孕期 – 中後期購物清單

開始踏入30週，個人有啲怯，無論係日本既280日嘅BB app，定係健康院嘅姑娘，一係就叫你帶定產檢手冊（日本限定）以應付突如其來發生嘅事，一係就叫你執定走佬袋。非常淆底加緊張。好彩我係一初唔算太緊張嘅時候，已經整定project august 嘅google sheet XD所以可以跟着照單執藥。

仲需要列出埋，邊啲係消耗品，最方便嘅就係加晒落去HKTVmall嘅我的清單，到時BB出左世，揦手唔成勢，都可以咁幾個制就會送到屋企。

購物清單全集：

1. 孕期 – 早期購物清單
2. 孕期 – 中後期購物清單
3. 產後購物清單(1-3個月)
4. 產後 – 4-5個月購物清單
5. 產後 – 6個月後購物清單
6. 育兒 – 歲半購物清單

中後期購物

特別係香港地小人多、寸金尺土，冇理由神咁早就買晒啲嘢埋晒係屋企，特別係BB床、BB車咁，就算係人哋傳承落嚟嘅都好，都有屋企有位放先至OK。然後再因應自己預產期嘅時間，去查詢一下Aeon BB展、一田BB展嘅時間，大概預產期前三個月就要買定BB野，以應付突如其來嘅意外。

記得留意埋申請信用卡嘅時間。詳見「孕期 – 入院前準備 (走佬袋、申請信用卡)」

家居用品、洗澡用品、換片用品、哺乳用品、外出用品、媽媽用品

家居用品

嬰兒房

如果有BB房，又要諗吓冷氣嘅安裝，最好笑係我嘅裝修師傅，堅持要響我入院嗰幾日先至過嚟裝冷氣，為免動土影響bb咁話，都係一片好心嚟嘅。

嬰兒衣櫃/換片平台

不過又咁講，BB衣櫃最好早少少買，因為始終物料會有味道，要花啲時間等佢散味。先可以將人哋轉贈嘅BB衫褲鞋襪洗乾淨、比太陽曬乾、再入櫃。然後我而家31wk，等緊個實惠衣櫃散味⋯⋯

由於屋企唔想再擺張接枱，上面開放換片膠墊，所以直接買一個三桶櫃，到時直接將個換片膠墊放上邊，又可以泊響BB床隔離，方便就手。記得要因應照顧BB嘅人嘅身高，去衡量換片膠墊嘅高度要幾多，唔係條腰骨就會好似斷。

隔尿墊

思詩樂送嘅（好似係），有啲似漏M墊，到時鋪響張床或者鋪響換片墊上面。有聽到媽媽谷，有啲陪月建議放廚房紙響BB換片墊上邊。我就覺得BB好似會瞓得唔係太舒服，定係爆屎爆尿嘅機會真係好高？真係要出咗世先見真章。

仲可以買一盒pigeon即用即棄嘅隔尿墊，可能都比廚房紙好啲。

旋轉垃圾桶

初生BB大便次數比你想像中多， 雖然未加固但係嗰陣屎味都已經頂唔順。響carousell 買咗個可以旋轉冚蓋嘅垃圾桶，揼完條屎片落去一轉，佢就落咗下面個膠袋，就算個垃圾桶擺響BB房都唔會臭親BB。

嬰兒床

朋友介紹嬰兒床響淘寶買Faroro，好結實硬正，係實木，成個大人企上去都夠硬正。經過小寶深入研究之後，發現Faroro係仿日本牌子Farska。所以結論係佢又響日本訂Farska返嚟(JPY50288~=HK$3620)⋯⋯

今次仲要等到七月中（即係我36週）⋯⋯我好怯。我嘅情況係，張bb床響我37wk1都仲響船上面，仲有delay未ship到黎香港⋯⋯小寶表示好驚死。所以奉勸各位要運來佬貨嚟香港嘅爸爸媽媽，真係真係要早啲訂。唔緊要嘅初生嬰兒可以瞓high chair，到時咪用combi果張囉，再唔係叫小寶抱住佢瞓，但由於大人同bb一齊瞓有風險，所以小寶冇得瞓。

