[離岸戶口] Barclays – 5. 開立手機銀行、網上銀行

新嘅一年一月頭，終於完美成功開到Barclays離岸戶口嘅Mobile Banking同Online Banking啦！灑花！UK疫情嚴峻，外國人做嘢手腳好慢，搞到個銀行戶口開到跨埋年先至搞得掂，仲要到我哋真係開到Mobile Banking之後先知，原來個戶口俾銀行取消咗一次，然後再重新開過⋯⋯真係一波三折。

經歷過2021年12月1號嗰個電話會議之後（電話內容收錄於[離岸戶口] Barclays – 4. 開戶篇 (成功)），12月尾嘅時候，屋企一次過收到一大堆Barclays嘅信件，我心諗，一係開到、一係開唔到嘅啫，你寄咁多封信比我，做乜嘢啫。經驗之談原來要玩贏呢個遊戲首先係要開咗Mobile Banking先至到Online Banking既，以下就等我娓娓道來(多圖)。

更新：2022年3月，收到Barclays電郵，話要提升最低存款額，GBP100,000(或等值貨幣)(~HKD1,024,000)，meet唔到就要比GBP40(~HKD411)月費。RM服務仲要GBP250000(~HKD2,560,000)先會提供。我估應該都真係幾多香港人去申請， 所以佢哋要cut客去維持返佢服務質素。唔緊要啦，我哋係窮架啦，所以做左幾日功課，睇下要點轉窮人離岸戶口。

打開晒所有信件，將佢跟返時間次序排列好⋯⋯

1. 有一封信係寫11月，上面話，你本身冇Current Account，所以你係開唔到網上銀行㗎。這是什麼鬼⋯⋯
2. 上次電話會議話，因為佢系統故障，所以唔能夠用電話快速開立Online Banking⋯⋯所以會用郵寄寄一個五位數字嘅密碼俾我，咁我搵到封信上面有個五個位嘅密碼，係咪好自然認為你有封信就係我要等嘅嘢先！
3. 但同時我又收到一張新嘅銀行咭，我同小寶仲喺度估緊，唔通每個戶口(Savings/Current)都會有一張銀行咭，咁特別？！
4. 同時，配搭呢一張新嘅銀行咭，又有一封有四位數字嘅密碼嘅信件⋯⋯
5. 仲有一部鬼死咁大部嘅銀行機仔（PINSentry）

仲要上述嘅第二、三、四點，全部都一式兩份，因為個戶口係聯名嘅⋯⋯適逢英國lockdown呀嘛，以上全部信件連埋機仔，全部比消毒噴霧浸泡過幾轉，直情見到個信封係寫住英國我都起勢咁噴佢。

好啦，整合完收到嘅信件啦，梗係唔係就咁坐喺度啦。既然上次個電話佢話五位數字嘅密碼係要黎開Online Banking嘅，咁我梗係去返上次個快速登記(Instant)網上銀行戶口嘅網址，附近，再搵吓點樣註冊啦。點知去到填資料嘅時候，就發現香港係冇post code嘅，（我仲試過六個零，但都係唔得），但係你要登記一個網上銀行戶口就一定要填啱post code⋯⋯Ma der，此路不通添。

手機銀行 Mobile Banking

山不轉路轉，咁不如試吓download Mobile Banking先啦。聰明嘅我，梗係上網搵教學先啦（https://www.barclays.co.uk/help/mobile-banking/registration/how-to/）。睇完呢條片，先發現人哋嘅教學做得有幾咁好。我同小寶開始對呢間銀行改觀，勁興奮咁一齊註冊手機帳戶，在一邊讚嘆人哋有幾高科技。由於第一次試係試驗性質，都唔知成唔成功，所以就冇影到蘋果電話嘅相，所以以下嘅圖片係來自小寶嘅安塔電話。

第一步係要download一個啱嘅軟件。而家間間銀行都出10萬個App，我諗除咗軟件開發商工程師，應該都冇人知究竟邊個軟件分別有啲乜嘢功能。響蘋果商店一搜尋Barclays，都出咗幾個app，好在我哋有睇教學，根據教學嘅圖片看圖識字地下載咗一個啱嘅軟件，咁就踏出左成功嘅第一步。

