嗱嗱嗱，純粹幫朋友買。因為我真係覺得神仙水好貴，完全唔捨得買，仲唔好話要將佢拍上塊面度，如果倒瀉咗一滴我都會好肉赤。我都係鍾意我嘅HABA G-Lotion，又平又抵用，仲要冇添加添，孕婦都用得。
2021年5月
staycation住開sogo樓上嘅sheraton，然後出入係咁經過SOGO，所以響感謝祭幫朋友入手。感謝祭優惠，立體緊緻護膚套裝($3,000)，總共有護膚精華230ml2支。送RNA立體緊緻精華霜15g 4份，再送護膚面膜兩片。
其實第一日感謝祭已經有行SOGO，不過第一日人太多，sales叫大肚婆唔駛等咁耐。等到staycation第二朝check-out之後先至嚟買。
點知第二日個sales勁煩，係咁話要真人響度先可以開會員（因為朋友無一齊住staycation），又話要收驗證碼，又話個電話要喺香港長期使用，又話公司要求一定事後會打電話俾呢個電話睇吓呢一個人係咪真係喺香港居住。連小寶最後都燥左，同佢講「如果你做唔到，咁我哋今日咪唔買囉」最後咪又死死地氣肯賣比我地。
仲要除咗寫明嘅贈品之外，乜都冇得送。果然我唔適合買呢啲貴婦嘅產品。我覺得SKII啲sales完全唔憂做，態度都好討厭。都係HABA嘅sales好人，又friendly又nice。
