上回提要，如何收取2021政府消費券，我揀咗用Alipay去收消費券。今次就嚟一個詳盡嘅圖文並茂詳解。
首先，要準備嘅係當事人身分證。正常人可以背到身分證號碼，但佢好搞笑要求你填身分證嘅發出日期，正常人都唔會背得到。
對上一次點樣收一萬蚊？
第二，真係估佢唔到登記政府消費券居然要問返上一次係用咩途徑去收一萬蚊，仲要提供嗎銀行戶口號碼最後五位數字。好彩真係有呢一個筆記本，先至記得全家人分別用邊間銀行、邊個銀行戶口去收收一萬蚊。
[中銀] 政府一萬蚊 – 冇腦登記法之純粹靠運
[星展] 政府一萬蚊：如何用HK$50本金，一次過滾九個印花翻黎($150)
如果你話我真係唔記得咗，都唔緊要，可以用其他方法處理返。
如果本身冇Alipay戶口，就app store下載咗先，然後開Alipay戶口，如果冇記錯淨係需要輸入電話號碼收驗證碼，同建立一個Alipay密碼（大寫小寫英文加數字）。
然後，如果本身已經有Alipay戶口，就直接打開App。然後會見到「特定識別號碼」，隔離嘅「前往登記」。唔使記住特定識別號碼。入到第三版你就會見到「特定識別號碼」右手邊有「複製」呢一個掣，禁一下，然後再「前往登記」。
跟住就會響safari開啟政府網站，我唔理乜鬼嘢「智方便」，直接揀沒有「智方便」。之後網上都話，「智方便」反而排隊排到死。然後就睇晒佢啲指引，講真你想收錢啫，你都即刻碌到落最低㗎啦，「開始登記」。
佢會限制你響半個鐘之內完成登記，所以最好一早要準備定要有嘅文件/資料。又要睇聲明及承諾，拉到落最低，Tick，然後下一步。
然後填身分證號碼，身分證簽發日期。然後就嚟到最好玩嘅「我不是自動程式」遊戲，玩法係佢叫你撳啲乜嘢你要√晒多幾張圖，聽聞好多人click住咗響十字路口。禁多幾次，就會過到㗎啦。
有機會佢叫你搵紅綠燈，但實際上我冇一張圖見到紅綠燈，小寶就話，咁咪直接禁驗證就可以⋯⋯頂，我真心左。
然後就到身份驗證，佢會提供你聯絡電話「頭四位數字」，你要回答「後四位數字」。
然後就要輸入你上次收一萬蚊嘅戶口號碼「最後五位數字」。如果你有喺手，就即刻好順利咁過關。
然後再玩「我不是自動程式」遊戲。
假設你同我一樣資料好齊全，就可以嚟到以下呢一版，佢已經用你上次收錢嘅資料幫你填咗部份問題。然後就選擇用邊種模式收錢，一共有四種（如何收取2021政府消費券）。
如果你冇手多多禁其他制，咁去到要輸入「特定識別號碼」嘅時候，就咁撳「貼上」兩次，你又可以過到去下一關。
然後最後做一個在港居住嘅聲明，就完事啦。
恭喜你已經完成咗登記，亦已經征服左呢一個遊戲。我大概等咗六個鐘就收到政府確認我登記嘅短訊。然後再準備申請下一round嘅優惠。
