繼上次港島香格里拉淺嘗過Nadaman灘萬晚餐（自費$350）之後([豪華團] 港島香格里拉 (ISL) – Staycation – 食物篇 (多圖))，再跟公司同事試過商務午餐(Nadaman 灘萬 – 商務午餐 – ミニ(Mini)懷石)，小寶都好想試吓Nadaman，所以藉住我哋今次用Welcome back Offer再次入住九龍香格里拉嘅時候（九龍香格里拉 Welcome Back Offer – 豪華閣 ），就皇恩浩蕩比小寶試吓堂食啦！
果日響九龍香格里拉提早check-in完，就已經12:30。好彩個package upgrade咗豪華閣，加上我哋又早咗到，直接上去豪華閣check-in，姐姐幫我哋打落去Nadaman睇吓有冇walk in 兩位，順手book埋，入房放低行李就可以落去食飯。
由於我哋遲咗book（唔通有錢人食飯全部都需要提早Book枱嘅？自從初一果次響中環搵唔到嘢食之後就有呢個深深嘅頓悟⋯⋯小寶話，所以每個有錢人都需要有秘書），所以我哋坐中庭位置，見到好多早到嘅人已經坐咗響四周嘅沙發位，有啲羨慕，但又咁講，坐喺中庭先至係睇到最多八卦嘢嘅XD
一見到張Menu，就見到個ミニ(Mini)懷石餐，無奶油又唔叫比小寶試吓啦，成$520一個人，一於豪一豪佢。而我就選擇咗一個牛肉香味燒午市定食$338。五使定食有甜品雪糕，一於唔要面地問一問侍應姐姐，睇吓有冇得轉其他甜品。侍應姐姐好好人咁幫我哋諗埋set套餐個甜品係布甸，一於我同小寶交換食甜品就可以啦。點知到最後上嚟嘅布甸居然係焙茶布甸⋯⋯茶味超重。激死人。
同港島Nadaman一樣嘅係，每個人都有呢一個半橢圓嘅托盤，唔同嘅係，餐巾布冇印到Nadaman嘅日文名⋯⋯雖然有啲膚淺，但的確細節位方面有少少失望。
ミニ(Mini)懷石嘅第一道菜: 凍浸日本山菜、紫菜，海帶絲唔知係焗過定係炸過，脆脆的幾好食。
牛肉香味燒嘅前菜：普通沙律，胡麻醬另上，再加一小碗凍煮菠菜
ミニ(Mini)懷石嘅第二道菜：金槍魚、鯛魚蔥卷刺身。鯛魚蔥卷令我同小寶諗起當年響日本食嘅，鯉魚蔥卷刺身XD
ミニ(Mini)懷石嘅第三道菜：自家製豆腐、炸蝦丸、蠶豆、百合片、雞蛋卷、燒竹筍、味增燒日本蓬麩
我唯一試到嘅就係豆腐，豆腐似乎加咗啲牛奶，食落去似奶凍多過豆腐，好正。
牛肉香味燒嘅主菜：好重味嘅甜牛肉，一小碟漬物，麵豉湯。相比起懷石料理，午市定食相對比較失色。真係好可惜，希望我都可以快啲食得返懷石料理。
ミニ(Mini)懷石嘅第四道菜：自家製牛肉馬鈴薯饅頭。因為佢係熟嘅，小寶俾我咬咗半啖，入邊好似有煙人嘅年糕，口感似福袋。
ミニ(Mini)懷石嘅第五道菜：味增醬燒日本豚肉團國主、三文魚照燒。味增醬嘅味道，令我諗起響灣仔食過嘅素食日本料理，當年嘅味增醬係就咁抹響和紙上面，放響爐上面燒，係回憶嘅味道。
ミニ(Mini)懷石嘅第六道菜：櫻花釜飯、泡菜及麵豉湯。小寶話呢一個飯一般般。唯一特別嘅係懷石嘅麵豉湯係用紅味增，而我既午市定食嘅麵豉湯係用白味增，一比較之下，我個人覺得紅味增又種烤燶嘅感覺，白味增相對易入口啲。
午市定食嘅甜品雪糕可以揀朱古力、雲呢拿、豆腐、芝麻，仲有一款唔記得咗。侍應姐姐已經自動波走去問小寶食咩味XD
ミニ(Mini)懷石嘅第七道菜：焙茶布甸。茶味超濃，畢到落底仲會畢到紅豆，仍然都係有宇治金時嘅感覺⋯⋯我真係超討厭綠茶。
整體而言，呢一餐懷石料理嘅感覺，好似唔及港島香格里拉入邊嘅Nadaman咁精致。唔，唔通過咗海就真係唔同啲嘅。食飽飽，居然Hea到差唔多三點，先至施施然上番房。