三日兩夜病房餵奶遊戲

生產個日「三日產房之旅 – 生仔都要趕deadline」，全日淨係食左芝士包、幾粒提子同飲水，居然一啲都唔肚餓（好似打完止痛針定吊催生之後有一段時間肚餓，但好快就要生要打仗，所以唔得閒肚餓），生死邊緣真係好恐怖。

生產後嘅第一日

經歷咗千辛萬苦嘅生產過程，生完聯針嘅時候，問得太多笑氣，暈左成晚。話時話生完嗰刻開始，恥骨痛就已經唔見咗。幾開心。發現我嘅身體真係好正，只要有第二種更強烈嘅痛楚，就會覆蓋左原先嘅痛楚。

生完嘅第二朝，06:45 姑娘叫醒我，度血壓，準備餵奶。陀緊嘅時候，不嬲知道自己血壓低。點知一落床，去廁所又暈，所以姑娘唔比餵第一餐奶。媽媽表示唔開心。唔，應該係荷爾蒙影響。

咁我唯有食個早餐。

小寶話有袋禮物。我話是但啦，放埋一邊，我好攰。

8點半、12點半、16點半、10點半，做乜唔用整點啫，係咪我聞得太多笑氣，我覺得計數有困難。開始四個鐘一次餵奶遊戲。

兒科醫生過嚟，話QQ冇甲狀腺冇蠶豆症。QQ早上嗰餐唔肯食，寧願瞓覺。好有機會係止痛針嘅後遺症，佢都應該同媽媽一樣暈緊船浪。

第一次餵奶練習班

終於等到12:30嗰餐，我好似喪屍咁半步半步慢慢行過去bb房，上面圖片可以見到我只不過係行過斜角去對面，但我都覺得好辛苦。

房入邊有獨立位、月亮枕、可以浪腳嘅櫈仔、箍臣、乾紙巾，遇到困難可以撳鐘仔。 有啲人話生產完，唔可以用水喉水（生水）洗手，但疫症時期仲要餵BB飲奶，都係洗手穩陣啲，個水龍頭開耐啲係會變熱水，心安理得啲。

坐低左，就等姑娘嗌Number，我係33號嘅媽媽。姑娘俾咗一隻乾淨包好嘅QQ。第一次抱佢上手，原來唔使學就會識嘅。大原則係，唔好俾佢跌落街。

QQ唔肯擘大口，姑娘叫我返房拎nipple shield（頂，又要行）。然後話佢屙咗臭臭換埋片，順便整醒咗佢，然後就兩邊都肯啜。但啜下啜下發現剩係得空氣，QQ意思意思咁嗯左三聲。我問係咪冇奶，姑娘好大力連左一下我乳頭，痛到我標眼水，話：呢滴咪奶囉。姑娘話佢啜極啜唔到應該炆咗，所以幫我喂10ml奶。

醫生巡房，話個子宮收縮得好好。

好似$200定300買咗個盆，向你全身上下都好痛嘅時候，佢話要賣咩比我，我咪買咩囉。用黎浸灰錳氧洗傷口。洗完下邊田就開始痛，唔通洗走咗止痛作用？

病房入面一時好熱一時好凍，一戴上口罩就好似窒息咁樣。但係行去餵奶一定要戴口罩。我嚴重懷疑第一場餵奶果時，係因為戴咗口罩，我先至會焗到想暈低。

繼續飲陪月比嘅炒米茶，因為唔飲水就唔會有奶。

第二次餵奶練習班

我行到好似隻喪屍咁。唔係好似電視咁，我根本連欄杆都冇得扶，拎住好多嘢（BB號碼牌，nipple shield，電話，其實應該帶個小袋子）慢慢行過去餵奶房，連啲姑娘都問我你開刀㗎，我話我順產㗎，但係我超怕痛。估都估唔到，就算順產我都痛咗成個月，如果我開刀應該死咗。

QQ一咬落黎，好似恐龍咁，我痛到面容扭曲。QQ整損我左邊⋯⋯

第三次餵奶練習班

小寶提我食咗止痛藥先好去餵奶。要餵30ml水奶，QQ食咗20ml。

返房之後，我發現兩邊肋骨瘀咗，應該係生產果時如來神掌嘅錯⋯⋯

同場加映，小寶幫我用薑水抹身，然後話：咦，你大髀瘀咗，我幫你捽呀。然後就捽落黎。然後我話：xyz, 嗰個針窿嚟㗎。

眨吓眼就過咗一日

今日一覺瞓醒，我成身肌肉酸痛，好似跑完馬拉松咁。對上一次有呢個感覺，就係玩完過山車個日，因為喺車上面嘅時候，我全身嘅肌肉都繃緊，好似一放手就會死咁樣。所以生產就好似一個冇得停嘅運動過程，生咗出嚟就好。

