上回提到，住九龍香格里拉柴房冇海睇(九龍香格里拉 Welcome Back Offer – 豪華閣 （房型）)，就快手快腳入豪華閣享受Horizon Club privileges。
下午茶 2pm-5:30pm
一嚟就嗌杯嘢飲先，咖啡或茶。我問姐姐有冇啲無咖啡因嘅嘢飲㗎，姐姐答，薄荷茶都冇咖啡因㗎，雖然我內心好討厭薄荷，但人哋咁誠意拳拳⋯⋯我再問，咁有冇cranberry juice，要走冰嘅。佢話連菠蘿汁都有。豪華閣真係豪華閣，只要夠膽，沒有不可能。最多佢都係答你「sorry，我哋冇」。No harm, no loss.
Chill Chill。啱啱先食完Nadaman （Nadaman 灘萬 (九龍) – 商務午餐 – ミニ(Mini)懷石 (第二彈)），都未夠半個鐘就嚟high tea，真係養豬嘅人生。
見到下午茶餐，有三款唔同嘅迷你漢堡，好似有蕃茄芝士、煙三文魚、同埋有brie cheese（係一隻好軟滑嘅芝士）。可惜我三種都唔食得⋯⋯好可惜。
左手邊係房間入面送嘅香格里拉版兩款曲奇，貪心嘅我房嗰啲都未食晒，又走去攞人兩塊。咁啱我影相嘅時候附近冇人，影完先發現全部野都未fill，我一影完相佢就fill到滿滿。所以現場睇，甜品部冇咁孤單嘅。
啱啱先食飽，仍然食得落兩件cake。食飽飽就出街行吓、消化下，今晚返嚟再試雞尾酒時段。
雞尾酒時段 6pm-8pm
行Donki行到有啲忘我，7pm先衝到返酒店，快快趣入房擺低戰利品，又衝過黎豪華閣食嘢先。
雞尾酒時段酒精free flow，包捨prosecco、sparkling wine，但唔包括香檳。可惜我哋兩個都唔係太好酒。比起下午茶，食物種類多咗好多。仍然都係好可惜成排凍盤，芝士沙律，我都唔敢食。真係有啲炆憎。
所以見到甜品就唔理啦，白糖糕同蛋糕各自黎一舊。
熟食方面，真係好嬲點解個壽司入邊有煙三文魚，我唔介意你淨係比青瓜我囉。好在個雜菜酥係熟嘅，然後食落有啲似Pizza嘅餡料，好食。春卷我都拎咗條，雖然脆但係太油，唔好食。再去攞曲奇，喪心病狂嘅女人。
雞尾酒時段喎，我首先叫咗杯朱古力，飲咗大半杯，但係佢隻朱古力係屬於外國旅館會送、即沖嗰種、唔好飲嘅朱古力。之後再叫番杯檸水就算。小寶鼓起勇氣問佢有冇rosé，可惜只係得prosecco、sparkling wine，叫咗杯prosecco望吓海，感受一下上流社會嘅氛圍，然後就乖乖返柴房。
敬香格里拉。