2021年5月Langham staycation，重頭戲黎啦，米知蓮喎，唐閣喎，$1800 credit喎。究竟要點樣兩餐去食晒千百蚊。
唐閣第一午餐 – 埋單$855.8
Rice Flour Rolls $88
Monday & Tuesday set $400
Crab Shell $230
Chinese Tea $40 其實我冇飲茶我飲水囉好冇
Hot water $20 我估佢唔到滾水都收我$20
Food Cover x2 $0
今日有啲商務客。
嘩米芝蓮喎，反正有酒店$1800 Credit，所以第一日check-in之前，就試吓佢個行政午餐。點心套餐$400，送咗個奇異果汁。一個人套餐都成$400，所以我哋散嗌咗其他嘢黎試。
嚟咗啲醬料同菜甫。仲以為要錢嘅添。
套餐裏面嘅前菜。
XO醬腸粉，成條都脆，好驚艷，略嫌油膩左少許。
蝦餃，足料蝦彈牙胡椒粉略嫌多咗啲。燒賣，比蝦餃好食，但重味。
春卷，有海鮮同蛋白，加少少喼汁，好得。
赤小豆煲鯪魚，好濃稠好似響破壁機連埋啲湯料打出嚟咁。
Cordis嘅蟹蓋我以為已經無得彈。比起上黎，呢隻好食好多，啲蟹絲勁粗。烈焰紅唇嘅形狀，令人心動嘅形狀，蟹肉多到好似食緊麵咁，差啲連個蟹蓋都想咬爛佢。
孕婦日常：記性差到一個點，不停問小寶，你西蘭花食咗未？直到見到佢面色好奇怪，我再問，我問過啦？係呀。你答咗啦？係呀。
鹹蛋黃蝦球，鹹蛋黃嘅味道已經直上腦門，一路聞着唔捨得食。但坦白講食落隻蝦唔算爽口，可能因為要裹鹹蛋黃醬。
好翠綠嘅荷葉飯，一般般，好鹹。
蛋白杏仁茶
去到staycation當晚晚餐都係想食牛扒，所以去咗食西餐。所以去到第二日仲有成八百幾蚊credit未用，同小寶講，人生冇乜幾可連續兩日食米芝蓮餐廳。既然琴日食咗行政套餐，今日就全部都散叫。
唐閣第二午餐 – $897.6
Rice Flour Rolls $88
Baked Egg Tartlet $55
Stuffed bean curd in pumpkin soup $150
Baked Seafood rice $160
Glutinous rice dumpling $88
Baked pastries $55
Sea Whelkin Shell $160
Hot water $20 – 仍然覺得滾水要收$20好唔gur
Chinese Tea $40
Food cover x2 $0
今日冇乜商務客，反而隔離枱嘅「上流人士」搞到我哋笑咗好耐。我哋呢啲小朋友嚟食一次叫做見識吓世面，反而我冇諗過長期食開唐閣嘅人質素可以咁差。
事源喺隔離枱剩係得兩個人，唔知道佢哋係夫婦定係乜嘢關係，叫咗好多餸，然後去到某一道餸，侍應上菜嘅時候，個男人發爛渣，「我冇諗過你哋啲餸咁大份，咪同你講咗話食唔晒囉，點解仲係要上菜」。然後侍應即刻耍冧，話唔好意思，即刻張勁大盤餸拎返入廚房（好似平時酒樓蒸魚咁大個嘅橢圓形碟）。待應行開咗嘅時候，個男人仲係咁喺度講，話而家唐閣唔OK。 然後唔知經理定係侍應翻返嚟，同先生講，唔好意思，啱先碟餸已經幫你取消咗。
那尼？！呢個係咩玩法，明明自己落完單，但係因為食唔晒，發爛渣，就可以叫同事取消碟餸，勁浪費。大人嘅世界我真係唔識玩。
仲見到一罐罐唔同茶葉，我同小寶嘈咗好耐，究竟係display定係咩嚟。
家鄉炒腸粉，飲咗蛋漿嚟炒，再加啲肉鬆。
金香松蓉脆豆腐， 我原先以為係真係脆豆腐，點知佢響個脆豆腐上面打咗個芡，其實佢個selling point係碗湯。
望住個價錢、望住個Menu諗咗好耐，究竟要食啲乜嘢新奇有趣，但係又唔係overall budget嘅嘢。最後揀咗呢一個海螺，黎到見到好吸引，點知畢落去先至係咖喱味， 一路食我就一路問，啲海螺肉呢。好物沉歸底呀嘛，可能個海螺肉攝到好入，點知一路食一路食一路食，食到尾嘅時候都見唔到舊完整嘅海螺肉。我諗佢一定係整碎咗、撈埋左係啲咖喱餡裏面，shit。
都話琴日隻蟹蓋係值得encore 㗎啦。
琴日聽到隔離枱話，蛋黃酥好好食，所以我哋都嗌一份黎試。ummm 我覺得好一般囉。
唐閣，做中菜㗎嘛，梗係試吓佢個蛋撻仔。好甜，皮幾鬆脆，食完幾開心，但係冇乜特別好驚為天人。
小寶話要食嘅糯米雞，其實呢兩日係咁食食食，我已經飽到就嚟食唔到，可能唔係太肚餓所以真係唔覺得特別好食。
