孕期 – 早期購物清單

其實頭三個月因為荷爾蒙、身體天翻地覆嘅改變，真係冇咁多時間心力去做好我應做嘅嘢，所以我大部份嘢都係三個幾月先至開始做，包括左開Excel表(?!係呀，我開咗個project august 嘅google sheet XD)、買前中期嘅嘢、準備中後期、同埋出世之後嘅事宜。

購物清單全集：

1. 孕期 – 早期購物清單
2. 孕期 – 中後期購物清單
3. 產後購物清單(1-3個月)
4. 產後 – 4-5個月購物清單
5. 產後 – 6個月後購物清單
6. 育兒 – 歲半購物清單

早期購物

葉酸

懷孕前食嘅葉酸要自己買，當補充品食，3個月左右響政府做完產檢有得拎免費嘅Materna，之後就冇再自己買個營養補充品。

防嘔吐帶

頭兩個月成日作嘔作悶，但係又嘔唔出，淨係好想瞓覺。屋企人買咗隻鬼佬野(Made in England)，係手帶嚟嘅，佢有舊硬嘅嘢可以頂住個穴位，咦又話係鬼佬野黎嘅，fusion嘅嘢我真係識條毛咩。

牙膏

第二胎頂唔順以前牙膏陣味，要去買過，呢隻清新得來好似可以減緩孕吐。

陪月

理論上原來好多孕婦都會響頭三個月，就已經會搵定陪月，所以我到第四個月要搵陪月嘅時候，好多陪月都已經滿期。

低腰底褲

大約兩個月左右，我就開始覺得隻小朋友（明明得隻雞蛋咁大）唔係好鍾意比褲頭勒着嘅感覺，就淘寶左八條V shape低腰底褲，我原先都好怕着低腰褲，但着落又OK又唔會箍住個肚仔，可能生完之後都keep住買呢一種XD

有人話著高腰好啲，可以包住個肚，但我寧願比個肚自由生長。查完油用小背心（夏天）或heat tech（冬天）蓋住，又吸下油又繼續全日滋潤個肚。總好過每次去廁所都要拉開條高腰底底（充滿油嘅），然後去完廁所又要蓋番落肚。

第二胎再次回購，因為用油查肚，底褲邊好快會變黑，有油益味，因為佢又平又正，揼左都唔會肉赤。

JD 十月結晶連結

孕期長褲

除咗底褲，梗係要買埋長褲，淘左幾條褲頭可以隨着個肚圍而長大嘅修飾腿型褲。可能之後幾個月就要買連衣裙，但由於香港地一二月嘅時候都會凍，我個暖爐仔又一路都未發功，所以我一定要着褲先夠暖。因為預料到個肚長大嘅時候會係夏天，所以都唔敢買厚身嘅物料。但係四五個月嘅時候體重升得快，有幾日着長褲時的確係會覺得緊左，但由於佢有綁腳嘅感覺，亦都無時無刻提醒自己唔好食太多。加上健康院都話我冇水腫，所以我係真心肥咗⋯⋯

第二胎仲carousell買左條$50蚊，入面有毛毛嘅legging黎著添。

孕期內衣

然後到咗三個月，開始覺得個胸有被綁住嘅感覺，所以去咗UNIQLO同埋GU，買咗冇鋼線內衣，由得個胸二次發育，淨係唔想有被束縛嘅感覺。但過咗幾個月照鏡就發現，終於明白賤肉係點樣橫生⋯⋯但已經返唔到轉頭。

洗頭水護髮素

由於頭三個月對氣味非常敏感，又時不時會頭痛，所以研究咗一輪買乜嘢洗頭水護髮素好。忽發奇想既然坐月都要用薑水沖涼，咁不如研究吓薑味洗頭水，HKTVmall發現有隻台灣牌子叫薑心比心，買咗一套黎用，感覺非常有機（唔起泡），好似洗唔乾淨咁，就係咁先至最安全呀嘛。

第二胎放棄左，因為薑心比心實在洗得好唔乾淨。轉左日本牌子。

孕期護膚品

會有啲媽媽會希望比最無添加嘅嘢BB，所以有機會換過晒啲護膚品。我個人直情連眉毛都懶得畫，係純粹係因為懶。好彩我已經一直用緊HABA，呢個品牌係聲稱孕婦都可以用嘅。

詳情請見「[護膚區] 爽膚水 – HABA G-Lotion」「[護膚區] 護膚油 – HABA SQUA Q10」

第二胎轉用Glycel，同HABA同一個brand，孕婦可用。因為年紀大，要用好少少。

洗牙

見牙醫洗定牙：15wk4，因為見一路都正正常常。就響孕早期book定牙醫。孕中期，就睇定牙醫、洗靚棚牙。有人話，可能會洗左細菌出黎，可能會經血液再入過胎，所以有人話孕期中間洗牙都會有風險，但我好驚孕後期妊娠牙痛，所以照洗。其實洗嘅過程都會好溫和，簡單啲來講就係洗唔乾淨。

