產後媽媽身體變化好大，身體真係同做女嘅時候唔同左。除咗餵緊人奶仲未嚟M，身體上面嘅種種唔同，都不停提醒自己，已經係人哋媽媽。又或者因為荷爾蒙，所以獲得種種超能力。
荷爾蒙鬆弛素急降/秒速入睡能力/秒醒/乳頭sensor/體味/頭髮/孕期痔瘡/一孕傻三年
荷爾蒙鬆弛素急降
響懷孕過程中，身體裏面嘅鬆弛數指數，係頭三個月嘅時候就想急升到去一個水平，然後響孕中期同孕後期嘅時候，就維持水平不變。直到去生完一刻，突然之間直線下降到零，身體裏面呢一種激素急劇變化，怪唔之得會令到個人情緒不穩。
令到個人少少事都好上心。特別係產後頭三個月，要不停同自己講放鬆啲，全部都係荷爾蒙嘅錯。好彩我生之前已經同小寶打定底，響嗰三個月，無論我點鬧佢都好，都唔係我嘅錯，其實我比外星人綁架咗。
秒速入睡能力
因為要照顧BB所以長期都唔夠瞓，產後有一種超能力。好似真係由基因推動，產婦可以秒速入睡，同埋極速進入深層睡眠，先至可以醒訓地維持寶寶生存。
我做女嘅時候好鍾意瞓覺，可以一日瞓12個鐘都唔起身食嘢。但係孕後期開始，就已經習慣咗兩三個鐘頭醒一次嘅睡眠規律，應該係為咗餵夜奶做嘅準備。
秒醒
由於陀緊嘅時候BB嘅細胞已經會入到媽媽嘅血液，（所以T21抽血，就可以檢測到BB性別），好似大家啲細胞會互相溝埋左。以前有睇過啲外國錄影片段，影住爸爸、媽媽、同BB一齊瞓覺，突然媽媽起身一手拎住床頭櫃個面盆放響BB前面， BB即刻起身嘔條彩虹出嚟，媽媽好似有超能力咁樣準確接住嘔吐物。都幾神奇。
有時候我會突然扎醒，然後望住個cubo cam，就會見到BB開始扭扭擰擰就黎瞓醒。
乳頭sensor
睇過一個外國研究話，有個媽媽泵出嚟啲奶會入落奶袋，入雪櫃， 點知發現有幾日啲奶變咗淺綠色。BB屎就話會綠色姐，奶都綠色？
然後拎咗啲奶去代驗，原來入邊多咗對抗感冒菌嘅抗體。原來係BB呢幾日有少少作感冒，所以媽媽乳頭sense到BB口水裏面嘅病菌量，所以人奶餐廳就放多啲感冒菌嘅抗體入去。呢一個新聞令到我印象好深刻，亦都係我好堅持要埋身嘅原因。
一路都話乳頭有sensor，咁全泵媽係點樣知道bb大食咗，繼而製造多啲奶呢？應該都係同BB細胞入左媽媽身體裏邊有關，始終阿媽都陀咗佢10個月。
體味
頭一個月唔知係因為用薑水沖涼定係咩原因，覺得自己加拿大有體臭。然後聽到媽媽谷入邊，有其他媽媽都有同樣情況，先知道原來產後短暫時間會有體味係正常嘅。
好彩半個月左右就已經冇咗，嚇死我，以為咁樣又一世。
頭髮
我陀之前，一洗頭就會甩好多頭髮嘅人。響陀緊嘅過程，甩頭髮變得比前所未有地少，我仲以為係生BB真係改善咗我嘅體質。
生完嘅頭一個月，因為用薑水洗頭根本上洗得唔乾淨，頭髮就梗係甩啦。點知出咗月之後，每一日都比琴日甩得多一點，以為自己做完化療咁。大約D130開始，洗完頭甩嘅頭髮好似越來越少，定係因為我已經睇慣左大巴大巴咁甩頭髮呢？
生完半年左右啦，我咩特別嘅洗頭水或者養髮野都無用，慢慢就甩番少左頭髮。
皮膚
生完坐月嗰個月，雖然佢可以俾我用薑水沖涼洗頭，但係都覺得自己好污糟，尤其是知道唔係日日有得洗頭更加唔想搽任何嘢上塊面度，費事揩到啲頭髮。究竟係因為嗰一個月荷爾蒙旺盛？成個身體嘅修復能力都好好（因為要修復裏裏外外嘅傷口）？乜嘢護膚品都冇用，淨係用熟水洗面、薑水洗面？ 但係整體成個月裏面，我面部皮膚係成世女最靚嘅全盛時期。又白又滑，水油平衡。
