二胎計劃 – 做功課 (2022) (包括: 排卵日、X同Y嘅特性、試紙比較及分析)

由於個人願望要生兩個，所以一生左QQ後就開始計劃緊。因為三年一個generation gap，所以我嘅願景係最好就QQ一歲開始做功課，QQ兩歲左右就有弟弟妹妹出世，perfect池。生完兩個就岩岩好，仔又好，女又好，收肚，收工。

做功課研究生男生女

既然QQ係女，自然想要整個弟弟比佢（雖然佢識講野後，就開口埋口都係哥哥，我點生個哥哥比你啫）。首先回顧了解下學校教過嘅女性排卵日、同埋受精過程先，然後再講下精子X同Y嘅特性，你就明要點玩。

排卵日

上面科普個前題係，卵巢定時定候push左粒卵出黎，浮向輸卵管終點等精子approach。每個月卵巢幾時push左粒卵出黎，就係排卵日，留意，係排卵日(day)，唔係排卵期(period)。如果要想提升生男生女嘅機會（嗱，無人可以包生仔架，除非去泰國或者美國啦），要學識搵到排卵日。

因為女仔嘅卵，向出世時已經全部ready向身體內，向生育年齡先每月排一粒，（正常）到收經為止。所以想要小朋友，就要養好子宮、養好粒卵。大年紀先生育，明顯批卵都會老化，小朋友嘅健康風險相對大啲。但男人啲精，每幾日freshly made，所以粒卵同個子宮先係生育最重要。

排卵日，有人會feel到排卵痛，有人會多分泌（動物本能要傳承）（又叫白帶拉絲），有人會爆瘡（黎M都會啦）。人人唔同，真係要做下紀錄，搵到自己個pattern。

你話，我/我老婆period不嬲都唔準(都市人非常合理)，點搵排卵日。睇下文，排卵試紙幫到你。

受精過程

//不負責任之科普

精子入到輸卵管要1.5小時至5小時，嘩咁耐？咁你諗下條精有幾細，就算陰道有幾短，對條精黎講都係長跑黎嘅。加上途中要經歷一場大逃殺過程。

陰道酸性環境係第一個死亡位，老弱殘兵會被白血球食左，或者少條尾多個頭嘅精子就會被自然淘汰。呢啲精，通常係食煙飲酒捱夜後嘅產物。

然後第二round，一眾精子要揀向左走、定向右走，因為每次正常排卵得一邊卵巢出卵（多胞胎唔計，異卵就係一次排多過一粒卵），有一邊選錯邊嘅精子們就注定拜拜你條尾。

揀岩左嘅精子們，我當得番100條左右，就努力遊向輸卵管。呢個唔係短跑賽，最快到達見到粒卵嘅，並唔係贏家。你當粒卵係有防護網咁，要靠每一條精子捐驅咁去消耗粒卵嘅HP值，你睇跑第一果條精子，個頭已經比卵子層防護網溶左啦。

當卵嘅HP值（被捐驅嘅精子）消耗得7788，下一條精向呢個時候就可以突破左防護網。都市傳聞，當呢位贏家進入卵子時，卵子會發出愛的閃光。然後卵子會重新建立起新嘅防護網，更厚更硬，阻礙其他精子進入，其他唔夠快嘅精子就會比身體嘅其他細胞吞噬，好殘忍好壯烈。

而嬰兒嘅性別取決於精子帶X定係Y嘅基因。我以前讀書嘅時候係咁記嘅，男人生殖器係凸嘅，所以係Y型嘅；女人生殖器係向入面，所以係X型嘅。媽媽粒卵梗係有X嘅基因啦，如果跑贏嘅係X，咁XX就係女；如果跑贏嘅係Y，咁XY就係仔。孖胎B呢，就靠驗血時，如果check到媽媽血入面有Y，姐係起碼有一個嬰兒係仔；因為如果兩個都係女，媽媽血係唔會有Y嘅。

受精後，粒卵就會自己分裂並移動向子宮方向，中間可能著錯床向輸卵管（宮外孕），或者去到子宮啦，內膜唔夠厚或其他原因，著唔到床，都會自然流走。所以要正正常常向子宮內著床都非常唔容易，總之每一個人能夠成功出世都係好奇妙。仲要發現如果著床位置太近宮頸，都會容易流啡，宮頸短又可能早產，but anyway，無人控制到，天意黎嘅。

