前題係之前開左個barclays離岸戶口，原先開戶三個月內存入GBP25,000(或等值貨幣)(~HKD256,000)就可以。2022年3月，收到Barclays電郵，話要提升最低存款額到GBP100,000(或等值貨幣)(~HKD1,024,000)，meet唔到就要比GBP40(~HKD411)月費。RM服務仲要GBP250000(~HKD2,560,000)先會提供。
我哋冇移民，雖然有BNO（依家97後香港出世嘅都可以申請返，當然要符合某些條件），住址電話號碼仍然仲係香港，但係又唔夠錢去開本地銀行嘅離岸戶口，又唔肯比月費管理費。所以英國本地傳統銀行就已經唔侵我哋玩。至於證券行，呢舊錢我哋純粹係想要來儲蓄，唔係諗住做投資用，所以我哋亦都唔考慮。最後唯有搵啲多人用嘅虛擬銀行，將來如果有需要亦可以申請提款咭(debit card)，進可攻退可守。
離岸戶口選擇，請見「[離岸戶口] Barclays 增加入場費，仲有咩離岸戶口嘅選擇？」。
一但做左決定，就即刻叫小寶申請。之前Barclays就係申請咗聯名戶口，又麻煩，又 要出兩張卡，又唔可以Online做晒個申請。今次見過鬼都怕黑，淨係要小寶申請單人戶口算，最多叫佢俾返同樣嘅貨幣我做返個抵押品啦。
唔知係咪因為佢係虛擬銀行，要求冇實體銀行咁高，定瑞士嘅效率真係咁高咁快，只係用左一個工作天，就已經成功開咗個戶口，只係仲有further due diligence 同埋入錢問題，仲未完成戶口申請。速度驚人。
開戶篇 （Android）
首先要download左Dukascopy Connect 911呢個app。用電話號碼收驗證碼。
禁開個App就會見到簡體字嘅promotion page，小寶即刻唔想申請。鬼咩，鬼叫地球上用簡體字嘅人比用繁體字嘅人多。
然後就要選擇用戶暱稱，下一頁就可以輸入禮物代碼，一定要搵一個朋友嘅促銷代碼，先可以得到5個Dukascoin (DUK+，由Dukascopy自行發行嘅一種crypto token)(~EUR10)，有咗呢5個DUK+，就可以免左每月EUR1嘅管理費。
然後個App就會叫你，掃描你嘅護照帶相片嘅嗰頁。
然後佢就會辨認咗你個個人信息，需要你確認。
然後需要填你嘅職業、確認你係咪PEP、美國稅務人士、係咪帳戶內Beneficial Owner。然後再確認一次你嘅資料。
最後一步，就係用視像形式驗證你嘅身份，請準備好(1)護照同埋(2)香港身份證。準備好，就禁紅色continue。然後按指示再掃描多次你嘅護照。
然後就同銀行聊天對話(呢個係24小時熱線，亦係因為有呢一個服務，我哋先至選擇去開呢一個戶口)。佢第一條詢問嘅問題係，你有冇持有你嘅護照向手，選擇「是的」，然後就會叫你影張相俾佢睇。
影完相之後，佢會同你講熱線繁忙，如果你唔想等待，你可以選擇比EUR40(~HKD341)成為VIP。好明顯小寶即刻選擇「我會等」。
大概等咗14分鐘，畫面一轉，就可以開始視像對話。職員一開始用普通話問小寶啲資料，其實小寶嘅普通話非常普通，然後頂唔順問對方可唔可以轉英文，個姐姐嘅英文又幾好聽。首先問咗小寶嘅全名，然後會再問出生日期。
除咗要響視像裏邊去驗證護照，仲需要你放好，唔反光咁screen cap一張相，所以為咗就位，我哋搞咗好耐。另外仲需要小寶將中文全名，響聊天對話度重新打一次。小寶仲問佢需唔需要分開姓氏同埋姓名，明明個姐姐都係識講普通話OK，姐姐話: okay, we will sort it out. 然後就搞掂啦，話要等三個工作天去審批，另外會再次確認電郵地址，結果會send過去電郵度。
過左一日，成功開戶啦。有冇快到咁呀。