孕期痔瘡
呢單嘢真係好恐怖，睇返我個陀緊、生產過程紀錄，你就知道佢有幾咁令人痛苦。我臨生係痕到向產房抱住個肚向度ununun。留意番，我有飲大量水，食好Q多生果，日日都有便便，但我屎窟就係跌左出黎，真係關生仔事，實在係非戰之罪。
原因就係因為腹壓，（原來荷爾蒙都會令到血管擴張，我有fd變左鼻敏感都係因為鼻血管擴張左，咁我就擴張左落pat pat血管度⋯⋯但彈性夠，所以無爆到出血），孕後期，跌左四粒痔瘡出黎（咁大個女都未試過痔瘡咁痛）坐立難安。醫生一黎就問，點解唔查藥膏呀？你都未開比我，點敢買坊間果d呢？我話我好痛，唔想塞藥。醫生話入面就話要塞藥，跌左出黎果d就查藥膏啦。媽媽谷d人話，要生完20-30日先會縮番入去⋯⋯有時仲會feel到阿女繼續向肛門推進，真係xyz。前面阿女踢，後面菊花痛，腹背受敵呀。
最高峰有成六粒係出邊遊街。突然我下面好似男人咁，多咗個噹噹，要學識要洗吊鐘。
- 建議陀住嘅時候就要食蕉（有人又話孕早期唔食得）；
- 飲西梅汁軟便（有人又話要孕後期先好飲，因為太涼）；
- 食消毒過嘅yogurt（單次獨立包裝）去軟便；食益生菌去令下面好菌多過壞菌，會無咁痕（特別係跌左痔瘡出街就會好多菌，痕都算啦，會搞到會陰都生粒粒，又驚搞到bb感染）；
- 用滴露沖涼液洗pat（有人話對陰道酸鹼環境唔好，但痕起上黎，我咩都會用，用左真係好快左好多。甚至我好後悔坐月個月無用到，如果用左，可能傷口都快啲好）；
- 用女性清洗液（有人都係話唔好，你痕起上黎，咩都會試架啦，總知痔瘡快啲好）。
全盛時期，生完之後，我痛到要跪響度泵奶。而最恐怖嘅就係生完之後，恥骨痛已經即時消失咗（係咪即係代表鬆弛素已經完全收晒呢），但係痔瘡仍然會響度。但痔瘡去到產後三個月左右，先開始唔發炎，六個月左右先開始消退。但只要一熱氣，就會復發。
節錄自「出院後嘅混亂人生 (D4-D100)」
Day 20
產後檢查，何醫生話：會陰好番架啦，子宮仲縮緊，會仲有血。嘩，你d痔瘡好誇張喎，轉介你去睇外科，搞搞佢。上次大出血係因為你子宮收縮，你之前冇泵奶？你肯定冇食錯野？
總之結論係唔關佢事。
外科醫生：發就發左架啦，有血塊多過紅腫。可能係用咗灰錳氧浸（婦科比），搞到痔瘡入唔返去。唔建議搞佢，範圍太大，如果用傳統切除方式傷口仲大。只可以保守治療，即係查藥膏食必理痛，等佢自己消腫。而家整完，第二胎又黎過，攞黎搞。做媽媽係咁㗎喇。
真係難聽過粗口。賴埋落去婦科醫生度，不如開間會議室你哋三口六面講清楚。
~D150其後，開始發現有詞不達意嘅問題，有時需要重組句子。記得以前睇過一個研究，話所有英文生字入邊嘅字母，如果打亂排列，都係唔會影響正常閱讀嘅。 所以小寶就負責喺我身邊將我講嘅嘢重組一次。
一孕傻三年，媽媽變蠢嘅原因，我一直以為係BB搶咗媽媽嘅Focus，同埋要照料佢嘅起居飲食，所以太多嘢要做，就會忙東忙西。但原來最主要嘅原因係因為我唔夠瞓， 媽媽荷爾蒙影響，半夜如果聽到BB一個返身嘅細微聲音，都會突如其來扎醒。