繼上次港島香格里拉淺嘗過Nadaman灘萬晚餐（自費$350）之後，咁啱同事聚餐有機會再次嚟到Nadaman，就可以試一試佢個商務午餐！由着住和服嘅資深侍應姐姐，帶領我哋入到去一個同其他枱有間隔嘅小包廂。
響厚厚嘅Menu入邊，望住價錢，我咩都揀唔落手，最後都係跟同事叫咗一個「ミニ(Mini)懷石」套餐！耶！侍應姐姐問我要揀牛定魚，仲洗問嘅梗係揀牛着數啲啦⋯⋯侍應姐姐仲好心提醒，本身個餐都有好多魚架啦，揀牛正d。
餐巾上面有Nadaman嘅日文名
話咁快前菜就上咗，嘩，成間草屋，我仲以為係張牙籤嘅添。打開草屋，入面有日本菇、蝦、同埋一粒杞子。右上角有一對講唔出名嘅野菜，勾咗欠，幾好味。左上角有兩舊肥美嘅海膽，上邊配上新鮮磨嘅山葵，好鮮甜，下面有一舊謎團米糕，味道唔係好食得慣。中間係為咗提升飲食氣氛嘅（應該係）樹葉，有同事個餐上面係紅葉嚟㗎，仲附送紅色嘅果子，可惜同事唔肯試吓食唔食得⋯⋯
第二道菜係疑似茶碗蒸，一打開個蓋，蟹味撲鼻而來。原來浮面嘅有蟹肉、瓜粒、瑤柱、混合響企身嘅羹入面，一畢落去，底部有撈左蟹膏而製成嘅蛋漿，又或者話撈左蛋漿嘅蟹膏，濃郁度會嚇你一跳。當其時心諗，如果叫咗呢一個餐嘅人，本身唔食蟹，咁點算？天馬行空嘅想法。
第三道菜係刺身，有兩隻鮮甜嘅甜蝦、兩片深紅色嘅吞拿魚（赤身？）、兩片疑似油甘魚（呢個人識食唔識辨別魚嘅品種），仲有鮮磨嘅秋葵，真係憑秋葵嘅味道就可以知道日本餐廳嘅質素。
第四道菜係魚壽司，我個人覺得有啲失色，雖然佢終於俾咗紅葉我⋯⋯侍應姐姐會教，用筷子夾起魚肉連飯，用紫菜包住一齊食，壽司已經調咗味，唔需要額外加豉油。可能我都唔係好好有皮嘅魚刺身壽司，一般般。食完一舊，試吓食啖薑嚟沖淡下口腔嘅味道，點知辣到我往生，努力食埋剩低嗰舊，感覺都係一般般。
第五道菜係熟魚塊，侍應姐姐果然冇呃我，就算唔揀魚，個餐都已經有好多魚。共有兩塊魚肉，應該係唔同部位，一舊林啲、一舊結實啲，上面嘅蔥絲同檸檬皮有驚喜，旁邊嘅椰菜同花形紅蘿蔔都幾吸引。斷估唔到最底用嚟薦底嘅蘿蔔先係最大嘅驚喜，廚師將大根切成圓柱體之後，仲好細心地幫上面嘅邊緣位置批邊，雖然蘿蔔嘅量會少咗（師奶化），但感覺到料理過程嘅用心。
第六道菜係牛肉，唯一牛同魚嘅迷你懷石嘅分別。上面一條係爆米花，真係用米爆出黎嘅，唔係用粟米。侍應姐姐教我地剝開個殼就可以食，食咗幾粒無味嘅米粒，唔，好睇唔好食。隔離有一條烤過嘅疑似豆角、同埋蔥絲。由於前後得兩舊牛卷，要慳住黎食，一夾起其中一舊牛卷，就聞到和牛嘅味道，一入口發現黃牛片包裹煮牛蒡，即是唔會比黃牛嘅柔美搶走注意，維持清爽感覺。懷着感恩嘅心，食埋剩低嗰舊。
第七道菜係蒸飯，懷石料理果然係食食具，所以要俾個close up個飯盒蓋。有雞肉同香菇嘅蒸飯、漬物、麵豉湯，蒸飯用嘅係糯米，每筷子夾落去拎上嚟都係黏黏der，食食吓仲發現碗底係有氣孔，真．隔水蒸飯。
最後一道係焦糖燉蛋加雲呢拿雪糕球，呢個比起各大自助餐嘅焦糖燉蛋簡直天淵之別，係人生目前食過最好食嘅一次，沒有其中之一。蛋入邊加咗雲呢拿黑子，但唔會太膩，碟身較薄，可能用嘅糖都係靚糖，烤出嚟嘅焦糖好香，再加埋用咗嘅雲呢拿雪糕，太太太creamy！
始終係貴價餐廳，餐具嘅清潔度非常高，餐具唔識亦係日本嘅感覺，除咗上菜時間有啲慢，有較長嘅午飯時間嘅各位，都可以去試一試。