過年時，同屋企人去咗中環The Murray煮好啲、食好啲，開個好年。The Murray算係我哋so far住過最貴嘅staycation，就一於睇吓佢值唔值呢一個價啦！
The Murray坐落於中環長江、匯豐中心後邊，亦可以由太古廣場穿過香港公園行到過去。同中環Donki距離大概20分鐘。呢度以前好似叫美利大廈，係古蹟重建搖身一變變成酒店，設計大多使用對稱形式，白色係好完美嘅顏色(呢個人對對稱嘅Pattern係冇任何抗拒嘅能力)。所有設施望落去都覺得幾新淨。
上圖係由香港公園定行去香港動植物公園嗰條路影返上去，可以見到佢窗戶設計全部都係斜斜地凹咗入去，當有啲房形拉開咗窗簾，又真係幾有設計感。
沿着大堂行過去，有一大條長走廊，旁邊有幾個接待處，前台同事全部都要企響度去招呼客人，感覺都幾攰。張相係夜晚返酒店嘅時候見大堂冇人先影嘅，有日光嘅時候大堂整體光猛好多。
12點左右check-in，拎咗房咭之後就轉返去口位，可以見到26/F Rooftop restaurant Popinjays(人頭自助餐費用$988)、1/F The Arches、UG層有The Tai Pan / Garden Lounge (食早餐、下午茶嘅地方) / The Murray Lawns / Cotton Tree Terrace、LG層口位可以轉入泳池(可惜疫情關係冇開)。
呢一個客拍咭系統，真係激到我扎扎跳。佢嘅玩法係你要張房咭放響下面黑色長方形嘅位置感應，然後再向千分之一秒撳實你所住嘅樓層，而呢一個做法係時得、時唔得㗎⋯⋯每次搭lift，都好似玩緊俄羅斯輪盤咁，嘩佢着燈啊，咦佢又熄番。係呀右手邊都有另一排panel，可惜我哋冇人成功用過另一邊嘅panel可以撳到上樓。
所以當同一部有超過一層樓嘅客人，大家就響度鬥快搶閘，感應位置就得一個，就睇吓部感應到邊一層樓先。然後部開始郁嘅時候，你都仲未禁得着自己嗰層，又不幸地過咗你嘅樓層，就麻煩你返到地下重新再玩過。美利喎⋯⋯
特別係我哋同屋企人仲分開咗唔同樓層，一齊買完野返酒店，唔記得拎杯乳酪，咁就麻煩大家大堂集合，分配好資源，先至再玩一次禁遊戲。
幾經辛苦終於去到自己嘅樓層，房門同佢響出邊望入嚟嘅窗戶設計係一樣，都係斜斜地凹咗入去，充滿隱私感，都係方便偷情用。連同充滿藝術感嘅油畫，其實感覺同K11 Artus([服務式住宅] K11 ARTUS 試住 – 房型篇)有啲似。
入到房，有一個小小嘅玄關，可以俾你除鞋。可惜小寶差唔多反轉間房都未搵到對拖鞋出嚟，所以都係着住波鞋行運晒啲地氈，要我哋兩個去密室逃脫嘅話，就真係死緊。
由右至左，玄關隔離有部超大嘅電視，但好傻仔，小寶話佢設計左一個空間黎擺soundbar，好可惜個空間唔夠深，條soundbar凸咗出嚟。我就話，可能人哋設計師已經有考慮到呢點，條soundbar響個窿入邊，應該發揮唔到佢聲音嘅共振，所以拉出少少應該係有幫助嘅，做人樂觀啲。
電視左邊見到幅油畫，又話左邊就有張單人梳化，最後我哋將啲背囊擺咗係呢張凳度⋯⋯單人沙發隔離就有minibar嘅位置，再過去就有辦公枱，最後將辦公枱都係要來叉電用。
再掃過去，大床擁有另外獨立嘅一扇窗戶，床尾擺咗長梳化。坦白講我有大量時間都係賴死係呢一張長梳化度，沙發前就有張大圓枱，可以放零食嘢飲，前面又有大電視。超有衝動都買返張番屋企，點解可以咁好坐。
大床嘅左手邊有個隱藏式衣櫃，拖鞋原來就係收響入邊，衣櫃左邊有個開放式嘅洗手盆，對面有個日式獨立空間嘅廁所，再入邊就係乾濕分離嘅浴缸同埋花灑位置。面對呢一個空間感咁強嘅沖涼浴缸，我個腦淨係浮現住，啲雲石係追紋㗎，係豪華奢侈嘅享受。