終於響37wk6，張BB床終於送到黎，真係一額汗。即刻放個3M甲醛淨化劑。

本身Farska就送咗枕頭、涼席同埋床褥。小寶話最新研究BB床最好唔好有軟圍欄，驚會令到BB有睡眠窒息症。

再視乎屋企環境，睇下需唔需要加多張蚊帳。

BB Cam – Cubo Ai

Cubo Ai 智慧寶寶攝影機，台灣製造，冇夜燈（即係唔會有棧好似紅外線咁樣嘅燈着住），但有夜視功能。28wk嘅時候我迫小寶快啲買，然後佢響美國亞馬遜免運費咁訂返嚟。好似聲稱話平過喺香港買(USD249~=HK$1965)。31wk嘅時後終於到咗香港。

Cubo drawback：淨係得28日嘅record，小寶想一次過響Piyolog入返晒啲睡眠時間，但係過咗去嘅已經入唔番。過去嘅過唔去，未來就一直黎緊。

嬰兒安撫餐椅 High Chair

Bedi Long就多咗個蓋，多咗床墊比初生BB，但我懷疑BB根本就唔會鍾意有嘢蓋住佢，所以冇咁嘅需要。亦都聽過朋友講，如果買純粹搖床Combi Creamy，同bb差唔多六個月左右，張搖床就淨係要黎放奶粉罐。電動版就唔好考慮啦，因為唔會長期用電郵呢一個function，BB會嘔。

結論係應該會選擇Combi Joy。Aeon BB展or 友和最抵，一田BB展要加運費所以冇咁抵。

洗澡用品

浴盆

朋友俾咗個b duck嘅我，好彩陪月都覺得呢個浴盆合格。陪月仲提醒我浴盆千祈唔好買，下邊有個膠失，可以掹開防水嗰種，因為好快趣漏水。同埋幫BB沖涼嘅時候長期都要抱住、托住佢咁滯，所以就算家居環境細，將個浴盆直接擺上冚左蓋嘅馬桶上邊，其實都可以。

同埋嗰啲防滑墊，同埋浴網，雖然都係安全為主。其實要用嘅時候又要消毒多樣嘢，到後期基本上大家都會棄用，所以我直接慳返唔買。

但朋友經驗就係，如果BB肌肉太發達，未夠六個月就已經可以踢得郁裝滿水嘅浴盆，其實都幾考媽媽嘅肌肉肌力。

產後一至三個月，買左Shnuggle月亮盆，盆底有個突出位置，可以令到BB坐響度沖涼。見「產後購物清單(1-3個月)」。

浴巾

費事用大人用過嘅毛巾，直接買條新既大浴巾比BB。

洗澡海綿

小寶響日本訂咗つやの玉（JPY660~=HK$50），好似係天然嘅海藻。

理論上用一個月就要揼，但我叫小寶留返黎俾我洗面。

嬰兒洗髮精、沐浴乳

大家嘅建議都係BB沖涼唔好沖太耐，費事凍親，最好揀唔使過水。二響朋友屋企亦都問過mustela，唔係太鍾意嗰浸香味。睇過消委會報告，又參考左護士Vi媽三小火嘅建議，直接用Aveeno Baby洗髮沐浴二合一。首先去Aeon買一支泵裝，其後補充裝可以喺HKTVmall買，平行進口平啲。

乾清毒棉

BB出世嘅時候係夏天，應該都會開冷氣。但如果係冬天出世嘅BB，如果要用濕消毒棉，就驚凍親佢哋個pat pat。所以最好買乾消毒棉，直接沾熟水或者暖水。

所以簡單啲我求其揀咗softtouch，貪佢周圍都買到。見到佢包裝上面仲可以寫可以抹埋口腔（牙齒），咁BB嘅乳齒就冇咁容易蛀啦。最緊要我又去咗HKTVmall度加入我的最愛清單，到時有咩用曬，就直接落單。

