Ritz-Carlton 麗思卡爾頓 – 堅離地食玩瞓系列 – 頂樓Rooftop

上回提要，為咗慶祝我生日，小寶今年好豪邁地帶我去Ritz-Carlton 麗思卡爾頓過咗兩日一夜。離地到食在102F，離地到瞓在111F、離地到遊在118F。

Ritz-Carlton全系列

黎到118/F嘅Swimming pool，直入更衣室就可以去泳池玩。泳池門口嘅Con屎啊，仲好記得小寶想用人哋支消毒搓手液。一噴，原來個噴嘴係直嘅，仲要噴力驚人，所以我成件外套都濕咗⋯⋯

仲走咗去泳池嘅更衣室入邊睇吓有啲乜嘢物資可以唔使大。

夜晚唔係太夠時間，所以我哋食完早餐又上左黎呢度睇，今次仲有位哥哥帶我哋出遊。哥哥話個泳池景係望港島嘅，比起港島嘅酒店望九龍景更靚。

哥哥仲介紹呢一個係超級無敵打卡位。

喺呢度望落去，香港真係石屎森林一樣，每個人都有佢自己嘅故事，有人用咗一世嘅積蓄，先至買得起每一格階磚，喺度好似SimCity咁樣嘅一格格積木。你可能住緊響嗰邊嘅牛奶盒，但係呢一邊就有一格格停泊好嘅遊艇。呢啲就係貧富懸殊。

好似台灣101咁樣，好鍾意睇建築物望建築物嘅落差。

室內除咗泳池仲有凍水池，得10度，爽爽爽。一行出去室內就見到嗰jacuzzi，40度，冇蓋嘅空間，490m above sea level，好似露天溫泉咁 。真係好可惜啊，無帶泳衣。但由於已經見到呢一層泳池兩次，響490米海平面上面游水，人生目標點都應該要刷新下。好彩退房時間extend咗，即刻落圓方買泳衣($495)。然後上番黎迫小寶落凍水池，再拍佢片！

由於係露天嘅，有隻蝴蝶飛左入嚟之後，一路撞塊玻璃，好想飛走。傻仔，要向上飛呀。

室外嘅環境仲會見到右手邊GYM房嘅一排落地玻璃。咁樣望好有井底之蛙嘅感覺。

就係咁，明明唔係網紅，都出左張相。響118F嘅泳池游水同浸490 m above sea level 嘅jacuzzi，人生記錄達成！