臍帶血儲存

本身呢舊嘢唔係一個must buy item，純粹係屎忽痕可以睇吓。詳情請見「懷孕 – 臍帶血儲存」

月亮枕

然後第四個月開始，覺得條腰好攰，瞓得唔好，就買咗Hugsie月亮枕、六甲村托腹帶。月亮枕買咗涼感布料，瞓覺向左抱住側睡好涼爽，之後響BB展仲買多一個涼感布料嘅被套換洗。

妊娠紋油

人地話，要睇你媽媽本身有無紋，如果有紋，咁多數都會出紋。不過做好預防，點都好過事後補救。有啲野，無努力過嘅話，事後出左紋就喊到無後悔藥食啦。人地話3個月開始可以開始查油保養，唔好等到出紋先補救。

我第一胎都係查油嘅，朋友溝嘅organic oil。不過第一胎因為足40週，最後2週個肚大得快，先黎爆紋，咁都無辦法。

第二胎仍然用organic oil，但另外加左一隻價廉物美嘅無添加無有害物嘅油，仲係3/2023嘅消委會推薦。最正仲可以HKTVmall送貨添。

jimmbenny有機洋甘菊x有機堅果油無痕護膚油

托腹帶

一定一定要去試上身，因為人人肚型唔同，感覺都唔同，有人唔鐘意包肚，淨係用帶，我就覺得淨係帶唔夠承托，可能我個肚好突出？

亦有試過犬印，但孕期個肚好敏感，所以果時咩lace都唔鍾意，犬印就係日本好girlish girlish果種style。所以放棄左。孕期開心先有開心bb，所以果斷用六甲村，但用用下都覺得吉肉，又要加小背心。

至於六甲村托腹帶（我用全包肚），佢聲稱仲可以抗電磁波（？！），所以我返工都有戴，但戴之前入邊一定有件小背心，先至唔會刮肉。直到有一日唔知係帶得太耐佢太污糟、定係我查嘅cream唔夠，成個肚仔出紅疹，終於的起心肝洗咗佢。跟住再響carousell用全新未開封嘅價，平啲買第二個返黎替換。

小背心我買uniqlo既airism，伸低估左個肚圍既size，買左幾件M size。廿幾週後，就發現M size cool住個肚，好唔舒服，唯有買多兩件L size。由於都有查肚皮油，件小背心洗極，肚皮位都會變左色，係有d肉酸，但為左唔好爆肚皮紋，唯有犧牲咁多件背心仔。生完就揼左佢。

產後就買犬印，因為日本媽媽話，犬印修身最靚/.\咁幾吉都要用啦。見產後 – 4-5個月購物清單，又真係修大腿根部修得好好架衰鬼。

滴雞精

第五個月，發現媽媽奶粉係肥媽唔肥B，而原來飲滴雞精係會長胎唔長肉，所以就開始研究邊隻品牌會好啲。懷孕 – 滴雞精嘅比較

孕期supplement

向點點綠買左核桃黑豆黑芝麻粉，飲品加幾匙落去，希望bb聰明啲，頭髮多啲。

孕照

孕照影邊間公司，我好懶咁跟咗朋友揀Base One Studio，反正當初揀結婚big day攝影都有睇過呢一間公司。然後為咗準備30週影孕照，知慳識儉嘅我就梗係響carousell買二手孕婦裝。順手買咗好多條$80樓下，仲要包郵嘅連衣裙，返工總算唔使着嚟着去都係嗰兩條啦。

透過carousell，我仲將好多唔需要嘅贈品（懷孕 – 媽媽會贈品時間）賣咗出去套現，真係一個可愛可買可賣嘅交易平台。

薑醋

然後第六個月，陪月會來簽合約，順便同你夾下要唔要煲薑醋。陪月教我要買紅磡嘅明德醬油嘅醋。「甜醋製法用心，以米醋加12種藥材如當歸、川芎、白朮等，煮3小時後，隔渣再加糖，最後加入黑糯米醋。」比起一般嘅醋，多咗浸中藥香。

聽陪月話，5斤大約10人份量(即係1斤大約2人份量)，通常兩家人食嘅話，就會預備12斤。如果要派出街就要額外預備，而醋多數都會一次過買。

BB保險

然後仲要開始研究吓BB保險。當初bb展響灣仔天橋都拎咗好多保險經紀嘅聯絡方法，但坦白講，冇一個啱傾。唔知係而家世代變咗定係點，一係就好似唔優做咁，再唔係就係佢拖你幾個星期先至比proposal你，然後逼你好短時間之內就要同佢傾。問保險經紀嘅問題，一係答唔到，一係就答非所問，一係就帶你遊花園。然後自己個人用開嘅agent又話要移民，人生真係好累。

搞到我頂唔順，將上幾年抄低關於自願醫保嘅資料，連同我對保險嘅認識，又寫咗落去記事簿度，先至要點樣揀。「保險記事簿 – 人壽、危疾、意外、醫療、住院 (包括自願醫保)」

---