懷孕產檢時間表 – 中期懷孕檢查（17-27wk: 包括照結構）

懷孕中期症狀

終於可以順利痾得番屎，雖然唔一定夠力，但起碼都叫食得夠、屙得出。但有時候唔夠力屙清，又唔敢太大力痾，人生真係好難。

終於食得返野，咩都好想食，乜嘢調味料都好想落。但一食就好容易過重，醫生話一個星期最好唔好重超過0.5公斤，但我有一日就已經重咗0.5公斤⋯⋯然後就會有啲惡魔朋友，係你身邊講咩一個人食養兩個人，計埋羊水都唔係好重啫⋯⋯條友出世果日報都係飲茶匙嘅奶架渣！

條腰開始好酸軟，可能關脊柱側彎事，16週幾就研究緊托腹帶。戴咗托腹帶行路真係冇咁痛，但去廁所成日要順返啲位，其實都幾煩。同埋因為肚皮敏感，所以我要喺入邊着件heat tech或背心仔先至再加托腹帶。

好似話孕婦吸入嘅空氣有50%嘅氧氣，都俾曬隻野。唔怪得知我成日唞唔到氣。

由24wk開始，每晚沖完涼查完cream，都有做拉毛巾練習，等cream dry out。

由25wk開始，晚晚都有坐大fit ball。

中期懷孕檢查

私人時間嘅時候：

17wk6，好似feel到佢打c egg⋯⋯大人都會一齊震
17wk7，左腳小腿抽筋。
18wk，俾條褲頭壓住一陣，就會郁郁郁。

第十一次產檢（第三次政府產檢）：
19wk6，今次又係去健康院，晨早六點幾就起咗身，就係為咗佢個第二督尿。

因為唔再係新症，所有要自己嚟。一到步登記完，要自己去量體重、度血壓，然後入房交尿。點知姑娘話86/47/77血壓太低，要重新排隊再度過99/57/84。

然後等叫號碼，聽BB心跳，每人入房前要拎住張紙巾自己清理，呢啲就係政府同私家嘅分別。姑娘只係鏈咗我一下腳踭，就話我冇水腫。

然後等叫名入去見姑娘，姑娘話我脊柱側彎又唔去政府排期，因為脊骨有事，唔好亂郁，唔好亂拉筋，冇去物理治療唔ok囉。又要我曬太陽，但係唔需要曬全身，曬手掌就夠。我有問點解上次惠氏比少咗兩粒，姑娘話materna 食少一兩次唔會死。

因為有B鏈，穿水前要打抗生素，唔可以好似人哋咁沖個涼先至去醫院，穿水前就要到醫院。我問，咁我唔穿水，點知幾時去醫院呢？佢恐嚇我話，總之你穿咗水先至入醫院BB就會有危險。由於地區位置所以冇得揀，所以只能響屯門醫院生，姑娘都話選中邊個醫生係撞手神。暫時仍然唔使飲糖水。

姑娘順便講埋驗血報告，無乙型肝炎菌；有德國痲疹抗體；無HPV性病，驗尿血壓都係正常，血型係AB+，所以全世界都可以捐血俾你。

終於等到入去見醫生，醫生會問你有咩唔舒服，我即刻問抽筋係咪唔可以拉筋。醫生話你拉筋拉隻腳咋嘛，又唔係拉條腰，點解唔可以拉筋⋯⋯雙手靠牆工字步咁樣拉就可以啦。

最緊要就係睇個肚嘅痛楚係咪有持續性。同埋由於週數太細，所以韌帶（響腰嘅兩側）冇咁快會痛。痛楚有可能只係大腸入邊嘅大便蠕動嘅時候頂到子宮頂部，大腸係軟嘅，但係大便係硬嘅，所以係大便同子宮爭位。如果過咗一陣就唔痛，咁應該係大便已經移去第二個位置。（⋯⋯）

醫生仲話遲啲可能會有假宮縮，每個鐘如果有兩次假宮縮，個肚好似變成石頭嗰樣，咁到時就要睇醫生。

我問，點解我個暖爐仔仲未發工。醫生就話怕凍係受荷爾蒙影響，同血壓無關。血壓低呢，你成世人都係咁嘅，就唔會因為生產而改變。血壓又同體溫冇關係，就算血壓低嘅人，陀嘅BB就會將心跳提高，加快去供返血。總之就係有可能會繼續怕凍到生嗰日啦⋯⋯

