出院後嘅混亂人生，簡直往事不堪回首，睇返臨時記事本，全部都係point form。
陪月都話，你真係日日新鮮，有唔同痛症。我嘅人生就係咁dramatic，有乜辦法。總之坐月嗰一個月，就係不停輪迴。啜奶痛、乳頭痛、下面傷口痛、行到隻蟹咁、大出血、塞奶燒、痔瘡痛、胃痛、屙油、嘔菜、被薑水搞到皮膚敏感、辣親。
你睇吓嗰陣時我寫咗啲乜嘢：「每一次埋身，我當比佢咬開啲窿，然後出奶柱又會變粗咗。每一次嘅痛楚，都係為咗令我乳頭結焦、成長。擺明同生仔嗰陣時一樣，每一下陣痛都係為咗開宮頸。」
QQ Day 4
出院：執定左一套出院套裝，姑娘會幫QQ着好，充滿儀式咁咁樣帶返屋企。其實我個人仲未回魂，全部野都係倚賴小寶去做。點知姑娘要傾出院嘅細節嘅時候，淨係叫媽媽入嚟， 真係唔係好記得佢講咗啲乜。都係頂硬上。
Day 5
唔瞓覺嘅BB，玩到凌晨。
Day 6
返去荃灣港安13/F覆診，要幫佢除衫換片，姑娘話佢冇黃， 身高體重OK，問食奶換片頻率，好彩識答。隔離有個爸爸唔識答，要打電話問功課。
Day 7
少少起黃
Day 10
第一次塞奶。
產後檢查，睇何醫生。醫院好驚，因為我塞奶低燒，直入見醫生。
醫生話睇來睇去都唔見到邊度爆線。話傷口出邊同入邊都癒合得好好，又話有時禁我傷口我就嗌痛，有時禁我又話唔痛，佢都唔知我做乜。不過幫我剪咗啲線頭，整鬆咗啲線，叫我唔好坐水泡，唔好就住佢，因為傷口明明康復緊。兩個星期後再覆診。但我都驚發炎，醫生仲話：你想食藥咪開抗生素俾你囉。
睇完醫生坐車返屋企，一路都冇事。晚上11點，諗住去完廁所瞓覺，一換安睡褲，突然大出血。再換一條，又黎？直接坐返喺馬桶，溫熱嘅鮮血係咁流出嚟，好似穿水咁。小寶都問，你流咁多血，唔會暈咩？我：又真係無喎。
一秒之後，對眼開始起霧，開始耳鳴，哎呀我見暈啦。即刻求其抹一抹，着條新嘅安睡褲，叫小寶拖我上床。我精神OK，但係肉體完全控制唔到地顫抖。然後口述，叫人黎幫我拎孕婦枕，浪高隻腳，倒番啲血去個頭度。失血過多，發冷。
小寶去買寶礦力，我話如果我休克，失去知覺，就即刻call白車。
記唔記得我仲有塞奶燒，如果唔泵奶，第二日就變石頭胸。 瞓咗一陣，去到凌晨1:00，將個人吊響床邊，吊住個胸嚟泵奶。
唯有當係出緊啲惡露，一次過，都好過陰啲陰啲嘅。
Day 11
無乜落床
Day 13
小寶生日，淨係食咗個蛋糕。
Day 14
同日，下午一個party，晚上一個party。
Day 15
見兒科醫生，黃54。醫生問幾時飲過奶，就出門口之前， 一瞓落床就吐奶x3，一打開條片，就跌咗舊屎出嚟。醫生話開始要訓練佢日夜。決定100減20ml，少食多餐。
Day 17
右邊塞奶。加孕期痔瘡返發。繼續帶着水泡過人生。
Day 18
低燒，全身無力。QQ成功啜鬆咗。
Day 19
塞完奶就到痔瘡痛。全盛時期試過，跪響度泵奶。QQ食到120ml一餐。
Day 20
產後檢查，何醫生話：會陰好番架啦，子宮仲縮緊，會仲有血。嘩，你d痔瘡好誇張喎，轉介你去睇外科，搞搞佢。上次大出血係因為你子宮收縮，你之前冇泵奶？你肯定冇食錯野？
總之結論係唔關佢事。
外科醫生：發就發左架啦，有血塊多過紅腫。可能係用咗灰錳氧浸，搞到痔瘡入唔返去。唔建議搞佢，範圍太大，如果用傳統切除方式傷口仲大。只可以保守治療，即係查藥膏食必理痛，等佢自己消腫。而家整完，第二胎又黎過，攞黎搞。做媽媽係咁㗎喇。
真係難聽過粗口。賴埋落去婦科醫生度，不如開間會議室你哋三口六面講清楚。
Day 22