屋企人讚我哋呢一個房型，因為另一隻房型嘅廁所同沖涼位置係分開咗兩邊，去完廁所要穿過大廳先可以去沖涼。
參觀完間房，作為知慳識儉嘅小師奶，梗係第一時間拎起戰利品袋，睇吓有咩可以帶走。由於話晒都係奢華嘅享受，我哋整咗杯低咖啡因嘅咖啡比屋企人飲，又真係好香，雖然我自己唔飲，但好有衝動買咖啡機。
打電話去問一問，原來minibar入邊有部份係免費嘢飲！住咁多次staycation第一次遇到！不過電話入邊嘅職員又答得好奇怪，佢話房間入面一位客人可以拎一罐可樂、一支果汁(蘋果/橙汁)、一支啤酒。我反問返，咦屋企人間房還可以令各兩罐個喎？職員話：係呀冇錯呀，由於你房入邊有兩位客人，所以你可以拎兩罐可樂、兩支果汁、兩支啤酒。中國語文真係博大精深。
除咗咖啡同雪櫃入邊嘅嘢飲，仲有Twinning茶包。熱水壺向左下方，真係收得好隱蔽，住酒店梗係第一時間搵個熱水壺出嚟，煲番兩煲水當清潔，順便去616個企缸同浴缸，咁先放心嘛。
順路去窗邊睇吓風景先，可以見到一大個香港動植物公園，半山嘅豪宅，仲見到以誠哥夫人命名嘅紀念樓。由於有兩邊獨立窗，另一邊窗嘅風景係見到匯豐同舊中銀。響呢一度我要好多謝當年小克嘅漫畫，小克筆下嘅怡和匯豐係我對中環商業大廈嘅啟蒙。雖然有陣時望住商業大廈，有種開工嘅感覺，但係嗰種情意結係揮之不去。
好可惜，美利送嘅免費水，遠望幾靚，近睇見到百歲山。
梳洗用品已經由上至下左自由整齊咁排列好，完全增添左強迫症病患嘅快樂。特別係佢嘅梳，平時去其他酒店都已經唔攞梳架啦，費事浪費，但美利送嘅居然係迷你氣墊梳，即刻放咗落去旅行梳妝袋，有手信耶。
鹼液嘅牌子我唔識，但用嘅時候聞到有啲似Aesop嘅感覺，應該都係啲天然野掛，當係啦。
美利酒店嘅座廁係智能座廁，右手邊灰色嘅係遙控按鈕，有沖洗、風乾嘅功能，廁板嘅溫度略高，小寶話因為屁屁暖咗，咁樣辦事時個人好易凍親。
見大家入晒房，settle得差唔多。就係時候準備自費嘅午餐，下一個行程就會係自費搭纜車上山頂。響等候屋企人落樓(玩/被玩)嘅過程，禁錯左去UG層，見到美利搞咗個小集市，可惜我哋就冇時間去兜個圈。
一離開美利酒店，大約行10分鐘左右就已經到纜車售票處，新春優惠屬牛嘅會有折扣優惠，呃，好可惜無屬牛嘅同行人士。然後唔使點排隊，就可以上纜車等開車。我記得中學嘅時候，係有跟學校旅行團上過山頂凌霄閣，但完全冇搭纜車嘅印象。所以姑且當係第一次搭纜車，所以我咁宅，你話細個Oral究竟要我點樣介紹香港比遊客姐。
纜車比我想像中斜，同澳洲藍山嗰個有啲似，但起碼今次小寶冇sir落街XD (【202002 澳洲樹熊之旅】Day 5.2 – 征服硬核藍山大佬)。纜車嘅票尾可以上埋凌霄閣最頂層，今日天氣唔算太好，比較大風，但好就好在唔係太曬。
明明上到山頂，偏偏要食海入邊嘅食物，去咗阿甘蝦餐廳，成餐怒食蝦，天婦羅蝦、炸蝦、烤蝦，真係好滿足。不過食完真係超口渴。
食飽飽又睇風景睇到攰，行咗陣凌霄閣，留意番山頂嘅Donki係剩係得嘢食，冇得購物架。
中途遇到兩隻外籍小朋友，響度食屎屎雪糕，我同小寶想當年日本直播都有食過，實定定嘅日本屎屎雪糕。然後其中一隻外籍小朋友撞咗落去小寶衫袖度，然後一臉惶恐嘅眼神望住佢，然後我見到小朋友手上嘅屎屎雪糕居然無動於衷，我同小寶仲喺度讚嘆，估唔到屎屎真係咁結實堅硬！抹完小寶衫袖，先發現原來小寶成個衫尾都係雪糕，怪唔之得啱先小朋友一面惶恐啦。好彩因為疫情時期，帶備咗好多濕紙巾出街，呢頭啱先清理完，嗰頭我有見到嗰兩隻外籍小朋友好似火車頭咁，又衝過黎，重點係屎屎未食完。然後再過咗一陣，就見到外籍媽媽拎住一個屎屎雪糕，一手拎住男童，女童拎住另一杯屎屎，火紅火綠咁又衝返轉頭。真係超好笑。
