等我記錄低幾次大事，令到我開始要認認真真面對人生，孕期真係會令到個人蠢咗。
找錯卡數
由於每個月都會玩一次找卡數嘅遊戲，用恒生信用卡去找東亞及星展信用卡嘅卡數，一路so far玩左咁多年都相安無事。就啱開始有咗嘅頭三個月，就已經發生咗一次令到我老貓燒鬚嘅事。我居然將星展嘅四千幾蚊卡數，找咗落去東亞信用卡度，搞到東亞信用卡有成三千幾蚊debit amount。
呢樣野唔可以接受嘅程度，令到我即刻打去東亞卡熱線，問佢可唔可以退返錢俾我。然後東亞信用卡CS話，係可以，但要收$200手續費。我唔容許我嘅愚蠢，令到我要付出額外嘅$200手續費，所以我寧願將找錯咗嘅卡數慢慢滅（因為里數貶值，明明本身諗住年頭就cut咗張東亞信用卡），終於玩左三個幾月先至用得晒入邊嘅錢。激死我。
真係要認認真真咁樣，跟住Step plan咁去找數先得⋯⋯「[財務類] 每月恆常固定任務 – 如何找卡數」
愈臨近生產，就發生找左卡數第二彈⋯⋯一開始產假，就發現我搞錯咗六萬幾蚊卡數，明明去花旗，但找錯咗去星展。然後即刻打去花旗信用卡專線，用電郵形式俾返啲十卜停佢，我唔係冇交費用㗎，係蠢得滯交錯咗，希望佢可以幫我豁免左成二千幾蚊手續費。跟手打去星展，星展話要親身落分行先至搞到退款。仲未知使唔使收額外手續費。
冇帶電話出街
第二件事係，當有一日出發去staycation，由於搭村巴出城有啲見暈，所以都冇禁電話。然後搭完村巴出西鐵站，再蝸牛咁樣踏步行過去上西鐵站。上到西鐵之後，終於想禁下電話，就發現成部電話留咗係屋企。
如果係普通出街都冇咁嬲，但staycation要過夜。一嚟我影唔到staycation花絮、二來冇咗部電話真係好冇安全感。好彩有朋友可以幫我兜返屋企，拎埋部電話出嚟。
加錯試用裝
第三件事係，我不嬲都有將護膚品贈品支返入去貨裝size度用嘅習慣。圖文不符系列：「[護膚區] 贈品之唔好嘥咗佢」。
而響呢一個孕傻嘅階段，我居然將lancome嘅眼霜支咗落去lancome小黑瓶入邊⋯⋯搞到我要慢慢用返晒入邊混合左眼霜同精華嘅液體，之後再洗乾淨個樽，再晾乾，先可以再加小黑瓶入去。激死呀。
唔記得還P-loan
估唔到去到生產完都仲會出現，我嘅記性只能夠係話每況越下。最衰都係大新啦，每次set自動轉賬最多都只係六至七個月。響我生完嘅兩個月都冇時間去check住啲數， 搞到有一期渣打嘅P-loan無轉到帳⋯⋯好在，發現咗之後，即刻轉錢，打去渣打要求豁免利息，好彩係初犯，所以都可以成功豁免到成千蚊。
詞不達意
~D150其後，開始發現有詞不達意嘅問題，有時需要重組句子。記得以前睇過一個研究，話所有英文生字入邊嘅字母，如果打亂排列，都係唔會影響正常閱讀嘅。 所以小寶就負責喺我身邊將我講嘅嘢重組一次。
一孕傻三年，媽媽變蠢嘅原因，我一直以為係BB搶咗媽媽嘅Focus，同埋要照料佢嘅起居飲食，所以太多嘢要做，就會忙東忙西。但原來最主要嘅原因係因為我唔夠瞓， 媽媽荷爾蒙影響，半夜如果聽到BB一個返身嘅細微聲音，都會突如其來扎醒。