上回提要，入住左美輪美奐嘅美利酒店，一覺瞓醒就年初一啦，準備食美利嘅早餐，順便拜個早年，派下利是、逗吓利是咁。
搭lift落去UG層，早餐響Garden Lounge度食，一見到門口隔離就係一堆凍盤同芝士，點解我咁命苦，冇得食⋯⋯嗚。
由於想同屋企人坐附近，但室內位置已經爆滿，所以安排咗我哋坐戶外。又逼人講英文，椅背都比較多雀鳥嘅糞便，could you give me one more table cloth?
對面有兩個商業客傾緊生意，有隻着住新春裝嘅頭髮蓬鬆飄逸嘅小妹妹不停響附近遊走，幾寫意。
同香格里拉豪華閣一樣，採取半自助早餐，又係可以響菜單揀個指定嘅主菜，不過好似冇限數量。所以我揀咗個吞拿魚多士，小寶要咗個咸牛肉炒蛋。轉頭再試過鮑魚粥先。
叫好主菜，就去自助吧遊走，實行睇咗當食咗。
香腸同煎炸野都唔係我杯茶。小寶拎咗啲，我偷試咗一舊燒賣，超咸，美利喎，唔好食。返到埋位，由於係露天坐，朱古力好似俾雀偷飲。希望係比雀偷飲啦，大年初一唔會中雀屎掛。
吞拿魚多士等咗勁耐，食落都冇乜驚喜。薯餅一般般，唔夠九龍香格里拉早餐(九龍香格里拉 Welcome Back Offer – 豪華閣（早餐）)咁驚艷。就算係朱古力，都唔算好飲，可能我總係認住隻雀。反而個杯裝乳酪幾好食。
再encore一個主菜，could you give me one more abalone congee please? 鮑魚仔的確幾好食，可惜忙住周圍拜年，到食嘅時候已經凍咗，但都好味過另外兩款。
食食吓嘅時候見到對面天橋下面有個雕塑，我手快快Capture低兩隻麻雀嘅身形，同雕塑嘅形體動作不謀而合，好搞笑。