上回提要，向美利酒店食完早餐拜完年，又行吓動植物公園。然後返房食過日本杯麵，又浸下腳，終於等到下午茶時段。執好行李，順手退埋房，在施施然行去UG層食下午茶。
今次太好啦，可以坐返響室內，唔使好似今朝早咁同啲雀仔爭嘢食。
說時遲那時快，餐廳就上菜。侍應姐姐話係this is one kind of tea set，我即刻問，即係有多個一款㗎，佢話餐廳有多於一款下午茶餐，但今日係新春，所以全日都係用中式呢一款。
係傳說中嘅打卡三層蛋糕碟，最上面嗰層有scone，個蓋仲可以掛響個雀籠上面，但當侍應姐姐一打開，我見到嗰兩舊綠色scone就有啲唔開胃。師兄姐姐好好咁俾咗另外兩舊，gluten free嘅鬆餅，但係就硬過石頭。配搭三隻醬（奶油、蜂蜜芥末咁上下、士多啤梨果醬，反而最好食嘅係士多啤梨果醬）去食，還可以啦。
中間嗰層係甜點，最底嗰層係鹹點。屋企人食唔慣呢一種氛圍，好多都係食晒鹹點，而可能係食物比較乾身，會配搭食埋個士多啤梨奶酪，然後話啲甜點太甜。而我同小寶就先食晒鹹點，我覺得個鮑魚蛋撻，比今朝個鮑魚粥個鮑魚咸，鹹點都已經凍哂，有種冷飯菜汁嘅感覺。一啲都唔出色。
不過我哋冇浪費，食唔晒嘅全部打包帶走，返到屋企蒸翻熱之後都幾好食㗎。食飽下午茶，就拎齊戰利品，上車打道回府。唯一唔捨得嘅係美利個浴缸同埋廁所板，食物要來打卡就算啦，唔算驚艷。