上回提到，住九龍香格里拉upgrade左Horizon Club privileges，所以可以入豪華閣食下午茶、雞尾酒、早餐。第一日已經問咗豪華閣嘅侍應，如果早餐時段滿咗就要落樓下Cafe kool，所以已經問定佢幾點鐘係冇咁繁忙。特登為咗要食豪華閣嘅早餐，7:30就起身，真係去旅行都冇咁早。
8:00準時到咗豪華閣打卡，我嘅牛扒，我嚟咗啦！點知現場都唔係好多人咋嘛，又俾人呃咗，由於我哋真係好早到，侍應哥哥將我哋帶到海景最闊落、最獨立嘅一個窗邊，總算不枉我哋咁早起身。由於陽光真係有啲耀眼，哥哥Offer我哋不如拉部份紗窗簾，仲有好大個海可以睇到呀。聽落其實有啲似氹小朋友，諗落都覺得有啲搞笑。
講笑咩，我期待咗咁耐，唔使睇Menu 㗎啦，牛扒啊唔該。小寶要咗個西京燒三文魚。哥哥問我要食咩蛋，我個腦一時轉唔嚟，「我要食熟嘅蛋，即係反轉都要熟嘅」。小寶問係咪荷包蛋，荷包蛋中間係生㗎嘛。我再同哥哥講，唔係太陽蛋、唔係炒蛋。哥哥話：哦，你要食熟蛋。係呀係呀。
食住海景先，消毒下隻手，出去拎嘢食。
食物種類比雞尾酒時段更豐富，我首先拎咗兩個水果酥。
一整排沙律芝士凍盤，都係唔食得，都仍然拎咗個凍嘅乳酪。
熟食方面拎咗粒燒賣，唔錯，冇美利酒店粒燒賣咁咸。炒麵、腸仔永遠都唔係我會拎嘅嘢。
繼續食景，叫左mocha同檸水。
我既七成牛扒終於嚟咗啦，真係唔知香格里拉係用乜嘢牛去製成呢塊牛扒，明明係薄切，但係切落去仍然都係Juicy有牛肉嘅香味、牛油嘅香氣，真係冇得輸。如果唔係間房仲有個蛋糕等緊我，應該要encore多一份。但估唔到，今朝個薯餅都好精彩，脆得黎一啲都唔油膩。精彩！
小寶嘅西京燒三文魚就有啲失色，有三文魚嘅魚香，但冇驚喜。可能要返鱈魚會滑溜好多。Anyway，人生冇理由永遠都咁圓滿嘅。