第十二次產檢＋照結構：
20wk3，人哋個個都話照結構有排攪，如果BB唔俾面，玩足成日都有機會。但我哋照過結構只係照左半個鐘多啲⋯⋯個醫生又係好搞笑⋯⋯好多朋友都要照成半日，仲要離開間房，出街散吓步再返去。有個朋友誇張到，行咗大半日都仲未做得晒，個醫生又要緊急開刀，搞到要book過第二日再照埋剩低嗰五份一。我個女大無謂，攤晒出嚟俾醫生睇，所以好快搞掂。

一嚟就已經問，你知唔知今日嚟做乜？照結構囉，睇吓啲手指腳指齊唔齊囉。佢即刻話，多咗隻少咗隻手指，唔會令到個小朋友養唔大，最緊要係要睇吓佢啲內在器官齊唔齊全。又話10000個嬰兒就有500個會有問題，50個唐氏、30個複雜器官容易出問題。好似你叫老公煮蛋，實搞得掂㗎，但你叫佢整蛋糕就未必得。

好似上幾個星期睇咗一個症，個BB大腦同小腦中間冇咗條橋，呢啲BB活唔過兩歲。咁我即刻問，我個女條橋呢？佢淨係答我，正常。（頂）又話以前喺外國睇症，見到好多外國人有咩問題都會生落嚟，係又生出來、唔係又生出嚟，佢會直接同啲父母講，生咗出嚟，九成機會你哋會響兩年內離婚。（⋯⋯）

阿女有個心臟，心房好正常，動脈、靜脈、血液流動都正常，向個電視機仔入邊直情會見到紅色同藍色indicator嘅血。腎臟好似粒啫喱咁。其實呢除咗正常之外呢，就唔係有太大嘅得着，反而平時照超聲波見到嘅阿女，仲開心。

私人時間嘅時候：

睇咗好多台灣孕婦嘅分享，好值得記低嘅係有一位文青女神，自從有咗，女孩女人嘅身份就已經煙消雲散，所剩低嘅只係一個嬰兒嘅載體。文青女神係佢老公面前從來唔卸妝，但到就生仔嗰一刻，護士拎住尿兜比佢，然後要佢喺老公面前屙屎，先可以入產房。所以生過小朋友嘅女性，往後要面對嘅人生就係屎尿血濃痰。生嘅時候只係床上面嘅一陀肉，任何一個人都可以過嚟篤吓個陰道，都真係要生嘅時候，會痛到見到冥河/真理之門。BB出世之後流過的眼淚，係證明咗自己仍然在生⋯⋯生育真係一個悲壯嘅決定。

20wk5，21wk6，繼續抽筋，明明拉完筋先瞓覺，都要繼續抽，好有毅力。

23wk，終於忍唔住去book返pilates嘅prenatal class。第一次同阿女做運動，日本人Miss係咁叫，要俾多啲空間阿女。12點上完堂，雙手已經廢咗，舉唔高隻手。去到下午坐車嘅時候，已經瞓到隻豬咁。平時做完運動要隔兩日肌肉先會酸痛，可能有咗嘅緣故，當日做完運動嘅晚上，已經成隻酸軟屍體咁嘅樣⋯⋯一定係因為血氣循環、新陳代謝好咗啦。

有個friend喺澳洲湊女，話要教識個囡廣東話，同佢講匙羹「痴根」、紙巾「痴根」、青瓜「青蛙」⋯⋯

第十三次產檢：
23wk6，因為每次去見醫生，都會唔記得咗想問啲乜嘢問題，今次我哋做足準備，抄低晒啲問題先入去見醫生。

問：胎動好多；醫生答：咁咪好囉，識郁咪好囉
問：恥骨痛；醫生答：呢個週數差唔多開始會痛㗎啦，正常嘅
問：做咩運動會有幫助？醫生答：做運動冇幫助架，用托腹帶啦
問：我驚托腹帶會壓住個肚，影響佢成長；醫生答：托腹帶你綁骨架嘛，唔會綁到個肚架。
問：佢成日都好肚餓；醫生答：正常架，受荷爾蒙影響，血糖又唔穩定，所以唔好食咁多澱粉質，要食糙米十穀米，要食肉同菜，要望住個體重黎食。
問：到時生嘅時候嘅醫生費；醫生答：床位充足呀，你34週之前約就可以。

條頸好乾淨，臍帶無纏頸，所有生長曲線都正常。頭圍肚圍手腳都係合格、至最多細五日，最合乎標準嘅係肚圍。我問，會唔會我肥得太快，所以B女都肥㗎。醫生話佢唔肥啊。我：佢肚圍肥呀嘛。醫生：唔係我講㗎，係你先生講㗎咋！秒速戴頭盔，笑死我地。

