事情發生響2019年5月，當其時啱啱裸辭，所以日日喺屋企好得閒，再唔係就出去行吓街試婚紗，其實都幾忙。果然世事嘅嘢就係響你最得意快活嘅時候，就會有啲預期之外嘅事發生，我嘅人生果然一啲都唔會沉悶。
然後發現，東亞信用卡被盜用！
2019年5月15號，凌晨五點幾收到SMS短訊，東亞信用卡有人響Amazon碌咗USD39.99 (~HKD320)。我即刻問小寶係咪你又響Amazon亂買嘢，仲要偷我張卡用，仲要唔瞓覺凌晨五點幾走去上網買嘢，真係激死我。
然後再check返財務紀錄（係呀又係我個Excel表，真係好重要），都唔似有任何自動轉賬或者事前購物過數嘅transaction，行動派嘅我果斷地打俾東亞熱線3608 6628(#13)。
終於有機會打報失卡專線（都不失為解鎖咗其中一個人生成就⋯⋯），熱線姐姐話好大可能有人嘗試去hack張卡，處理方法為即時cut咗而家張信用卡重新開過一張新信用卡號碼嘅信用卡，大約要等六個星期(WTF)。同時，東亞信用卡嘅附屬咭將不受影響，仍然可以繼續使用同埋維持原先舊有嘅號碼。
熱線姐姐話唔需要擔心，八達通嘅自動增值功能會自動轉移去新嘅信用卡，但其餘普通零售分期費用就需要自行聯絡商戶作更改。
而最勁嘅係本身張東亞信用卡主卡係掛咗響Apple Pay度，我仍然仲打緊呢一個東亞cut卡電話嘅過程中，Apple Pay直接移除左呢一張信用卡。我諗應該係東亞姐姐一撳咗cut卡步驟，Apple Pay就收到風。蘋果果然係蘋果！Apple果然係Genius！抵讚！
延伸閱讀：