然後行街行到大家都攰，就搭返回程纜車，返番酒店chill一chill。再順便打俾酒店，預約埋大概7pm食in-room dining，人生真係完美。
唔好浪費咗佢個大大白色浴缸。自己帶左sheraton嘅浴鹽，屋企人就去咗Muji買浴鹽。美利嘅浴鹽就留返下次去九龍香格里拉用，向美利用sheraton，向KSL用Murray，真係唔知我哋搞邊科（九龍香格里拉 Welcome Back Offer – 豪華閣）。然後一邊放水浸浴、浸腳，一邊飲住蘋果汁，再開住NHK扮自己去咗日本。爽歪歪。
由於有朋友唔識路由太古廣場行返返酒店，響太古廣場等咗成半個鐘都冇的士。問咗美利前台哥哥，可以穿過香港公園，再行過一棟building，就會到太古廣場。我哋就馬不停蹄咁樣行過太古廣場。
真係超好笑，我哋穿過左香港公園之後，發現係要穿過Island ShangriLa，先至係會最快到達PP。唔通美利嘅protocal，唔俾佢哋講另一間酒店嘅名出嚟？一行入ISL，就聞到香格里拉嘅味道，仲要穿越樓層搭lift，睇埋ISL兩款地氈式樣，當今日黎埋香格里拉添。突然之間發現講到香格里拉嘅地氈係用英文寫星期幾，Kowloon ShangriLa好似係中文嚟㗎，原來過咗海就要講英文㗎啦。
響回程嘅時候，屋企人打嚟，晚餐已經入咗房啦。
The Murray – $3,xxx 包3道菜晚餐、早餐、下午茶 – 晚餐
食飽飽之後就去散吓步，夜晚九點幾鐘遊中環皇后大道中。帶屋企人去下，月租120萬，二十四小時營業嘅中環店，都算係其中一個景點。散步散去中環Donki，買今晚嘅宵夜。
然後再唔好浪費佢個浴缸，又浸下腳，食住宵夜睇天竺鼠車車，人生仲可以有啲乜嘢更圓滿。小寶仲打電話去前台，試吓唔同款式嘅枕頭。
我同小寶講，你睇吓對面半山嘅豪宅，我哋今晚都係瞓喺中環，佢哋咪又係要食玩瞓同痾，其實大家嘅人生都冇乜唔同。一覺瞓醒就年初一啦，準備食美利嘅早餐，順便拜個早年，派下利是、逗吓利是咁。
The Murray – $3,xxx 包3道菜晚餐、早餐、下午茶 – 早餐
然後由於下午茶要等到晏晝三、四點，所以午餐都要諗辦法解決。唔係年初一響中環都唔知道，有九成嘅餐廳響幾日之前已經full Booking，我動用晒一切嘅資源，包括打埋比Amex hotline，除咗貴價嘅餐廳：Popinjays($988 per head)、鏞記燒鵝(擺到明劏遊客嘅價錢)、北京樓(要先比按金)、Madam Fu @大館(食點心嘅地方、大約$120一個炒飯，我覺得可以接受)、蘭桂坊扒房($7xx per head)，基本上周圍都冇晒位。屋企人desperate到話不如上返山頂食。最後我忽發奇想，打俾長江中心樓下嘅Food de parc，原來年初一佢哋會開，太好啦大家唔會餓親。
食完早餐就行吓香港動植物公園，全程我都帶住帽，呢個人真係好驚中雀屎。行完想去超市嘅就去長江，想食麥當勞嘅就去皇后大道中，想散步去Donki嘅就再行遠啲。點知全世界都去咗長江超市XD
唔係講玩笑，估唔到長江居然有賣日本嚟嘅拉麵杯麵，好興奮。打開佢嘅蔬菜包，居然係太空人包裝，然後好在佢唔沾油嘅杯麵蓋上邊有字，我好興奮咁影相先發現入邊仲有一包調味料未拎出嚟。呢個杯麵真係不得了。
然後就係一邊食住杯麵，一邊飲住min bar嘢飲，一邊睇Mayday陪你守歲，在開水浸下腳，實行用盡佢個浴缸，一邊等下午茶。爽歪歪！
The Murray – $3,xxx 包3道菜晚餐、早餐、下午茶 – 下午茶
食飽下午茶，就拎齊戰利品，上車打道回府。唯一唔捨得嘅係美利個浴缸同埋廁所板，食物要來打卡就算啦，唔算驚艷。