然後成功嘅第二步，佢會叫你輸入手機帳戶嘅五位數密碼，冷靜啲，唔係寄過嚟嗰封信上面5digits嘅密碼，而係一個自設嘅、手機專用嘅私人密碼。我好似就係呢一個步驟開始，就要攞個小本子去記低，每一個位置需要嘅密碼要有幾多位數字，呢間銀行究竟要我設定幾多個密碼⋯⋯

然後就係Standard嘅T&C，然後佢會問你有冇收到activation code，又黎？！好彩佢有得答：無。

然後你會發現，啲問題都幾難答，但我全部錯有錯着，唔識答就揀Default嗰個，唔使揀我就禁continue。

你有冇用過我哋嘅軟件呀，無。可唔可以拍你張銀行咭，呃，我有兩張喎，想點先。

實行大無謂精神，我哋用咗舊嗰張卡，試咗先。拍卡啲咁高科技嘅嘢，我哋就唔好玩啦。乖乖地入張銀行咭上面嘅16位數字，入完之後佢同我哋講「冇呢個戶口」⋯⋯啱啱少少對呢間銀行改觀左嘅印象，隨着內心嘅粗口，好感下降中。好有手尾地，即刻拎返張黃色post-it出嚟，貼翻落舊嗰張銀行卡度寫住「唔知點解冇呢個戶口」。

唔緊要我哋每個人都仲有第二張銀行咭！新收到、浸泡過消毒噴霧嗰張。一入完16位數字之後，就出到下一版啦！果一下，我哋兩個一齊尖叫咗出嚟，而家諗返真係唔知個成功感來自邊度⋯⋯咁然後就乖乖地入自己嘅電話號碼，我第一次入嘅時候仲冇寫+852，後尾望住個數字鍵盤，冇奶油佢突然之間俾個+號我禁嘅，然後先再入返+852。

媽媽呀，我哋成功咗啦！佢問我哋有冇PINsentry部機仔，有啊有啊！我哋有收到啊！好興奮呀！媽媽呀！

然後佢圖文並茂咁教我哋，點樣將張銀行咭插落去部機仔度讀咭。哇！香港啲銀行機仔都冇咁高科技（見識少）！好高科技！

見到句」We’re almost done!」，真係有一鶴眼淚嘅感覺。

然後下一版佢又將我哋重重地掟落深淵，係麻煩你又選擇一個有意義嘅字或詞，只會記錄響你電話入邊，等你開呢一個Apps嘅時候先至會見到呢一句字詞，咁就唔會去錯咗其他虛構嘅銀行軟件。

使用者安全方面呢，其實佢做得好足嘅，但係望住我小本子上面嘅會員號碼、四位數字銀行咭密碼、五位數字電話密碼、五位數字電話安全密碼、仲要加多個有意義嘅字詞⋯⋯Ma der。

在輸入一次電話安全密碼，就終於可以成功登入到冇包Banking，灑花！

MORE > Statements and documents > Skip > Get started > upload later > 「然後喺呢一版發現到有一份statement係應該已寄出，但我哋冇收到」然後響呢一份 「OLB Welcome letter」 入邊就可以搵到你嘅會員號碼 （membership no.）。

亦都係響呢度入邊我哋見到第一張銀行咭，原來響12月嘅時候比銀行取消咗，所以小寶就估應該係響上一個電話通話（又或者再上一個啦），銀行發現個戶口有啲異常，所以出咗11月果封話「冇Current Account所以開唔到Online Banking」嘅信件。然後有人取消個戶口，就重新幫我再開過囉。OK OK咁將黃色post-it上邊就可以寫返，戶口已取消。

網上銀行 Online Banking

然後就到開立網上銀行啦，好簡單！佢以下呢條連結（https://ciiom.barclays.com/digital-services/online-banking/）

直接用會員號碼，去登入網上銀行，然後再配合PINsentry機仔，咁就唔使入post code啦，好野！然後喺兩個月內，匯錢過去，咁先至真正完結。

成篇教學非常虎頭蛇尾⋯⋯咁，間銀行係要搞到咁呀嘛，好地地正正常常咁開個戶口唔得嘅，係要搞到咁死複雜。正因為佢搞到咁死複雜，我哋都成功開立到手機銀行同網上銀行，嗰種成功感真係歷經千辛萬苦架。