私人時間嘅時候：

每晚臨瞓都有一個私人按摩時間，由小寶操刀，安撫隻小魔怪。按摩完肚仔就會叫佢turn left（有擔心過佢會以為turn left係瞓覺或者熄燈咁解），有時響按摩緊嘅過程已經可以feel到佢喺入面轉身，真係好聰明。然後響25wk5嘅晚上，佢居然踢郁咗放喺肚皮上面嘅紙巾，真係好暴力。

第十四次產檢（第四次政府產檢）：
25wk6，因為政府健康院，一嚟照舊要神咁早六點幾排起身屙第一篤尿，然後瘋狂飲水，可能我個人新陳代謝比較慢，所以要成45分鐘至一個鐘先至留到第二篤尿。再用密實袋包好，先有早餐食（陰公）。

一到咗健康院，登記完，就排隊度血壓。由於有上一次嘅經驗，對決啊之前我好似運動員咁做好熱身先，第一次度上壓九十幾下壓五十幾。諗住試多一次睇吓數值會唔會靚仔啲，點知出到嚟上壓九十幾下壓44，同小寶一齊叫出黎「垃圾」⋯⋯用返高下壓嘅數據，就等叫號、量體重、驗小便。

等到聽心跳時，今次雖然姑娘冇叫，但大家都自己識得拎住紙巾。一瞓低胎動就好頻密，首先姑娘話隻腳好靚冇水腫，用人手軟尺度胎嘅大細，格住肚皮肉眼可見佢喺肚裏面嘅郁動，甚至乎佢踢開咗姑娘胎心機枝棒三次，笑到我地呀。

入到房，今次姑娘多嘢講，同我年紀差唔多，但早結婚早生仔已經生咗兩胎，兩胎都係女。第一胎係開刀，因為BB最後臨門一腳就胎位唔正；第二個順產就回復得好好，所以一定要keep住BB嘅size響3 kg (6.6lbs)，咁就容易生啦。

雖然話每個星期淨係可以重0.5 kg，但睇返我過去四個禮拜嘅表現，我每星期重咗0.78 kg，佢話最好唔好超過1 kg啦。呢一個週數，要食多啲蛋白質，唔上火嘅話就食多啲肉類、海產類；鐵質、鈣要分開食，姐係食完紅肉唔好即刻飲牛奶。可以睇中醫睇下體質，最多唔食藥嘅啫；食紅豆沙；食飽要散步，防止血糖升得快；盡量放鬆所有肌肉，要分開腳坐，因為鬆弛素越來越多，唔好坐矮凳，唔好踎低，唔好拎重野；坐要有靠腰。

胎動多可能係因為肚皮薄，亦有可能係因為腹部冇肌肉。托腹帶係有用嘅，因為佢第一胎成個人都唔舒服，但如果你坐又帶、企又帶，最後就會變到自己嘅肌肉流失晒，所以淨係行路行得多個日先好戴。因為大家都唔係運動員coffee，本身唔係多肌肉，所以要訓練肌肉嘅話，生完先好訓練。依家有得瞓就好瞓，飲幾多滴雞精都唔會長胎，諗少啲嘢、瞓多啲先至會長肉。35週後先至再坐fit ball，依家坐就只扭腰就算。等到大約2.5至3歲追第二胎，小朋友可以溝通到，又要入學，所以唔會有太多爭竉嘅機會。

私人時間：

阿女響入邊遊水，仲識得跟莫札特打拍子。

第十五次產檢：
27wk6，差唔多踏入最後一個孕期。由於一切正常，所以實際見醫生連埋照超聲波嘅時間，加埋都唔知有冇15分鐘。

醫生，佢好活潑，成日踢「正常架，遲下踢得仲勁呀」
醫生，我恥骨痛呀，做左運動先好少少無咁痛「正常架，遲下仲痛呀」
醫生，我成日一食野就喉嚨泛酸「正常架，佢頂住你個胃，遲下仲辛苦呀」

糖水測試

有部份媽媽因為糖尿檢測結果有問題，所以政府我要求佢飲糖水測試，而我好好彩冇遇到需要飲糖水嘅情況。但都節錄下其他媽媽嘅心路歷程：

「早一晚零晨12點後就開始唔可以食野，只可以飲清水。8點去到醫院應該會先登記，之後抽第一次血，跟住要係15分鐘飲哂杯糖水（大約一枝330ml細水size），然後飲哂自己計時2個鐘就入去揾護士抽第二次血，中間只可以飲水，抽完就走得。以上係我上次瑪麗飲既流程。有人教自己拎飲管去飲會易入口啲，不過都因人而異。」（credit to Kaylie）

 

---