政府派個消費券，都要搞到咁鬼複雜。
登記消費卷HK$5000，主要有四種方式收錢。我個人建議最好諗清楚你想點使呢$5000先，在因應返自己嘅需要，去選擇自己用咩途徑去收錢。
- 八達通
- Alipay HK 支付寶香港
- Wechat pay HK 香港微信
- Tap & Go
如何選擇呢？
1. 八達通
譬如好似長輩咁，本身就冇234嘅電子錢包，咁就無謂幫佢安裝又要加張信用卡落去電話。如果平時日常使用都係用開八達通，或者小額使用，咁就直情入落八達通當日常使費，平時去開嘅便利店、超市，洗咗佢就算。而八達通係會分三期收取，$2000 、$2000 、$1000 。用完第一期再收第二期。
特別留意番，如果本身八達通有信用卡自動增值服務（咁相信你都識得用信用卡增值儲積分啦），響未用晒八達通餘額嘅時候，自然就用唔到自動增值服務。我每個月都要玩六日自動增值架，所以如果我揀咗用八達通收錢，梗係唔抵啦。同埋如果選擇咗八達通收錢，收取嘅金錢係唔可以轉落去八達通銀包，因為政府驚你套現。
八達通銀包玩法：[財務類] 每月月頭任務 – 如何張八達通嘅錢轉返入銀行戶口
2. Alipay HK 支付寶香港
如果想要大額使用，234款收錢方式就可以儲埋$5000一次過用。我自己就揀咗支付寶香港，原因係因為我想一次過收晒兩期嘅費用，然後一次過響電器鋪或者零售店用晒佢，費事要記住淨幾多錢。咁我唯一要比較嘅就係234邊款優惠多啲。
Alipay同Wechat pay一樣，都可以連結信用卡，用信用卡付費，直頭唔需要連結銀行戶口。
本身我係Alipay長期用家，一開始仲食迎新優惠，再推薦埋小寶食迎新。每個月我都要黎用信用卡，繳交水電媒、政府費用，電費、電話費仲可以set做賬單，如果收到新賬單，仲可以有推送通知添。不知幾方便。再加上我諗住用果$5000去豐澤或者蘋果買電話，豐澤同蘋果到收Alipay，win-win situation。
但又咁講，Alipay可能因為本身已經太方便，佢嘅推廣優惠亦係最雞肋。聽日再講。
傳送門：使用Alipay登記2021政府消費卷之圖文並茂詳解
3. Wechat pay HK 香港微信
一登記就會送$40現金。但我個人麻麻wechat pay（連每個月嘅任務都懶得玩佢），加上誠哥嘅電器舖頭好似唔收wechat pay，所以就算佢抽現金獎有幾咁豐富，我都唔想用佢。
聽網上風評話，WeChat pay本身個Apps就麻麻哋好用，成日等QR code出嚟都好慢。反而Alipay嘅付款QR code出得好快。
4. Tap & Go
Tap & Go其實本身就係一張虛擬Mastercard，所以Tap & Go嘅接受商戶覆蓋範圍係最廣泛嘅，只要係可以收Mastercard嘅地方，前提係有輕觸式卡機嘅地方都可以使用。
但呢一張虛擬Mastercard，又唔可以好似我普通信用卡咁儲積分，所以只係有優惠嘅時候先至會有佢出場嘅機會。
Tap & Go係當初電話上台CSL嘅時候安裝嘅，我當初係用匯豐入錢入去，再用Tap & Go每個月繳付電話費賬單，然後每個月可以回贈$20，變相每個月月費平$20 。可惜當我轉左自由鳥之後，就清空左Tap & Go入邊嘅餘額（用繳款形式俾錢自己號碼嘅FPS就可以），然後都冇再使用。