選擇電動奶泵
今日要講嘅係電動奶泵機嘅選擇。我自己用過(1)Youha The One, (2) Youha免提, (3) Medela Swing, (4) Pigeon電動單邊手泵, (5) Spectra S1, (6)Spectra dual compact。
跳去最下邊，仲會分享吓我用嘅奶泵配件 / 唔同喇叭配唔同泵奶機。
一開始我都係乜都唔識，朋友送咗個Youha The One （應該係）， 又送左一套Youha免提（即係飯碗形狀，可以配合免提Bra使用），仲送咗一隻pigeon電動單邊手泵。最後發現spectra最好用。
- Youha The One
左邊係The One主機
Youha The One有人話用嘅係死力，塞奶時候用。但係塞奶嘅時候就好需要用到Youha（咁當然最好就梗係拎隻BB過嚟，啜通佢）。
我大多數時間都係用緊The One， 都要成個半月左右先至令到個胸適應咗個電泵，個胸可以同個電泵做朋友。又學識咗買medela嘅喇叭，medela parts可以完美地放落The One度用，但係鴨嘴、支架，其他配件就用返Youha。
我會將所有配件，放晒落去奶樽消毒機都蒸。儲奶樽係PPSU，喇叭喺PP，其他嗰啲支架配件都係PP，自己留意番PPSU先至係耐高溫。同埋留意番鴨嘴同軟膠，都需要定期更換，我自己就三個月左右就要換一次。換完再泵，個感覺出多咗奶。媽媽谷入邊有啲媽媽甚至乎話，一路泵奶嘅時候聽到有漏氣聲，以為係正常換氣，點知換咗新嘅配件之後，發現係應該無氣聲嘅，重泵多咗兩安奶出嚟，吸力都勁左。
2. Youha The Ins
朋友比嗰隻係舊款，碗上面嗰塊膠好啜乳暈，而家新款嗰隻個樣有啲唔同咗。
當初第一次用唔識，用埋免提嘅Bra，一路食飯一路泵，陪月叫唔好停，雙泵泵咗35分鐘，赤赤痛。吸到蓮姐又出血又甩皮，可能cup size又唔啱。之後嗰幾日，因為受咗傷，浪費咗好多出黃金初乳嘅機會。
特別係產後頭10日（有啲研究話係一個星期），出嘅喺黃金初乳，入邊嘅乳鐵蛋白（「每10,000克原乳只能提取1克乳鐵蛋白」）含量係最高嘅(~15-20%)。然後10日（有啲研究都係話一個星期）出嘅係過渡乳，乳鐵蛋白會低番啲。然後再10日（有啲話係產後28日之後）出嘅係成熟乳，乳鐵蛋白嘅含量會得返5%。
所以建議真係試啱咗個size，先至慢慢加長個時間，加上健康院啲姑娘如果聽到話泵35分鐘，應該會鬧死你，最好都由15分鐘開始試啦。 一定一定一定要啱size，否則就算去到成熟乳嘅階段都係會塞奶。
3. Medela
陪月帶咗一套比我試吓，試過應該係Swing，冇Youha咁大力，佢原理應該係模仿BB埋身吸啜嘅力度，去誘發奶陣（自行google咩黎既），等乳房入邊嘅小肌肉自行推奶出嚟。
可能我嗰陣時未上奶，我覺得佢太溫柔，唔係太泵到奶，所以冇再用。 同埋我覺得佢嘅配件好麻煩要對啱位拍入去，youha相對容易處理。不過可能係我個人（對奶）問題， 我去到QQ半歲左右，我嘅奶量先至開始穩定地過全日制過580ml。
Medela Flex系列有PersonalFit Flex™吸奶喇叭，好似話容易誘發奶陣，又冇咁容易漏奶。
「配合乳房形狀：全新105° 角及橢圓形設計，更貼合乳房形狀，減少乳房受壓程度，泵奶時更容易泵出母乳
舒適: 喇叭邊緣柔軟、平滑，泵奶時更感適舒自然，並可360度旋轉喇叭，以調整至最舒適的位置
效率更高: 平均每分鐘可多泵出11.8%奶量
不含雙酚A (BPA-free)」
由於重貨向Youha，所以後期我入手左好多隻Medela Flex系列，多幾ml都好呀。
4. pigeon電動單邊手泵
又係陪月話，有啲人用電動單邊手泵可以容易啲出奶，淨係試用咗一兩次，完全泵唔清，可能我胸型唔岩。
5.Spectra S1+
醫院級電動雙泵 – 淺藍色，可插濕電，又可叉電（不過要差起碼六個鐘先滿電）
左邊係Youha；右邊係S1；可以見到S1雙管，條管亦粗啲，但係條管都可以插落youha樽。
