上回提要，check in左優雅、私隱度高、藝術氣氛濃嘅K11 Artus，反轉咗成間房咁介紹。今回我哋睇睇嘢食質素如何。
Artus小短篇快捷鍵
房價包左$1000 Dinner Credit、雙人自助早餐、1小時Personal Training
[服務式住宅] K11 ARTUS 試住服務式住宅 – 房型篇
[服務式住宅] K11 ARTUS 試住服務式住宅 – 食物篇
由於有$1000 Dinner Credit，所以我哋諗住去餐廳fing晒佢XD。嚟到呢一個半空中嘅餐廳，望住維港景，睇日落。Artus旁邊就係Intercon，等我哋同夕陽下嘅Intercon打聲招呼。
餐廳裏邊每一張枱都係沿着窗邊嘅，現場環境好幽靜，我哋兩個都不敢造次。枱面有一本書嘅形狀嘅枱燈，燈光響每一頁書頁透出嚟，好溫柔。仍然都係果句，好有情調。然後望住全部都係英文嘅Menu，笑，真係好有去旅行嘅感覺。
由於我哋兩個都唔係鍾意飲酒，求其揀咗杯fruity嘅cocktail share 飲。好似小朋友咁。咦，衰鬼又幾好飲喎。用嚟呃like，都好靚。
估唔到姐姐仲送左套下酒小食，好得意好搞笑，我哋勁鍾意食其中一款脆脆，姐姐仲話食晒可以refill，那尼？！有甜甜的Cocktail、有維港海景、有免費嘅下酒菜（！），好幸福呀！
呢一個高度直情可以見到五光十色霓虹燈嘅倒影。望吓中西區、又望吓灣仔以東。望住大海，心情都真係平靜啲。夕陽西下、天色漸沉嘅感覺。我淨係記得背景音樂係subtle嘅聖誕歌，都幾洗腦嘅聖誕歌。
當有船經過嘅時候，夜色都阻止唔到維港泛起漣漪。
姐姐見我哋兩個塞豆窿（小家到叫一杯嘢飲），就快快上餐前麵包比我哋⋯⋯仲話都係可以免費refill嘅。係高級酒店咁用毛巾包住，仲係熱㗎！由於現場環境太過雅致，我哋唔敢將啲包碎跌落張枱度⋯⋯食得好elegant XD
我哋嗌左兩個主菜，一份係吞拿魚扒，一份係烤雞薯粒。唔，估到佢啦，高級餐廳呀嘛，得三塊手指頭咁大嘅吞拿魚扒（怪唔之得麵包可以refill）。我哋懷着感恩嘅心情，一啖一細味，希望記住佢嘅味道XD。值得一題係好似流咗成個盤都係嘅汁，如果唔係太尷尬，我會想用匙羹畢晒佢黎飲，個清湯反而係最甜嘅，所以我將每一舊魚肉響清湯上面翻滾，務求沾上最多清湯，甜到極致！
好彩，烤雞薯粒嚟得係時候，鍋底嘅薯粒應該夠我哋裹腹架啦。好彩唔使買杯麵，哈哈。
一路同碟上清湯搏鬥嘅時候，另一邊廂，維港開始fing啷啷，都係第一次睇。配合餐廳內嘅聖誕歌，睇住唔同大廈頭頂光柱fing黎fing去，又確係盞鬼。諗起小克漫畫入面嘅怡和、中銀、匯豐大廈嘅故事。
食飽就周圍行吓，由上而下影下Intercon嘅夜景。
所謂之半空嘅餐廳，入邊着燈嗰張枱就係我哋食飯嘅位置。俯瞰一下Intercon側邊嘅行人路，之前一直都唔知原來係響水面上嘅。
仲落咗去K11行夜街。差啲搵唔番門口上返房。呢間真係偷情專用⋯⋯
朝早起身出房門，有返日光之後，見到走廊盡頭好似有幅光畫咁。行過去一睇，係鐘樓啊。啲顏色好似Key落去咁。
又到食早餐嘅時間啦，我哋嚟睇吓日光底下嘅景色。晨早起床我哋睇吓比太陽曬到傻嘅Intercon。今日發現望對面嘅玻璃倒影仲好睇，響對面嘅玻璃折射過嚟波光粼粼，好似四方八面都比大海包圍着咁。
房價包埋嘅雙人自助早餐，只有中式同西式可以揀，所以唔使諗就一中一西。仍然都係聖誕歌做背景，望住海景，實係要嘆個咖啡，先開始繁忙嘅一天。
最主要原因係，book左一個鐘嘅Personal Training，哭。
冇帶電話去做gym，所以冇影相。由於我哋兩個都唔係為咗要操肌肉，唔需要玩太高強度嘅玩意。我好彩都有做開Pilates打底，條筋都夠鬆嘅，小寶慘啲，俾教練玩到就嚟往生。
我哋又企上部機度揸實扶手，部機靠電流就可以check到身體上脂肪肌肉嘅分佈！好神奇。教練又好好人咁俾我哋試，重訓運動員訓練後要來揼肌肉嗰部機，部機接觸到皮膚嘅時候，我覺得我好似比施加緊鬆肉粉嘅豬肉咁震騰騰，好特別嘅經驗。對住一整排落地玻璃，望住維港大海開行冷氣做plank，係幾爽皮嘅。
所以你話，努力搵錢係幾咁緊要。
***********************
Artus小短篇快捷鍵
房價包左$1000 Dinner Credit、雙人自助早餐、1小時Personal Training