食完飯胃痛，人生以來第一次痛到發癲嘅胃痛，我感覺好似胃穿窿咁。面青，嘔菜。痾油。我陀緊嗰陣時都冇真正嘔過，生完之後先至嘔⋯⋯嚇死陪月。
陪月話係我唔著長袖衫，所以入風胃痛。又話係電飯煲嘅錯。
Day 23
淨係瞓一個鐘起身食飯，心情好差。對奶好乖唔敢塞奶，我諗係因為對奶都想瞓覺。
強烈譴責，岩先小寶過樽時倒左人奶落地，佢倒到成地都係，仲有係咁咁抹自己個褲浪，仲話彈到櫃又有鞋又有，然後話只係倒左2-3ml。
Day 25
又塞奶，QQ埋身啜鬆一半。
Day 26
通番，90ml x2。每一次埋身，我當比佢咬開啲窿，然後出奶柱又會變粗咗。每一次嘅痛楚，都係為咗令我乳頭結焦、成長。擺明同生仔嗰陣時一樣，每一下陣痛都係為咗開宮頸。
Day 27
陪月用好勁嘅薑水，搞到皮膚敏感，會痕，手背仲要辣親。
Day 30
終於可以用花灑沖涼，第一次覺得花灑係一樣咁偉大嘅發明。其實用清水洗乾淨下身，就已經發現痔瘡冇咁痛，其實係咪唔應該醃製漬物一個月⋯⋯ 本身可以快啲好返㗎呢？
Day 32
偷飲珍珠鮮奶，老虎堂可能係用咗明治鮮奶，好勁。可能係因為有朋友來訪，又或者係因為偷飲厚奶蓋，媽媽表示開心。兩邊加埋135-150ml。
友人：你又steal chick
小寶：上奶的事，怎能算偷呢；你怎麼這樣憑空汚人清白
QQ開始有眼睫毛彈出。
Day 35
凌晨3點幾QQ先肯瞓，佢美國人黎架？陪月問係咪我陀緊嘅時候唔乖，我話陀緊嘅時候我都仲要返工，12點一定會瞓，唔係點返工。
所以上一輩嘅教育其實係有啲頂癮，總之所有BB嘅問題，都會係媽媽嘅錯。雖然我好似睇得好開，但當其時咁樣聽落去真係有啲銀耳。
Day 36
陪月話QQ 唔係有痰，而係支氣管炎，叫我同佢睇醫生。咁啱要去醫院打針，醫生檢查完，話QQ個肺咩事都冇，好健康，成長曲線仲係中碼。姑娘叫我唔好信咁多陪月。
返到屋企，陪月叫我哋，QQ半夜唔瞓覺嘅時候同佢念經驅魔，再叫我拜床母⋯⋯ 我總係認為係因為，日頭QQ瞓得太多，所以夜晚先至唔瞓覺。但陪月就係要俾佢瞓日頭，話我哋唔俾佢瞓好殘忍。其實對我哋都幾殘忍。
Day 42
QQ又玩到4點。塊面珠瞪舊肉仔圓潤左。小寶話我哋條命短左。
Day 45
小寶喺我餵緊奶嗰陣時打機，仲要唔熄聲，嚇到QQ世咗我一啖。
Day 47
陪月走左幾日，QQ終於可以凌晨01:00瞓到5:30。真係唔知係邊個環節出咗問題。耶。睡眠訓練開始見到曙光。
Day 51
突然有一日，一朝回到解放前。全晚淨係落咗床43分鐘。
Day 53
第一日，12點瞓到8點。係值得紀念嘅一日。
Day 56
見「紮肚篇」
Day 60
出咗街飲咗厚鮮奶，返屋企趕住沖涼紮肚，然後就塞左奶。 泵極泵唔清。凌晨12點嗰次，單次230。
我低燒38度，日頭個胸39度，燒壞奶。
Day 61
小寶陪太子女屙屎。第一次教識佢，唔唔唔。
Day 67
收到一期電費單，$5000。夏天坐月嘅成本真係好高。
QQ開始甩頭髮。
Day 68
觀察左一段時期，半夜起身泵奶，QQ都冇醒過。終於可以瞓過夜。
Day 70+
痔瘡終於好返啲，仲以為成世都會係咁，嚇死我。
Day 72
QQ 人生第一滴眼淚。
Day 73
QQ無大哭鬧，上床自己訓。
Day 74
戒夜奶經過，一日開2場party要佢宴客。QQ心諗放過bb啦，我都係訓先啦。係咁先啦，下次再玩啦。
Day 80
QQ少少厭奶，但塊面肥咗。
Day 90+
QQ未識轉身，但成日坐，仲會彈跳，鐘意jump鍾意飛高高
Day 100+
陪月教我食咩收奶。收咩奶呀，返工、壓力、黎m，要無嘅就會無奶架啦，駛乜做額外嘅嘢收奶。