其實本身一開始都有啲想試吓Spectra。有日就見到媽媽谷有個媽媽話買咗9+，點知返工嗰陣時泵奶，發現部主機壞咗，求同地區嘅返工媽媽即時借機救亡。部機係咪真係咁易壞⋯⋯
去到QQ七個月，我仲係時不時塞緊奶，有個媽媽建議不如買部二手嘅Dual Compact，$300/$500，仲可以用返youha嘅parts。話呢部機雙摩打，吸力溫柔啲可以泵得清，左右兩邊個吸力可以調校成唔同力度，有時一邊損咗，兩邊唔使焗住用一樣力度。
最後見到二手價要$500，用同樣價錢買咗Spectra $1580 S1+ 醫院級電動雙泵。除咗條管，全部配件同youha可以互通，而條管同奶泵中間有隔油碟（？）隔左啲奶， 所以二手都唔怕。一開始用按摩模式（波浪）可以催乳。發現原來我用21mm喇叭一樣得。姐係我對奶係21mm至36mm都得⋯⋯(最後用到17mm)
相比較，youha都係多奶啲，可能我個胸已經慣左大大力，的確youha係會痛啲。Spectra溫柔好多，似QQ吸啜感。但可能未搵啱力度同模式，奶量唔及youha泵出黎咁多。
兩部機我都係要泵兩個鐘，之後再加手揸半個鐘。但明顯，用完youha個頭會實左，難揸啲，揸揸下先鬆。而用完Spectra個頭仍然係軟，亦易啲揸出黎。用過spectra就返唔到轉頭，carousell賣埋兩部Youha添。
仲有夜燈功能，我自己覺得呢盞燈真係好靚，仲有兩段光可以較，所以我明明日光日白都要撳住盞燈。
6.Spectra dual compact
新玩具Spectra dual compact
一試愛上，完全唔痛（之後繼續用有少少痛，但可以接受。)完全唔係youha嘅hea底級數。帶返工用。
我買左嘅spectra應該係韓國水貨。條管可能唔岩size容易甩（後來去奶泵城先知有個白色adapter, 條管先唔會甩，都係廿蚊定四十蚊），泵緊嘅時間就唔會甩嘅，係收納時成日甩出黎。加左adapter就好實淨，吸力都強左兩度。
Dual compact左右可以分唔同力度，岩曬兩邊受力唔同嘅媽媽。
夜光按鈕，靚。
開關機向後面，有少少唔方便，因為我手指無力，應該係想將唔靚嘅野放後邊。
有個圖形係靜音，咁係咪有非靜音架。一路都唔知呢個圖形有咩意義。
第二套奶泵機
到差唔多要返工啦，就要考慮吓要唔要買多一套組件放喺公司，唔使日日將部主機拎嚟拎去。 一研究之下，先至發現選擇奶泵係一個好複雜嘅遊戲。亦都學識咗原來有個地方叫奶泵城（可以whatsapp問問題，5702 0720），聽聞仲可以去門市叫幫你度蓮姐size同埋試泵。
最後我自己係懶得出街，反正用開，買多一套二手The One($300)主機放公司，全部配件可以互相通用，淨係喇叭要淘寶買返啱自己size嘅。
最後換左spectra dual compact放公司。
其他不同型號奶泵機
奶泵有咁多型號，真係博大精深。本身諗住加奶泵相，但真係懶得去做，自己highlight個名去Google search啦。以下我將常見嘅品牌同埋型號都列出來：
內地Youha優合
Youha The One 可單泵可雙泵
Youha The Ins 穿戴式免提，解放雙手系列
Youha 8004 雙泵
Medela美德樂
Medela sonata 醫院用，豪華型$2999 仲要冇貨
Medela harmony flex 手動式奶泵
Medela swing 單泵，相對細力
Medela swing flex 單泵，有PersonalFit Flex™吸奶喇叭
Medela swing maxi 雙泵
Medela swing maxi flex 雙泵，有PersonalFit Flex™吸奶喇叭
Medela freestyle flex 輕，可以出街用，但細力，易塞奶
簡單來講就係有flex就會貴啲，包咗有PersonalFit Flex™吸奶喇叭。
韓國製造Spectra
Spectra 9+ $950 便攜式電動雙泵 （手提）
