過嚟要我攬住，然後一直捽眼。自尊心很強的孩子。
• 然後Miss就搵返第一個小朋友叫佢再試一次。
• 然後miss叫小朋友Stand Up，就唱Goodbye song，我有跟埋一齊企起身，但發現全部家長都唔起身。今次QQ好有反應，唱咗半首之後，又跟住揮揮手，搭搭腳，但係我見到mark 分 Miss都係冇望佢。
• 然後離開第一個班房，佢就好有反應，係咁同miss揮手拜拜。但係總係運氣嘅問題，每次佢揮手嗰啲都唔係mark分嘅miss。

第二間房

• 然後就排隊去第二間房，原來名牌上面有兩隻顏色，我哋屬於藍色嘅組別。綠色嗰組有三個BB，六個家長。藍色呢組有兩個BB四個家長。綠色入房先。
• 然後藍色組別，前邊一位BB入房嘅時候，佢好抗拒，擾攘左一輪，廣東話Miss就叫媽媽陪住小朋友一齊坐響側邊面對老師，然後QQ係最後一個入房，咁就去班房嘅另一邊，自己同另一個老師玩，家長就去前邊見校長。
• 我協助咗QQ坐上凳仔後，就同佢講同老師玩一陣，爸B媽咪響隔離，QQ話「媽咪坐呢度」，我就同佢解釋媽咪坐隔籬，請佢同老師玩一陣。枱面上有蘋果香蕉橙。
• 點知校長向後邊講，有時候再見太耐會令到小朋友更加唔捨得。請家長相信老師可以留住小朋友。我內心打咗個突，因為QQ係最後一個入班房，前面嗰個都擾攘咗咁耐，所以我唔知原來係等緊我。

家長時間

• 然後埋位，就發現係三個家長vs校長加一個普通話Miss負責mark 分。
• 隔籬位爸爸第一題搶答，希望小朋友將來成為乜嘢人。好似係答咗品德同埋有禮貌。仲有話個世界變得好快要適應，反應快。
• 我照答咗N班一路去到K班，然後將來，自信，同埋要信自己得，先至可以去搵方法達到目標。
• 校長話我地唔係龍校，然後問鍾意學校啲乜嘢。嗰個爸爸話佢好鍾意家教合作，同其他媽媽傾開，上個禮拜運動會好似身歷其境咁。
• 我照答升學啦，同埋我哋目標係直資私立啦，仲有喺structural 嘅教材，可以慳返外補嘅時間，增加多啲親子嘅時間。
• 然後再問家長可以點樣做到家校合作。隔籬位爸爸爆seed自爆係民航機師，平時半夜揸飛機，所以日頭有好多時候可以陪伴子女。
• 小寶唯有話係自己生意，有flexible working hour，所以可以陪小朋友上playgroup。我再補充返N班之前，有多啲父女之間嘅親子時間，都係非常好。而我自己就三年開始就減緩左我嘅職涯，然後選擇咗一份有穩定工作時間朝九晚五六嘅工作，夜晚可以返去陪小朋友食飯沖涼瞓覺。亦都可以日頭多啲時間，可以應付到一啲危急嘅子女問題。
• 點知校長就話，其實家長唔需要太緊張，我哋唔係需要家長好多時間，而係覺得家長如果用5分鐘有品質嘅時間，對教育小朋友都已經好足夠。學校最主要係想家長有心去同學校一齊培育嘅小朋友。

送禮物

• 然後校長就話老師會安排小朋友過嚟拎禮物，然後就嗌QQ個名。然後QQ就轉身落地行過嚟，中間我好驚佢仆低然後大喊。然後佢過到嚟企咗響我張凳後邊，我順手加多句「過嚟媽咪左邊」小寶都話佢係咁推QQ向我左邊，佢行到過嚟我就問佢，校長送禮物俾你，你要唔要呀？再加點頭動作，驚死佢會拒絕講唔要。然後QQ話「好呀」。呢位bb真係好正。
• 校長問佢叫咩名？我補充what is your name?見佢唔答，校長再問佢，你識唔識講自己個名？我就幫佢答話佢識講自己英文名。點知QQ都係唔出聲，然後校長好有技巧再改問，咁你係咪QQ呀。好彩今次QQ有回應，「係呀」。然後校長就送禮物俾佢，我即刻追問佢What should you say?「please」我再追加 and?加埋手勢「thank you」。阿媽非常感恩，要還神啦！
• 校長鼓勵小朋友答問題嘅方法，非常有技巧。
• 然後民航機師個BB過嚟嘅時候，都係一聲唔出。然後QQ中途飛吻校長，仲吸引咗校長嘅眼光過返嚟。然後收禮物嘅時候都係機師媽媽話say thank you，但最後BB都係冇講過嘢。甚至乎QQ向側邊好似搶答左「thank you」。
• 去到最後要say Goodbye嘅時候，QQ開着咗Turbo，不停揮手不停拜拜，仲好大聲咁拜拜，又周圍kiss。仲要指住牆上poster，問「呢個咩黎架」，我唯有向校長面前話係shadow，如果有機會就再帶你黎睇啦。然後我交左QQ比小寶，就幫手推凳，個女做唔到，咁就媽媽做啦。
• 藍色組要單挑民航機師，同見校長；綠色組就六個家長廝殺，係見主任。同組嘅另外兩個BB係6月同7月b，QQ係8月b。民航機師住灝景灣，見着佢地行落嚟。
• 感覺好彩係朝頭早，冇太多高強度問題。可能見係細b組，所以唔會太harsh?
• 結論，媽媽協助過多，明明準備左，但又答唔好校長問題。總之衰左就一定關媽媽事，唔關QQ事啦，咁諗會好過好多，哈哈。

Results

20230422: 早上9點幾先check results，毫無懸念，waiting。完。