冇乜事訓先，我同小寶日光日白響間房度拉晒簾瞓教，好難得瞓得着，有姐姐入嚟換水，又有姑娘入嚟問我填咗問卷未⋯⋯

小寶幫我用薑水抹身，想清理好自己先過去搵QQ。雖然有抹身，但覺得自己真係好臭。

餵奶練習班第一場

話兒科醫生未到，叫我入去餵住先。岩岩set好個場，QQ都擘大口，就叫收奶。兒科醫生檢查QQ，冇黃101。搞左一輪，QQ炆憎，唔肯啜。本身要喂40ml，食左35ml奶粉。

何醫生巡房遲咗，要向張床度等，一想落床去廁所，醫生就到。話剪咗四點鐘位，餵奶都可以打復必泰。

本身喂12:30，搞到一點先至過去，QQ肚餓扭計，食咗30ml奶粉。

眨吓眼又過咗一日

快快脆餵完早上嗰餐奶，中午果一餐已經唔俾你餵。叫你留喺病房，等埋醫生黎巡房，然後就執嘢走得。快快手向餵奶前，叫小寶order個午餐，等餵完奶返嚟有得食。

出院講座加餵奶

早半個鐘去餵奶房聽出院講座（都要帶埋餵奶要用嘅物資），會收走埋BB出院衣物， 食完呢round奶，姑娘會幫BB換好出院衫。

聽講座聽到一半，有個BB喊到拆天，有啲嘈，嘈到聽唔到講座囉好無。始終BB未識性，話人哋好似唔係太好，但把聲有啲熟。「33嘅媽媽響邊度，你一路聽一路餵住先啦」個b係我嘅⋯⋯好老尷。

你哋繼續講，我一路抱住黎餵奶。由陀着嘅時候開始，就已經知道佢好鍾意打c egg。食奶前同食奶後，佢都喺度打緊c egg。

走佬返屋企

然後老爺幫我將啲細軟分批搬落車，老公去找數，我仲要提佢要帶齊找數信用卡。我事後睇返信用卡收據，連埋按金，我哋一共用咗六張唔同嘅信用卡。仲記唔記得，醫院、醫生、兒科要分開收錢，見「三日產房之旅 – 見紅入院篇」。

我食晏先，拜。

我就換好衫，拖着緩慢嘅步伐去接BB。

唔知係因為疫情定係因為咩原因，只可以一個人入去玻璃房，即係平時家人隔住塊玻璃睇BB嘅地方。點解唔可以放多個人入嚟陪我，我唔覺得我可以記得晒啲野。可能護士就係想要你個腦開機，咁我唯有頂硬上。

護士講咗好多嘢，提我返咗屋企兩日之後要再嚟過，睇BB黃疸，淨係見護士嘅啫。預約咗下一次返嚟見兒科醫生嘅日子。俾咗BB針卡。俾左BB打咗腳印嘅出世紙（港安）。教你填食奶換片時間表。一日要幾多條濕片、每餐奶隔幾耐、每餐食幾多。幾耐要去攞出世紙，響邊度拎，打邊個電話預約。臍帶處理方法。比返響產房影嘅相。二抬四翻六會坐七滾八爬週歲行。真係冇聽過。

出埋聽力測試結果，結果就係左右耳都合格，頂，承惠$700。

因為我揀咗illuma，所以姑娘有特別提醒佢有特別沖調方法，就係每次要沖60ml， 唔可以自己減量。

問咗港安，佢哋唔會檢驗BB嘅血型，除非你加錢，就可以響醫院睇吓之前生產完有無剩血可以驗埋。嗰時諗住費事再加錢，就諗住大個啲先驗。

後來收到生寶HealthBaby臍帶血檢驗報告，發現佢除左抽咗臍帶血，順便驗埋血型。正，慳番。

然後就係影出院相，點知我哋走佬走得急得制，淨係響停車場門口影咗張相。然後，出院後嘅混亂人生 (D4-D100)。

 

 

---