棉花球、棉花棒

棉花球都係買咗softtouch，陪月話要用黎洗臍帶。BB棉花棒有少許唔同，棉花棒頭會大嚿啲，費事伸得太入整親BB耳仔。

換片用品

濕紙巾

小寶用咗5000円(~HK$3xx)買咗三箱LEC，total 3700張⋯⋯一款抹手、一款抹屁屁、一款揼落廁所。日本銷售No.1嘅濕紙巾（好似係），號稱係99.9%純水。

再睇埋Testing媽媽嘅介紹，如果喺香港買LEC太貴，到時揀Huggies濕紙巾都可以。

紙尿片

朋友俾咗一袋Merries初生，連埋其他媽媽會送嘅贈品試用裝，到時再決定邊隻好着。

哺乳用品

奶樽

陪月堅持要買Pigeon Premium直樽，唔好買闊口樽，因為啲奶會long住喺條邊度，BB會食到風。加上闊口樽BB需要用多啲力去吸啜，如果BB懶起上嚟，就成日懶得飲、飲唔夠奶。闊口樽只適合幾個月大以上嘅BB。

又有人講，用直樽喂奶，BB食得太快又好易喂奶⋯⋯都真係唔知聽邊個講。

安撫奶嘴、收納盒、掛鍊別針

我研究咗勁耐先至知道安撫奶嘴≠奶嘴。我一路都以為失比BB食嘅係奶嘴。點知原來奶嘴係指奶樽上面嗰個咀⋯⋯小寶話好似又有研究話，頭一個月唔好俾佢食安撫奶嘴，所以直接慳返唔買，或者買定但唔拎出嚟。

收納盒都好緊要，因為安撫奶嘴好多時候都要帶出街，起碼都要乾乾淨淨。

好笑在，我同小寶討論緊嘅時候，BB勁出力咁踢我，好似知道我唔買安撫奶嘴比佢咁。當我打緊呢段嘅時候，佢又好似聽得明咁，再踢我⋯⋯

奶瓶清潔液、奶瓶刷

朋友用過話Combi好用，HKTVmall買補充裝又唔貴HK$61@3包，所以直接入去加入我的清單。傳送門

都有睇過Testing媽媽嘅簡介，最緊要揀係去油脂能力。有人會揀有泡嘅，因為一沖水落奶樽，唔起泡就知乾唔乾淨。有啲保濕程度都高嘅，冇咁傷手，但好可惜佢冇測試Combi清潔液⋯⋯

奶瓶刷，小寶又買咗個pigeon日本直送嘅海綿頭。陪月話海綿頭好容易發霉，要求我哋用返傳統嗰隻台北101放煙花頭。小寶堅持，如果用硬刷，會令到奶樽內部刮花，會藏污糟野。令到陪月好勞氣，佢堅持用傳統嗰隻。99好好，豪氣地表示，如果刮花左，到時陪月走咗，我哋成批奶樽換過佢囉。

蒸奶樽機、奶樽夾

Ulmuka多功能烘乾消毒煲，由Healthbaby大約會響32wk送出（係因為我追問佢幾時會送黎）。係因為買咗臍帶血嘅Package送嘅（懷孕 – 臍帶血儲存），就算到時用唔到呢個服務，都可以全數退款，到時俾返原價買返呢一個蒸奶樽機就可以。

試過開到機，只係就算用過濾水，個底盤都好容易出現水垢，唔通真係要用蒸餾水？

然後去Aeon想買奶樽夾，問個問姐姐可以響邊一區搵到，俾個姐姐串，你買咗蒸奶樽機點解佢無送？我點知啫。都係10幾蚊啫。

奶樽收納箱

就算蒸奶樽機有埋烘乾功能，都唔排除佢會唔會完全乾透。所以求其響HKTVmall見到有個西松屋日本製造嘅收納箱，就直接落單，但有少少迷你，唔適合想要大收納盒嘅家庭。奶樽收納箱傳送門