Spectra $1380 Dual Compact 便攜式電動雙泵 – 雙摩打，可以左右兩邊唔同力度
Spectra $1580 Dual S 醫院級電動雙泵雙摩打泵奶 – 超級大部，要長插濕電
Spectra $1580 S1+ 醫院級電動雙泵 – 淺藍色，可插濕電，又可叉電（不過要差起碼六個鐘先滿電）
Spectra $1350 S2+ 醫院級電動雙泵 – 粉紅色，要長插濕電
NUK
無用過，比較唔到
Avent
無用過，比較唔到，但見到媽媽谷好多人放出嚟
奶泵配件篇
- Youha
我都算係重貨響Youha，所以要揀奶泵都要搵返可以匹配到嘅型號。
Youha嘅parts包括喇叭（又可以配Medela嘅喇叭使用）、支架、鴨咀、隔奶碟（我成日認住係隔油碟，通常叫佢油碟）、隔奶碟個蓋（通常唔洗清洗）。
圖片為youha 24mm喇叭配按摩花花（仲以為加層膠會好容易磨損，但係又幾舒服喎衰鬼）。仲可以留意到喇叭插落支架嘅位置，交接位係比較多嘅（可以插得入啲）。但如果用medela喇叭，交接位比較少（大概插得少過5mm），如果成個人烏低身向前泵奶，我試過幾次泵泵下喇叭同支架分離。
另外隔油碟嘅設計有啲衰，總有時想洗嘅時候，扯唔到個隔油碟出嚟⋯⋯
我又試用Youha Ins嘅時候，陪月話佢識用，但又無叫我接駁隔油碟，搞到吸到啲奶入條管度⋯⋯搞到我洗左條管勁耐。
2. Cimilre
買Spectra嘅時候，賣家送左套Cimilre嘅配件。見到個樽係pp，而Youha係ppsu。
喇叭同支架係一體，所以如果我要試21mm嘅喇叭就唯有try try佢。發現佢雖然支架位係一體，難清洗，不過嗰個位唔suppose有奶入去，除非你反轉咗個支架，如果係咁個樽入邊啲奶都已經會倒晒出嚟，個樽蓋上面個氣孔勁大個圓圈，真係斜少少都會到晒出嚟，所以千祈唔好泵泵下i響後邊。
雖然支架頂難清洗，但係喇叭嘅終點係封咗上半圓，啲奶係會沿着地心吸力入樽，唔會彈到上去隔油碟，我覺得比youha好。隔油碟又有開蓋位，容易打開，非常好。
而佢油碟嘅設計，比youha好，啲奶唔會彈到上去油碟度。又容易拆，連啲膠整體都溫柔好多，可能係pp嘅源故。
唔同喇叭配唔同泵奶機
上回提到，QQ七個幾月，我先發現對奶可以用到21mm至36mm嘅喇叭⋯⋯
頭一個月用過Youha Ins，出奶係最多。但由於係fix size，一黎可能未上奶乳頭未適應，二黎可能軟膠比較啜身，最容易整損乳頭乳暈，搞到又出血又甩皮。
然後轉用硬身喇叭
試用完Cimilre 21mm發現，原來喇叭細，吸力會集中啲，又可以用細力啲。配合Spectra機使用，效果更佳。但如果我用youha機配21mm喇叭，吸力太強橫，咁蓮姐應該會損。Cimilre 21mm個喇叭輕微彎曲，就算手揸出奶，啲奶可以窩住響喇叭，無咁容易流向bra。
我崇尚實驗精神，又試下用medela 36mm喇叭，配合Spectra機使用。由於吸力分散左，需要調高力度，但係出奶力，都係唔夠youha咁好。
所以medela 36mm喇叭，配合Youha機使用，效果係最佳，適合趕住食飯/趕住出門口之前快泵使用。可能都係我對奶嘅問題，無論用邊部機，我都係要同步手揸，泵完都要揸一陣先至完場。但就要留意，喇叭無乜弧度，一個唔為意啲奶會流向bra， 非常浪費。
QQ半歲時，小寶淘寶幫我更換youha支架，成套會送埋喇叭連按摩花花。所以試過21mm都得後，我又試下用youha 24mm喇叭配按摩花花，配Spectra 機，仲以為加層膠會好容易磨損（因為用Youha ins真係有陰影），但係turn out 又幾舒服喎衰鬼。但係因為我完場前都會手揸，比較多奶會黐住響個按摩花花度，我會覺得有啲浪費。
9m+：去左奶泵城試喇叭，發現原來我係14mm，仲加配左對17mm Maymom喇叭…乜料子，我之前仲用36mm。但係用完17mm泵半個鐘，都仍然可以揸得出奶，左邊3-4條柱，右邊6-7條柱，不過揸到2-3分鐘，就開始細水，咁就當收工啦。點都好過36mm要揸多15-20分鐘。
延伸閱讀