呢一篇並唔係講有啲乜嘢養生養胎嘅飲食指南，只係講一個孕婦生理、心理上最基本最需要嘅營養。
飲食要注意夠唔夠鈣？
孕期每日要1000mg，孕後期每日要1200mg。
健康院有免費嘅Materna 可以提供，每粒鈣有250mg。因為materna鈣唔夠，所以要補牛奶或者鈣思寶。可惜我唔識吞藥丸，所以materna我都係咬碎食，食完會有少少胃氣，所以有得揀就唔想食其他藥片補充品。
無糖鈣思寶一包250ml份量等同425mg既鈣。有次唔覺意買錯咗低糖，比較過無糖真係相對好難飲，但又驚低糖會肥人，所以夾硬飲低糖。飲多左鈣思寶之後，剪腳甲會變得好大聲，好搞笑。我嘅體質幾敏感，只要飲唔夠鈣思寶，手指甲好快會變軟。
一隻雞蛋得50mg，你諗吓究竟要點樣儲1200mg。唔夠鈣，夜晚就會好容易抽筋。
孕前期，好肚餓但係食唔落，腸道好似消化不良咁。所以我用bio既知識，人手跟方向推郁d腸，邊度實、唔舒服就按摩/推下d內臟，我果時坐住一路番工一路推，頭3個月可以推到放屁。我稱之為呢一種方法叫土法消化。自從個肚太大開始就唔知個胃去左邊，之後消化都好似正常番啲，所以就唔使繼續推。同埋之前試過kick住d飯向食道，勁辛苦，開始做伸展運動，對推食物入個胃/放屁有幫助。
孕後期用asia miles，換咗部豆漿機，懶係朝頭早可以飲下熱豆漿，好似好健康咁。
鈣同鐵質記得要分開時間食
去到孕期28週左右，發現自己重咗好多，應該係因為不停食碳水化合物、澱粉質。因為食蛋白質、鐵質先至係幫助BB發育嘅。所以就開始出街食飯嘅時候就專門選擇燒肉鋪，因為生熟度可以自己控制，然後又可以餐餐食西餐，雞扒走皮加菜，搞到好似移左民咁。可能因為我食好多牛肉，所以醫生從來冇話我有缺乏鐵質嘅問題。又咁講雖然我陀女，但一啲都唔鍾意食酸野，反而好鍾意食紅肉，所以唔洗食鐵丸？。有時都會擔心阿女嘅皮膚會唔會出事。
我keep住上壓9x下壓5x，有次響健康院檢查，8x同4x，比姑娘打回頭，要再度過。搞到之後每一次度血壓之前，都要做吓運動，或者叫小寶激下我。真正去到孕後期，可能因為個胎都整到我身體好熱，血壓終於去到11x/6x，叫做去返一個正常人嘅血壓水平。會唔會係因為我血壓低，所以係咁食紅肉都唔會有事呢？歪理。
媽媽奶粉
人哋話如果響食療補充到足夠嘅營養，就唔需要飲媽媽奶，因為飲媽媽奶真係好肥。由於我頭三四個月嘅體重係一路向下急降，所以我都懷疑究竟隻野夠唔夠營養，反正又拎到媽媽奶嘅贈品，咁響第四個月嘅時候就有間竭性地飲下媽媽奶，點知就發現第五六個月體重急升（咁都唔一定關媽媽奶事嘅，果段時間餓咗幾個月，我真係好似餓鬼投胎咁，係澱粉質嘅嘢都想擺入口）。之後就轉投入滴雞精嘅懷抱，好似話會長胎又唔長媽媽嘅肉。滴雞精嘅比較
- 雅培媽媽奶ok，試用裝，味道容易入口啲。之後仲用咗一張贈品券佢拎咗一罐返嚟飲。
- 美素佳兒Friso媽媽奶ok，試用裝有5包，騷啲甜啲，飲完就算。
- 美贊臣，試用裝一包，又酸又臭，飲到一半已經好想倒咗佢。
滴雞精
益生菌
響孕中期，有試過買獨立包裝既yogurt。根據坊間指示，向雪櫃拎出黎唔好打開住，放10分鐘，等d菌向無菌狀態發酵下先，由於冇打開蓋，理論上應該仲係無菌嘅狀態。去到後期比較懶，直接飲無糖益力多就算數，反正日日都有便便。
DHA
坊間好多媽媽食嘅DHA試用裝。有人話藻油dha好過魚油，無咁多污染或水銀，可能真係植物吸得比魚類少嘅，個人選擇啦。我因為唔識吞藥丸，孕期真係食唔到，猩到喊。
上胎每朝一個三文魚腩飯團所以DHA點都夠。第二胎更誇張，連魚都未必食到，所以小寶買左小朋友食嘅DHA軟糖比我頂住先，點知我都係覺得猩。好似話一個禮拜只要有兩日有食魚，其實就會夠DHA。
響孕後期，買咗點點綠嘅芝麻合桃粉。我陀女呀嘛，順便補下佢d頭髮，順便核桃補腦呀，因為我無記性左好多（一孕傻三年），補到阿女又好，補我都好啦。我加美祿為咗有d味，易入口d，不過唔係好溶，要搞一搞即飲。
果凍
去到孕後期，好鍾意食甜野，又怕肥，又話佢唔入盆，個頭大左，所以就要搵啲有飽肚感但又唔肥嘅零食食。全部買之前都睇過佢嘅糖分，睇吓會唔會太誇張。
垃圾食物
同朋友出街嘅時候，都會食薯片，唯獨解嘅係雪糕同埋冰。我連蟹蓋都有食，係唐宮出品嘅，炸架嘛，一定唔會寒涼啦。
人地話朱古力係甜同燥熱嘅，所以中醫唔比食，又有人話食左小朋友會曳。但我咁諗，如果有人唔比我食/飲朱古力，我而家就可以曳比佢睇。