要行過去JW Cafe，一路以來淨係識得響Pacific Place (PP)搭lift去港島香格里拉(Islands Shangri-La, ISL)，然後行上去朝聖Lobster Bar，再行去港香大堂，再行過對面JW Marriott。然後一行呢一條路，就諗起早排先至啱啱嚟過ISL玩Staycation，即視感很強。但係我哋今日嘅目標係JW Cafe。GOGOGO！
傳送門: [豪華團] 港島香格里拉 (ISL) – Staycation – 酒店篇
仲記得第一份工嘅時候，第一次由大人帶去JW Marriott見識世面。第一次行入經PP行過去JW Marriott。先知道酒店自助餐JW Cafe，原來有成塊面咁大隻嘅麵包蟹，蟹蓋連蟹身蟹肉（開邊所以唔驚食唔晒）可以拎黎食，再知道原來酒店自助餐可以夾好多好多花膠塞入口（仲要提返自己嘅運勢，當年係可以響花膠盆入邊夾起一大條膠紙嘅運氣者）。
點會估到好多年後嘅今日，自己居然有兩間集團嘅翡翠會籍(Shangri-La)/金會籍(Marriott)，可以遊走於呢區而不失禮，全部都要多謝細頭嘅賞賜，直頭就係寫實嘅broaden our horizons。
傳送門: Amex Platinum Card 美國運通白金卡(細頭) – 那些年我食盡的優惠
然後我一邊諗，一邊行錯路去咗ISL嘅自助餐Cafe Too⋯⋯一班死傻仔⋯⋯唯有等人帶路行返出PP，一邊出口直達JW，在搭lift上JW Cafe⋯⋯蝕咗好多食嘢嘅時間。
嘩明明係星期一，我哋仲以為可能可以包場，應該冇乜人敢食自助餐。點知現場人山人海，一離開張枱就口罩不離臉。人太多，唔係太敢食生冷野。一坐低就即刻起翻身去排片皮鴨。由於今日lunch時間有限，初步部署係要用最少覆桌次數，食最多嘅嘢。
第一回合
一去到等片皮鴨嘅時候，就望到今日水晶雞唔錯，排到自己即刻夾隻細雞髀先，啱啱出爐左一盤新嘅乳鴿，即刻又夾返隻髀先，感覺有少少柴皮，希望舊肉夠大夠中間係幼嫩嘅。
終於排到片皮鴨，啱啱好佢用晒啲鴨肉，要重新切一舊大嘅再慢慢切成細份，好樂觀地諗「唔緊要啦，咁咪新鮮啲Juicy啲囉」。點知今日女廚師非常豪邁，響拎粉皮嘅時候就已經整穿咗，我唔敢出聲，到佢放京蔥落去陪隻鴨嘅時候，京蔥無情地篤穿粉皮，然後拎起第二舊嘅時候，直頭摩西分紅海咁分開咗第二塊塊粉皮⋯⋯我內心笑咗，然後！佢再打開蒸籠再拎多兩塊粉皮，同我再包裹着我嗰兩份片皮鴨⋯⋯Are you serious?但係我算數，因為唔想再排多次，亦都唔想浪費個胃嘅空間，當賺多兩塊粉皮。
然後再行到去花膠區域，夾咗三塊，因為驚太頂胃所以收咗手。今日蒸龍躉望落都唔錯，又夾一舊。蝦碌夠大隻，食兩舊。蒜香蒸大蝦剩返兩隻，孤伶伶訓響蒸籠，等我拯救其中一隻。第一回合完場。
食評：
片皮鴨由於有兩層皮，反而冇咁油膩，錯有錯着衰鬼。
白切雞唔錯，有骨膠原啫喱。
同預期一樣乳鴿烤得乾身左，好在我揀咗舊肉夠厚，幾有咬口。
蝦碌同預期一樣爽甜脆口。
開邊蒜蓉蝦，夠香口。不過公司聚會一定要提早食，等後面嘅嘢食蓋過蒜香味，如果唔係下午就慘啦。不過而家有口罩，應該唔會臭到其他人。
第二回合
由於缺乏左生冷野嘅滋潤，但係又好記掛JW Cafe嘅大蟹殼，所以忍唔住攞咗半隻蟹殼，淨係食咗入面嘅蟹膏。根據早前買蟹嘅經驗，實定定嘅蟹黃咁嘅蟹膏，應該係蟹乸嚟㗎。
同事強烈推薦冷盤嘅醉雞，既然唔敢食煙三文魚同刺身，唯有會一會佢個醉雞，呢個女人真係唔夠定性。行過見到蕃茄水牛芝士，又忍唔住cap左一舊。
都係行返去熱食嘅地方安全啲，相對冇咁多誘惑。仲記得上次響Mandarin Oriental (MO) Clipper Lounge，食過牛腩一般嘅牛扒。今日嚟試吓JW Cafe嘅大嚿牛扒肉，再拎埋少少芥末，如果舊肉好味就應該唔使用到。隔離啱啱開咗一盤迷迭香三文魚，麻煩比一小塊我呀唔該。
傳送門：Mandarin Oriental’s Clipper Lounge – Lunch buffet
食評：
水牛芝士番茄，唔夠元朗間德國佬咁香，不過自助餐食舊蕃茄，的確有助下一回合。
牛扒冇驚喜，算係大路自助餐牛扒，都係MO好食。
醉雞都有骨膠原啫喱，酒香唔算濃，容易入口。
蟹黃唔多，但夠香口，淺嘗足已。
三文魚柔嫩、油香，值得一讚，但可能因為食得太多，魚油有啲想遊翻上食道，唔建議最後先食。
第三回合
冇影到相，畢左兩碗湯。一碗係佛手瓜定係合掌瓜煲乳鴿，味道怪怪的，唔算甜，似一般屋企煲嘅湯。另一碗係煲豬展，超甜，有藥膳雞腳嘅味道，直頭想encore。
然後年紀大咗唔想食一杯杯嘅雪糕，淨係夾咗黑森林蛋糕、葡撻、Cream Brulee。問咗現場燒緊Cream Brulee嘅姐姐，佢話好耐都冇現場整新鮮蛋捲，枉我仲期待咗咁耐⋯⋯Cream Brulee層焦糖幾厚，但本身內容唔夠Nadaman個懷石料理飯後甜品咁好食。
傳送門：Nadaman
回憶總是美好的，當年佢一出蛋捲嘅時候，大家都動物衝出去拎，等我第二回合想encore嘅時候，好辛苦排到，點知佢出嘅係綠茶味蛋捲⋯⋯由於係我最討厭嘅綠茶味，果斷放棄。點知多年後嘅今日，蛋捲已經不復存在。
再加一杯平平無奇嘅熱檸水，同MO唔同，佢連熱水壺都欠奉，3-4片檸檬，熱水一杯，飲完就冇。Anyway，少少熱檸水要黎解油膩姐。飽到連生果都食唔落。
傳送門：Mandarin Oriental’s Clipper Lounge – Lunch buffet
仍然都係一樣啦，疫症期間佢比多左個長方形餐盤放餐具，但仍然刀叉都有污跡，所以用之前都係要自己清潔。安全至上。
