上年海港城生意唔好嘅時候送咗勁多coupon，當中有一張venture studio ，可以免費攞一張相嘅coupon。
荃灣港安亦都送咗一張SENS嘅攝影coupon，有一張8R相架同10張數碼相，我諗住QQ咁細個嘅時候，坐又坐唔好，都唔會影到啲乜嘢靚相，所以諗住佢大個啲先至去影呢一份。
所以響QQ三個月嘅時候就帶佢去咗venture studio影相。但坦白講可能因為QQ真係太細個，現場閃光燈都幾勁，嚇死佢，同埋攝影師唔係太識氹太細個嘅小朋友，所以唔係啲太好嘅回憶。
甚至乎要我哋帶三套衫去影相，由第一套開始就扭計，扭到第二套。中場時候仲要入房埋身安撫佢，食埋奶奶放題。明明QQ已經好驚，但攝影師成日叫我哋拉開佢，要QQ離開我哋心口，為咗影某啲指定嘅pose嘅相。最後QQ實在喊到痴晒線，第三套都冇影到我地就叫收工。
事前嘅準備呢一間公司嘅攝影師做得好足，只係可能唔適合影太細個嘅小朋友。攝影師會打電話嚟，問家庭有冇啲乜嘢特別嘅回憶，特別鍾意嘅嘢，去諗個主題俾嗰日嘅攝影。但對於我哋呢啲冇興趣、冇創意、冇思想嘅家庭來講，就唔係太適合。除非你好清楚知道自己想要啲乜嘢，但我呢個家庭就唔係囉，最好有現成嘅嘢，好似卡拉OK嘅字幕咁樣，俾我哋跟住黎唱，太有創意嘅西方嘢我真係唔識欣賞。
第一個主題就話係白色背景，叫我哋帶返啲casual啲但colorful啲嘅衫。好明顯我哋冇主題嘅屋企就唔會有親子裝呢樣野，最後我聰明地諗到全家都着牛仔布就算啦，其實佢係咪考緊我腦根急轉彎。
第二個主題係灰色背景， 叫我着得斯文啲classy啲intimate啲。OK，呢個我識，我着返工衫咪得囉。仲要我另外響NEXT 買咗條靚裙仔比QQ着。
第三個主題就要係我哋嘅興趣，我諗咗勁耐先話，好啦小寶鍾意日本，我哋就諗個日本主題啦。攝影師仲話日本嘢好簡單呀，你去買盒壽司，我即刻話影完會壞，又唔食得好浪費喎。佢話一係去Donki買啲日本嘢啦，我話但係我哋都係車出車入唔會去Donki喎。佢話咁一係你foodpanda去order啲日本嘅零食，都時散響BB個頭到啦。 我心諗，做乜膠。
佢哋有講，因為佢哋嘅相全部都會精修（最後我唔覺得精修左啲乜嘢，然後拎去英國去製造相架，全部相都唔會有數碼可以提供到。重點係，貴。
過咗幾個星期揀相。我認為我係一個西客，所以我絕對係可以就咁揀一張相就走人。主要係因為佢嚇親QQ。揀相時坦白講我唔覺得佢太hard sell⋯⋯只係小寶作為新手爸爸，俾人氹左落搭，俾咗$3600要咗四張相⋯⋯新手爸爸真係水魚水魚，算啦，開心就好。