//

精子X同Y嘅特性

然後再講番精子X同Y嘅特性：

• Y爆發力勁，但壽命短得1日左右，鹼性環境有利生存
• X遊得慢，但壽命長會有3-4日左右，酸性環境有利生存
• 一批精子入面(好似)有2/3都係Y，1/3先係X。
• 排卵時白帶拉絲（白帶可以令陰道環境變鹼性，幫助Y精子遊入去），高潮時分泌嘅白帶都係同一道理，所以台灣明星成日話做功課時，女性開心先，會生男；男性開心先，會生女
• 上面講過陰道酸性環境係第一個死亡位，所以有講法，食療可以改變陰道酸鹼度(醫學上話無咁神奇，除非你成世食素，否則唔會幾餐就會有影響)，anyway，有人話媽媽食肉變酸性，爸爸食菜變鹼性(少啲Y)，就可以增加生女嘅機會。
• 要生女，要用弱酸性嘅女性清潔液，因為X親酸性，Y親鹼性，但講真，都唔會洗入去囉，只係聊勝於無；小紅書有啲人為左生仔癲到用梳打粉水沖入面._.好痴線
• 朋友話好似話溫度都影響男性嘅生產力，多數男廚師keep住高溫熱住條J，所以多數生女。咁浸得多溫泉係咪同一道理，浸死啲Y XD
• 想生女就要排卵日前三日做功課，等啲Y(一日壽命)死得7788，咁剩低嘅就係X(3日壽命)，痞響輸卵管終點，等粒卵push出黎。
• 又有講法，想生女就每隔兩日做一次功課，因為freshly made嘅精子都會供不應求，新造嘅Y活躍度會減低；而通常一星期做一次功課，Y活躍度高啲、跑快啲、量又多啲，(又咁岩撞中排卵日)多數係仔

現今好多人想要女，我見媽媽谷生仔嘅媽媽都成日喊苦喊忽。以上都係提高機率架渣，總會有啲男士，啲Y好長命好堅壯跑得好快，所以媽媽生極都係仔⋯⋯

排卵試紙 – 紅色David大衛 (紅D)用法

因為我係勁需要有計劃嘅人，因為餵人奶無經期，所以由QQ半歲開始，我就買左紅D （大衛排卵檢測試紙，淘寶或者carousell都幫到你，平均$1.x一條，用落一啲都唔心痛），預早準備睇吓排卵嘅周期（點知到QQ14m甚至到我中獎，我都仲未黎番M）。download 瘋狂造人 app。

坊間都仲有clear blue排卵棒，其實原理都係試紙，不過有舊膠包住，幫你睇試紙顏色再show笑哈哈比你睇，有笑哈哈即係到排卵期。一黎CB貴，二黎生仔已經好唔環保，唔好用咁多膠啦。驗孕棒一樣原理，綠色大衛都係$1.x一條，生仔洗費好大，現階段可以好慳。

紅D嘅玩法係：假設經期係30日，經期後10日左右開始每日玩尿，試到岩岩有第二條線，條線淺色過control線，叫「弱陽」。然後就開始繼續玩尿，留意檢測線幾時深色過control線，叫「強陽」。可以4個鐘玩一次尿，反正試紙好平。強陽時，粒卵未出架，你當佢好努力突破緊卵巢嘅吸力。當強陽轉弱，個一刻就係排卵啦。而排卵日前後三日（有啲講法係前後一星期）就係排卵期/危險期。

試紙比較及分析

淘寶有幾大牌子，我睇瘋狂造人app，主要用家揀David大衛、金秀兒。

• 金秀兒敏感啲（早幾日會check到意念灰），但好易食詐糊（以為中獎但空歡喜）
• 大衛慢啲，但靠譜啲準啲

同埋carousell多數有人長期賣大衛，方便補貨。

個人經歷

而我一直因為餵人奶無經期，所以基本上我要日日玩尿⋯⋯玩左成大半年，都仍然未見過強陽⋯⋯我身體唔通真係虧到咁⋯⋯又唔想QQ同二寶隔太耐，驚佢地有代溝，咁就唯有認真做下功課，去左睇中醫，同左醫師講唔好開會流產嘅藥，不停補腎，腎氣足自然生育機會高，我check過話成份基本上都係安胎嘅藥。終於，向密集式中藥加持下，我見到紅D嘅第二條線終於開始深色啦！

向密集式中藥加持下，當紅D強陽轉弱，或者人地話會白帶拉絲（變鹼性幫助精子遊入去），就把握機會做功課。有啲chur媽，唔理男女，淨係想要小朋友嘅，由強陽開始每兩日做一次功課。

然後紅D強陽轉弱嘅第二日，我繼續玩尿，見到紅D又變番一條線，咁又可以休養生息，粒卵出左啦，下個月再努力過。

中獎後試紙反應

如果中左獎，又會點呢。正常人做完功課大約十日左右就會見到紅D又出第二條線，但呢個第二條線好多可能，有機會遲左排卵（又強陽？！）、有機會係黎M前強陽、又有機會係中左獎。

如果真中左獎，（我就係），做功課後11日開始（因為試紙平，我繼續日日玩，計番日子差唔多著床），紅D就開始出第二條線(因為著床後出嘅HCG懷孕荷爾蒙，同排卵荷爾蒙有啲相似)，今次條線一日比一日深，到第15日紅D第二線深過一線（一係再次強陽一係中獎）。

注意：紅D同綠D可以同時check，但唔好放入同一份尿入面，會串色。

然後就check一check綠D （綠色David大衛驗孕試紙），就見到意念灰（好淺嘅第二條線）。都係因為試紙平，所以又可以開始日日玩綠D，會見到第二線一日比一日深色。等到都幾深色下，就可以開支貴貴ClearBlue驗孕棒，驗到＋號啦。

又可以去診所拎懷孕證明啦。「懷孕產檢時間表 – 深度research」