奶粉/奶粉攜帶盒

見孕期 – 奶粉選擇。我直接打咗去荃灣港安問，醫院有幾個牌子嘅水奶你揀，如果bb食開無問題，就照買番果隻比佢食。所以首先要揀定一隻奶粉牌子，費時到時姑娘問到你口啞啞。

無論有冇人奶都好，都要買定一罐細罐嘅同一款牌子放喺屋企做後備奶粉，呢個時候又可以上carousell到望吓格下價。Just in case，以預防突然阿媽食咗藥喂唔到人奶嘅突發情況。細細罐得㗎啦，容乜易到時阿B唔鍾意食呢個牌子，又要再買過第二款。

奶粉攜帶盒就求其買一隻三為一體就夠啦，都係幾十蚊。當初為咗帶媽媽奶返公司飲，已經買咗一盒。

泵奶器

朋友收奶之後，就送咗一個Haakaa俾我，又可以慳返。育兒 – 電動奶泵嘅選擇。育兒 – 奶袋篇。

溫奶器

知道有樣咁嘅嘢先，但我見好多人都話溫奶器要時間預熱，不如索性坐落熱水，想BB喊緊嘅時候仲可以慳啲時間。所以暫時唔打算入手。

最後又係朋友送咗一個俾我，又可以慳返。所以幾時都話朋友好緊要。

外出用品

嬰兒車

朋友俾咗部英國名牌子Silver Cross，成架車嘅結構好穩陣，仲重到我差啲拎唔起。絕對唔適合出入要帶住BB搭巴士嘅媽媽，開車收車真係要鬼佬先至做到好順手，唯有當附近散步用。成架車嘅配件可以拆晒出嚟洗。

仲要買多㗎輕盈小小嘅，方便我呢一隻廢手臂開閂車，帶阿B出街。

但應該唔會揀Combi嘅BB車，因為某個姐姐教我地睇Combi係冇調校腳位嘅部份，所以淨係適合初生嬰兒。如果果日之後喺商場見到大概一歲以上嘅BB，又仲用緊Combi車，多數兩隻腳都凸咗出架車出邊，響度fing fing吓。

初步應該會揀Capella Coozy，因為夠輕，單手可以開收車。Aeon見。

涼席

如果budget有限，其實可以用返BB床上面嗰張，但如果懶得拎出街之後，拎返張床之前又要消毒，就不如直接買多張。

背帶 孭帶

因為早期產檢做咗T21，有一張換領券可以優惠價買Chicco (HK$399)。

嬰兒安全座椅Car seat

本身諗住買Combi prime long。但突然有一日朋友送咗個唔知乜嘢牌子，用得就用，慳返。

媽媽袋

響樂天買左隻JPY3880(~279)嘅背囊款，仲有自帶換片墊。樂天傳送門

媽媽用品

溢乳墊

朋友俾咗Pigeon我，到時試一試好唔好用，再追加。我亦見到台日媽媽都比好高評價Pigeon。傳送門。我見媽媽谷都話護協好抵用，去公立醫院嘅走佬袋內容都好齊全，只要持有惠氏媽媽會、雀巢會員卡，就可以去護協買嘢，唔一定係護士先至可以入去。

響醫院嘅時候，當咁多年來都冇用過嘅乳頭，突然受到傷害，原來一個好嘅乳墊係可以好好保護個乳頭。所以就算唔係富媽媽，都好需要一個乳墊。我嗰陣時係用試用裝捱過咗醫院嗰幾日，但一啲都唔舒服。產後用pigeon，不過不失。再後來先知pigeon原來有個防溢特柔防敏感母乳墊，直程搵返做女嘅時候嘅感覺，直到BB五個月，我仍然係用緊pigeon敏感肌乳墊。

母乳收集袋

又係個朋友俾嘅，收埋咗，唔記得咗係邊隻牌子。如果好用就唔轉啦。

哺乳巾

求其響Carousell見到有人買美贊臣哺乳巾贈品，連運費都係$28，即刻買咗。

二胎後追加：衛生巾/安睡褲/乳墊