2019年好忙亂咁結左個婚，結婚第一周年嘅時候發現有咗QQ，去到結婚第二周年終於有心情慶祝吓。雖然我仲餵緊人奶，但人哋話㗎嘛食魚生刺身有助上奶，阿媽家姐omakesa太貴，平平哋$1000 per head食個日式晚餐當慶祝。
仲記得有年生日響舊公司樓下，食咗個$1000人頭嘅日式懷石料理，揀咗松葉蟹。點知主菜嚟到嘅時候，先發現佢係得兩三條松葉蟹腳⋯⋯ 咁原則上佢又真係冇錯嘅，只係佢個餐牌冇寫明個份量係幾多姐。然後嗰餐飯嘅甜品仲要係宇治金時⋯⋯而我係一個唔鍾意綠茶嘅港女。小寶，卒。希望呢一餐飯平平安安度過。
地址
尖沙咀彌敦道63號iSQUARE國際廣場28樓2801號舖
Shop 2801, 28/F, iSQUARE, 63 Nathan Road, Tsim Sha Tsui
菜單
鍋會席 x2 $1980
茗茶 x2 $20
梳打 x1 $48
食咁貴嘅餐廳少不免要打下卡先，可以望住維港，仲可以睇埋維港fing朗朗。同埋一坐定就問佢，可唔可以幫手雪人奶。雖然係疫情時候，但係佢都俾咗一條消毒過嘅熱毛巾我哋抹手，真係好似返咗日本鄉下咁。值呀。
第一道菜，話係鹽水浸唔知乜嘢縣嘅蔬果。估唔到沙律菜經過鹽水嘅浸泡之後可以咁爽脆。不過都係影響唔到小寶，小寶好討厭食火箭菜，佢話火箭菜有浸苦味。而我覺得部份生洋蔥太辛辣，少少影響咗對呢道菜嘅觀感。之但係三色椒真係好甜好爽脆， 個車厘茄真係甜到嘩一聲。
特別係個環境，定係個鹽水，定係個碟？
繼續沿用番我同小寶響日本嘅習慣，明明兩個人食飯，但係淨係嗌一杯嘢飲。一個字，窮。其實係因為我哋成日都飲唔晒啲嘢飲，好浪費，加上又唔平，無謂嘥錢。
再嚟嘅就係一道刺身。有油甘魚、鱒魚、甜蝦。果然係高級日式餐廳係用即磨嘅wasabii。又話由淺色食起，然後就話想食樽魚。油甘魚油香好重。小寶用菊花去搞隻甜蝦。
跟住就嚟，每人五貫壽司。食左淺色先。小寶問，咩味？答：魚味
吞拿魚應該係中拖，我認為淨係呢一㗎吞拿魚就已經值咗半餐飯嘅價錢！入口即溶嘅感覺，仲好食過黑門市場劏遊客嘅中拖！值呀值呀。吞拿魚蓉係creamy架，驚為天人。
然後嚟咗一客天婦羅。天婦羅南瓜好甜。一開始試味粉好苦，但點天婦羅好好食。都係覺得天婦羅油咗啲。第一次食有蝦味嘅天婦羅，入面實定定。
跟住就上咗一盆菜一盤肉。我哋選擇嘅壽喜燒嚟啦。Menu上可以選擇嘅有壽喜燒、普通豬骨湯、同埋蒸蔬果。我哋響別府試過無味嘅蒸蔬果之後呢，就怕怕啦， 所以直接選擇重味嘅壽喜燒。
仲好好咁，每人俾咗隻生雞蛋，用嚟點牛肉食。豚肉有豬味，點蛋汁不得了，係呀，我咩都落去加蛋汁。去到最後，我同小寶講好可惜呀，我個蛋汁剩返少少咋。小寶啱啱飲埋最後一啖蛋汁⋯⋯咩話？
我想講，個和牛入口嗰吓滑一滑，直程咬都唔使，就沿住個喉嚨sir入去。真係不得了！
另外仲有一客烏冬，一定唔會唔夠飽。將啲材料鋪晒落去個鍋度，直頭覺得自己賢淑，係咪好有日式嘅感覺。
成餐飯直到呢一刻都仍然係好滿足，去到上甜品嘅時候，小寶先記得問佢有乜嘢甜品。然後餐廳答我哋，得焙茶雪糕⋯⋯小寶，卒。論焙茶與綠茶的分別。
去到埋單嘅時候，餐廳送咗兩張$500現金卷（！）那尼？！ 咁即係迫我哋再嚟過姐。
我哋當然都係貪字行先。即刻約咗另一個friend再嚟食過，雖然係二人份量嘅餐單， 可以要求佢加一人嘅份量。價錢pro rata。
雖然朋友講到明佢唔食某啲刺身，但係我哋嘅強烈推薦底下，都叫佢試吓個中拖， 連佢都覺得驚為天人。其他掛住食、掛住傾偈、唔記得影相。當晚餐廳多咗好多日本人。去到最後甜品環節，我夾硬問，有冇唔係焙茶雪糕嘅甜品，最後佢俾咗個檸檬雪巴我哋，可能係貴過我哋個焙茶雪糕，除咗小寶覺得酸度有啲苦之外，我覺得更解肥膩。開心。
第三次嘗試，叫a la carte。生蠔雖然貴，但好有蠔味。
吉列牛油左啲，我都係唔係太好和牛。
雞肉生煎，店員話可以生食，但人老左，唔敢博，煎到熟左。
呢個三文治非常出色，塊包吸左啲油味，配合得一啲都唔油膩。
刺身仍然出色，中間係一夜干魷魚，食下食下又幾過癮。
