2021年5月去Cordis住個staycation，過一下個Mother’s Day。由於佢冇包午餐，所以我哋求其去咗朗豪坊food Court食咗個下午茶。然後就到主打明閣晚餐。再跟住會講吓自助早餐。
朗豪坊food Court下午茶
見到呢一個廣告牌，就好想試吓食呢一個鮮奶麻薯。點知入手嘅時候，居然係右邊嗰幅圖咁。騙局。都係滿心期待晚上嘅明閣晚餐。
明閣晚餐
結婚嘅時候響7樓ballroom擺，嗰陣時冇揀到樓上42樓嘅呢個場。仲記得嗰陣時，sales話呢個場嘅selling point係，個新娘房大到可以放兩圍麻雀⋯⋯ 個問題係，新娘化緊妝嘅時候，點解旁邊要有人打麻雀⋯⋯
今次仲可以響樓上42樓呢一度，食明閣嘅晚餐，梗係要影下佢嘅夜景。但我同小寶嘅Focus又錯咗，我哋望住朗豪坊辦公大樓上面，發現仲有好多人未收工，慘慘。明明以前自己都係OT 嘅一份子，而家有毛有翼就向度話人哋，無品呀。
響42樓望出去就係九龍區嘅夜景。
由於都幾多人訂呢一個母親節嘅staycation package，上到42樓嘅時候大家響life門口 要排長龍等待登記掃描安心出行先至進入star hall。我同小寶心諗，好彩我哋結婚唔係擺呢一個hall，因為門口reception位置太迫，我哋排排下隊又有下一部lift到， 啲人逼到密一密，都真係幾濕滯。
終於入到去，仲要跟枱號坐。好似旅行團咁。
star hall另外一個selling point，就係march in嘅時候，全場熄燈，天上面嘅燈飾同埋天花板會有星星閃耀嘅效果。明明係一個咁多人嘅旅行團，佢一早都知道收咗幾多客，但係我哋初初坐低嘅時候天花版嘅星星都仲未着燈，差唔多等到第三四個餸上場嘅時候先至着燈。
接待安排始終做得唔好，明明人手好多，但可能好多都係炒散，全部一碌木咁動喺度唔知做乜。始終勁嘅接待可能全部去晒搞婚禮。我同小寶仲喺度慨嘆緊當年Floor Manager百米短跑咁衝刺跑去主家席，跪地冼過嚟，同我哋講惜食堂冇嚟到收餸。
甚至乎我哋入坐咗好耐，連杯茶都冇。隔籬枱遲過我哋入嚟，到我哋上第一道菜，佢先至有一杯茶。真係好誇張。
一嚟第一道菜比隻鮑魚仔你，然後旁邊有舊叉燒，同埋黑木耳，微溫。當年我同小寶響婚禮晚宴嘅唯一要求「餸菜要夠熱」，sales仲話明閣一定會保持水準。估唔到明閣為咗要做母親節呢一晚staycation package，晚節差啲不保。
然後就嚟到主打蟹蓋，好彩呢一道菜嘅水準力保不失，啲蟹肉蟹絲比我好似拉麵咁樣夾出黎。算佢啦。後來比我食到唐閣嘅蟹蓋之後，就發現兩間嘅蟹蓋平分秋色，唐閣 仲好似好食啲。
明閣係唔做魚翅嘅（好似係），所以結婚餐單上面都冇魚翅。呢碗燉花膠湯夠晒鮮甜，但略嫌鹹咗啲。
呢一道係陳皮和牛面珠燈。可惜我唔識食，食唔出陳皮味道。只係覺得係一舊幾林嘅牛腩。
每位半隻乳鴿再加幾兩菜，份量少，啱晒細食嘅屋企人。
竹絲雞飯，炒飯粒粒分明，唔會覺得太油，但略嫌乾身咗啲。
最後黎一個金碧輝煌嘅甜品，金箔蘆薈柚子凍。如果之前食得太滯嘅話，呢一個係幾解膩嘅甜品。因為我食咗屋企人另外半碗炒飯，鬼叫陀着QQ咩，我長期處於好肚餓嘅狀態，所以呢一個甜品幾啱我食。
The Place自助早餐
早餐出名係提供港式早餐，有奶茶、同埋有單支攞嘅益力多。油炸鬼好脆，要黎送粥一流。
亦有即場鮮榨果汁，因為孕婦始終驚沙門氏菌，可惜我唔飲得。
小籠包任攞唔使爭。唔駛好似沙田萬宜入camp咁。
有奶茶，仲有煉奶可以整茶走。雖然我陀住QQ，但我偷雞沖咗三份一杯茶走飲。
奄列好有誠意all in and well done。最後加多一個港式系列嘅蛋撻收尾。
