繼Bruno 豆漿機要退位，又覺得糊仔階段唔會last太耐，所以喺旋轉拍賣搵有冇二手嘅嬰兒蒸煮攪拌機。唔選擇Baby cook，因為佢要加水落去部機度，再經管道排出，我最驚就係啲好難洗嘅嘢。屋企人想要一部機可以煲埋粥仔，so far 只有Kiwy，宣傳圖好似淘寶貨，所以比小寶ban咗。
然後就心儀Avent，覺得佢可以同一個食物水壺入面蒸，倒轉就可以攪拌，最緊要係唔使洗太多野。雖然佢入水位都只係部份可見，但起碼我可以每次用完都倒乾淨，費事有水垢。
2合1就係按鈕得兩個制，一個係蒸一個係攪。4合1就多左蒸10/15/20/30分鐘嘅選項。2合1嘅二手價低至$100。
然後小寶話check到2合1已經停產，所以就直接望4合1嘅二手價。最主要係原價$1200至$1400，我唔捨得買。二手價位都好浮動，我逐張相望，發現容器都容易上色，當使用率高嘅時候，圖片入邊就會見到比較暗啞。最後用咗$400嘅高價買咗一個相對冇咁暗啞嘅貨。亦都問咗好多個買家，個個都話呢部機冇得煲粥仔⋯⋯
我仲問埋上手媽媽有無配件，佢比埋個飯盒我。估都估唔到，靠個飯盒，比我用出新高度！
左邊呢個組合係蒸，右邊咁放係攪。
我係食物盒。
由於係二手食物處理器，我用左熱水淥過，食器漂水，又用咗檸檬酸去嗱過。我同小寶幾乎將右手邊個食物處理器拆散咁滯，我哋連螺絲都起埋，攪拌刀片係拆得。但可惜攪拌刀片下邊嗰層白色殼，係拆唔到嘅，但係清洗時又會流到啲污糟水入去，呢個設計唔係太好。響拆唔到組件入邊都發現有啲食物污跡，唔會直接接觸食物，只係每次清洗嘅時候都會沿着啲窿窿罅罅流咗入去，影響外觀。
開機第一打
響完成清洗後，小試牛刀，蒸打椰菜花紅蘿蔔。首先呢一部主機度，扭開上面白色蓋，入水。為左防水垢，可以用蒸餾水/過濾水。
睇吓蒸幾多分鐘，就加幾多水。
放入攪拌刀片（如果就咁蒸煮可以唔使放入刀片，劃重點，陣間考試）及蒸煮物，手柄位置可以借力，白色嗰粒野沿住推入去。然後就將呢個食物處理器倒轉。
（圖為菜心）
記得插制，計時開始蒸煮，左上角有個蒸氣圖案會著燈。蒸完會發出BB聲。
然後拎起手柄將成個食物處理器上下倒轉，卡返入榫。按灰色按鈕，刀片用極速旋轉，絕對勁過bruno豆漿機。按需要，睇吓打到幾細。我覺得5秒都嫌多。
實驗精神 – 煲粥仔
反正啱啱蒸咗菜，本着實驗嘅精神，試吓點樣用個食物盒先。官方答案係話可以將打成蓉嘅食物泥放入食物盒，需要食用之前就放落呢部機度蒸30分鐘defrozen。
我忽發其想，咁如果我將生米同水放入食物盒，係咪可以煲得熟呢？
第一次attempt fail。由上邊蒸煮紅蘿蔔可以知道，我哋係要放入刀片之後，再放蔬菜，然後冚蓋，再倒轉蒸煮。首先個食物唔可以同刀片共存，即係放咗食物盒，就唔可以攪拌。
亦就係呢個倒轉，我知道個食物盒原來係唔可以倒轉，會漏水嘅⋯⋯咁唔緊要，萬丈高樓由地起，我直接唔需要倒轉呢個功能，我將蒸煮蓋直接放喺主機上面，然後將生米、水、食物盒，正面放蒸煮蓋上邊，再用個食物處理器一野吸落去，手柄沿住推入去鎖實。嘩哈哈哈哈，邊個話佢煲唔到粥仔！
然後我試蒸煮20分鐘，拎出嚟嘅時候好熱，熱到我打唔開嗰食物盒蓋。rest左一段時間，一開，米已經變成飯，但有啲米未透心，有理由相信只要蒸30分鐘就乜都熟曬，今次再加啲紅蘿蔔粒。再黎！今次除咗返煲碗粥，順便蒸埋紅蘿蔔條。
然後開獎，發現紅蘿蔔條軟身左啲⋯⋯
第二次attempt，今次係青瓜同菜心。菜心10分鐘，淨5分鐘嘅時候放埋青瓜入去，青瓜都係太軟。
