有幸跟隨同事去Mandarin Oriental (「MO」, 文華東方) 嘅Clipper Lounge (快船廊)，爽歪歪。由於都要同大家姐social，所以相唔算多。
Clipper Lounge坐落於MO閣樓，由地下上咗一層，如果唔係見到餐枱，都唔知道餐廳入口。其實坐門口嗰幾台，都幾尷尬。好在我哋一班人坐響自助食物附近，或者仲係疫症時期，所以肉眼可見餐廳現場係坐唔滿既。
食物類–冷盤數目仍然好多
煙三文魚、火腿都有幾種，仲有眾多芝士ｓ。
凍食熟海鮮有肥美大海蝦、青口、長蟹腳、龍蝦鉗、麵包蟹 – 係掛⋯⋯總之成隻手掌咁大隻，唔係剩係得蟹殼架，仲有個蟹身。基本上攞一隻就已經回本完場，可惜我冇咁嘅勇氣，向大家姐面前拆蟹獻醜⋯⋯
但我覺得我handle到一隻龍蝦鉗！由於有私家鉸剪，我成個蟹鉗剪到碎片一樣，點知原來蟹鉗尖端係唔好食嘅⋯⋯蟹腳條肉都好肥美結實鮮甜，諗起都肚餓⋯⋯
刺身係有象拔蚌、甜蝦、吞拿魚同三文魚（三文魚銷量奇差）- 甜蝦好甜；吞拿魚肉質甜美，好似大拖中拖咁有油香，雖然我total食咗六舊，有感再食落去真係會飽，所以果斷收手。
有朋友曾經講過食自助餐一開始要飲一碗中湯去洗開條腸XD。我搵到個西湯係南瓜湯，企身到我懷疑飲完已經半飽。隔離果煲唔通係中湯？成煲碗仔翅肉羹咁嘅⋯⋯個名叫西湖牛肉羹⋯⋯我畢左三啖，希望佢唔好咁杰身啦。點知我一拎返埋位再轉過身去攞多碟吞拿魚做小食，再返埋位，個湯就俾人收走咗⋯⋯係呢佢都覺得似廚餘呢⋯⋯
點知響我第三round進攻之前，居然有人問牛扒要幾成熟（！）那尼！7成呀唔該～等待牛扒嚟嘅過程好忐忑，究竟可以用咩填肚又唔會嘥咗舊牛扒呢⋯⋯繼續去食甜蝦同青口先。
相關閱讀推薦：[服務式住宅] K11 ARTUS 試住 – 食物篇
當牛扒上枱之際，啱先食完一整隻蟹蓋連蟹身嘅大家姐，就嗌投降，話如果係牛扒可以嚟先就唔會嘥咗牛XD 但呢塊牛扒不得了，唔同102/F Lounge & Bar嘅油香牛扒，呢一塊嘅柔嫩程度等同於牛腩！雖然我都食咗好多冷盤，呢舊牛都仍然令我好enjoy！我係全台人之中唯一食到最後一啖！其他人食一半就已經器械投降，真浪費。但隔離嗰舊類似窩窩頭嘅物體，真係好難食，又乾又鞋⋯⋯
再嚟多個自製甜品，講真蛋糕仔、芝士撻又唔係響隔離MO cake shop攞過嚟嘅，唔算吸引，只係用嚟謀殺菲林（記憶體？）。仲記得有兩個唔同味嘅麵包布甸，好多客人都係打開個蓋望一眼，然後冚番埋，真係一啲都唔吸引。我只係攞咗一個提拉米蘇，加幾舊生果就完咗呢一餐。
響食緊甜品中途，發現隔離有啲枱其實食緊fine dine，定係叫set lunch？應該會平過lunch buffet。
餐具類–器皿有污跡
食得自助餐都唔得閒睇佢嘅裝潢，重視嘅就係拎食物用嘅碗碟。好可惜，每次要拎食物之前都需要細心檢驗過碗碟，粗略估計大約有四成都係有污跡，連隻叉上邊都好似有食物嘅痕跡抹唔乾淨，好彩濕紙巾都有得供應，唔通真係好似酒樓咁問佢攞杯熱水黎浸刀叉咩⋯⋯MO黎講，餐具嘅整潔度差左啲喎⋯⋯
值得一讚，可能係因為疫情期間，每人有一把剪蟹嘅鉸剪，唔使同人share用。
進食途中，收碗碟嘅速度奇快，連我碗啱攞返嚟嘅湯都唔見咗。有同事進食嘅次序奇葩，食刺身、熟食、甜品、蟹蓋，點知響甜品嘅過程俾人收走咗拆蟹㗎撐，非常不滿XD。可能侍應聽到佢嘅不滿，響佢一拎咗蟹腳返位之後，用咗2秒時間就擺番好全新一套拆蟹㗎撐俾佢⋯⋯其實佢都好努力㗎喇，俾啲掌聲佢。（拍手）
黎個最後嘅飲品檸檬水去解肥膩。有塊餅乾響隔離好可愛。熱水壺有布包住，放低嘅時候亦都冇半島咁冇禮貌～加分！
在線相關閱讀：
Mandarin Oriental’s Clipper Lounge – Lunch buffet
JW Marriott’s JW cafe – Lunch buffet
Shang Palace 香宮 @九龍香格里拉(KSL) – 晚餐
Nadaman 灘萬 – 商務午餐 – ミニ(Mini)懷石
Nadaman 灘萬 (九龍) – 商務午餐 – ミニ(Mini)懷石 (第二彈)
Marriott’s Sunset Grill – Executive Lunch
[豪華團] 九龍香格里拉兩日一夜 Staycation Offer
[豪華團] 九龍香格里拉兩日一夜 Staycation Offer – 配合Golden Circle 翡翠級會員Jade member
[豪華團] 九龍香格里拉兩日一夜 Staycation Offer – 港幣$1,000 Hotel Credit
[豪華團] 港島香格里拉 (ISL) – Staycation之烏龍訂房事件
[豪華團] 港島香格里拉 (ISL) – Staycation – 食物篇 (多圖)
[豪華團] 港島香格里拉 (ISL) – Staycation – 酒店篇 (多圖)