一出糧，又到一個月一度嘅財務大計（其實就係做打字員入數嘅時間）。首先就係（1）上各大銀行e-banking下載返該月嘅月結單，管理好唔同銀行嘅月結單同信用卡交易紀錄，（2）將每一條transaction，包括銀碼、交易日期、簡單description放入去一個整合左嘅Excel表，咁自不然所有支出使費一目了然！
我仲順手將個Excel表做埋罐仔（Excel表式樣：[理財類] 老生常談之節流篇），出完糧就要將必要嘅使費轉返落相應嘅罐仔，剩低嘅錢先好洗，實行應洗得洗⋯⋯仲有是因為人嘅惰性，明知用完錢要入Excel，就會諗一諗究竟自己係咪真係需要呢一個花費⋯⋯
你話其實我每個月都有睇信用卡月結單，又冇唔見張信用卡，咁點解有需要咁樣整合呢？因為你唔寫晒出嚟，咁就好容易會漏咗銀行收嘅唔起眼嘅收費（例如：紙張月結單、年費；見到就即刻打電話去要求豁免啦）。同時又可以重新回望一次，過去一個月使用信用卡嘅習慣，同埋睇返自己買過嘅嘢銀碼嘅大細，都係一種對自己財務計劃嘅一種刺激回顧。
咁當全部數目都已經清清楚楚，有冇後悔過去一個月買過嘅嘢呢？咁跟住我哋落嚟就要安排找數啦！財散人安樂！
（1）
舉例，我會將每一張嘅信用卡順序排列好。然後去下載東亞月結單、Amex月結單、渣打亞洲萬里通月結單，逐條transaction入數落Excel表，如果係幫人交嘅數就轉顏色去收數。
（2）
然後找數環節就開恒生網上銀行，利用「恒生信用卡」去繳交「東亞World Master」、「Amex CX card (大細頭都可以用一張卡找晒數，打熱線就幫到你)」、「渣打AM」卡數。爽呀，三張卡數已經找咗，又唔使現兜兜即刻找恒生數，下個月見。
你可能話，卡冚卡，會唔會利搭利㗎。咁你平時碌卡，都係下個月先找數姐，恒生信用卡都係今個月先至落呢條卡數咋嘛。So far我玩左都幾年啦，我都一樣借到Personal Loan黎裝修（笑），息口唔係特別高（因為我都有試過計錯數遲咗一兩日找卡數，見如何影響信貸評級）。今日計一蚊俾聽日嘅一蚊值錢，條數響自己銀行戶口先可以繼續賺活期息㗎嘛（見大新360出糧戶口玩法）！
「恒生信用卡」繳交其他銀行信用卡方法：親身去分行拎表格申請，提供其他銀行信用卡號碼，幾個工作天就可以喺網上銀行度用到。
（3）
然後就開返大新銀行戶口（主打存款戶口，見大新360出糧戶口玩法），去找「星展Black World」今個月嘅數（冇計啦，星展掛唔到落去恒生Enjoy卡度）、同埋恒生上個月嘅數、再找埋「大新Link」(用黎領展商場泊車使用)。
（4）
最後呢，就要去返罐仔度拎錢找數，最緊要係入返數。真，財散人安樂！
下一篇再詳盡地講每張信用卡嘅功能。
延伸閱讀：