用返上年12月嘅相，粗略寫一個尖沙咀K11 Artus嘅報告啦。當成係而家興嘅Staycation系列啦。
新開嘅K11 Artus？我第一個反應係，K11上蓋嘅住宅呀？唔係呀，響Rosewood隔離㗎呢。Rosewood個名聽落都好似樣啲喎⋯⋯但我唔要住咁貴㗎！然後佢呃我話Artus好平⋯⋯然後就去咗check in 啦。諗返轉頭，Artus嘅每一樣野都新奇有趣，簡直就係貧窮限制了我的想像⋯⋯當其時嘅我真係好似大鄉里出城⋯⋯真係好羞恥⋯⋯
Artus小短篇快捷鍵
房價HKD3927，包左$1000 Dinner Credit、雙人自助早餐、1小時Personal Training
[服務式住宅] K11 ARTUS 試住服務式住宅 – 房型篇
[服務式住宅] K11 ARTUS 試住服務式住宅 – 食物篇
我哋好笑到，連酒店大堂嘅門口都差啲搵唔到。第一個感覺就係，一係間酒店係比明星月租做住宅所以私隱度奇高，一係呢，呢間野根本就係偷情用⋯⋯入到地下大堂仲要轉lift先至上到房間樓層。現場環境有股幽幽嘅香氣，電梯口位燈光昏暗，隔離仲好似有個小竹林，非常有情調。迎面而來會遇到嘅人已經夠少，就算有人經過都絕對睇唔到佢個樣⋯⋯當我哋響度等緊lift嘅時候，其他人會寧願響竹後嘅空間，等我哋入咗lift之後，再搭下一部lift /O\我哋識乜啊，呢啲先至叫做尊重呀。
上圖喺房間門口，每間房門都係凹入去嘅（隱私權呀），所以如果偷情嘅話，入到lift，上到樓，快步走去門口，開門嘅時候就唔會有人見到。然後門口有個柱體，門鐘同房咭嘈都內置左響個柱體度。我仲用實際去考量，到時壞咗係咪成條柱換左佢⋯⋯上面舊石就真心係藝術裝飾（應該係）⋯⋯
入到房一轉左，就見到藝術感重嘅雕塑⋯⋯而家的小朋友詞彙真係好貧乏，咁我真係唔識藝術呀嘛⋯⋯唔通夾硬話，左邊嗰個人體雕塑嘅曲線弧度暗喻兩性關係係凌駕於書本知識嘅（或者係書中自有顏如玉嘅暗喻）、右邊嗰個正方體嘅擺位就反映到金錢響呢一個世界嘅重要性咩（唔係點解有人可以用月租價錢租住呢一間房呢）。嗱嗱嗱，藝術嘅嘢好主觀㗎。唔好鬧我。
門口正右方，有一個開放式廚房，應該係比月租嘅朋友使用，我哋淨係有玩到佢部咖啡機，Caramel coffee好味！甜甜地，我哋就係好朋友～開放式廚房前方，就有一張四人飯枱，月租客真係開party都夠位，酒店姐姐就係呢一張枱度同我哋check in。
仲話其實個package會送$1000 Dinner Credit、一小時嘅Personal Gym Training，全部可以通過in-app同assistant做booking。嗚哇，雖然技術含量應該唔高，但我有種原始人入咗科技大城市嘅感覺⋯⋯我哋後尾一直研究電話入邊嗰個人究竟係咪真人，定係其實我哋同緊Siri個friend傾偈咋。
餐枱前方就有一組L型嘅沙發同一高一低嘅茶几仔，可以坐響梳化度睇電視。應該係預家庭式入住，所以茶几上有一個繪畫版，仲有一盒全新嘅木顏色添⋯⋯我哋驚死到之後仲走咗落樓下reception問其實可唔可以攞走留念㗎？要錢就無謂啦。
茶几在前邊就係工作書枱，望城市境嘅躺躺椅。我哋仲走咗出去個露台度玩，露台唔算大只可以容納一個人行過，可以由書枱旁邊嘅露台一路行，行到去參觀睡房，係幾搞笑嘅。可能海景嗰邊就會好玩啲，露台亦都會大啲可以俾你放張躺椅出去。
可惜我哋得兩日一夜，實在用唔晒咁多空間，又要預時間去酒店唔同位置探索、又要諗今晚食乜、又要book personal training。真係好忙。
好似係著名設計師設計嘅空間分割，雖然唔同空間之間都冇門分隔，但係廚房飯廳、客廳、工作間、衣帽間、廁所、浴室，全部都井然有條。雖然我一入門口有個小小嘅吐槽位，就係點解啲空間全部都係三尖八角，好啦係我一初唔識欣賞，但係望耐左，又真係設計得幾搞笑嘅。實木式嘅顏色分隔出唔同空間，係幾溫暖嘅。
呀，差啲唔記得咗提，我個人習慣，入到酒店房第一件事就係清潔左遙控同埋風筒嘴，順便試吓個風筒work 唔work，因為旅行嘅話返酒店時間會比較夜，洗完頭先發現個風筒壞咗，有時住民宿呢，未必有前台可以幫到手。所以一入房就會四圍打開櫃桶搵風筒。
房間書枱上邊放咗部座枱式嘅Dyson！人生第一次使用得個圈嘅Dyson吹頭，係幾爽皮嘅。可能係因為各牌子嘅風筒對住我把雜草頭髮都係一個大挑戰，Dyson都要10分零鐘先吹得乾。如果要用幾千蚊去買呢一部嘢嚟吹頭，我一定唔捨得囉。印象中佢好似起碼有兩set風嘴，風咀係用磁石吸上機身。
小寶仲話，由熱風轉凍風，Dyson係即時生效嘅。唔似得一般品牌，因為發熱管仲有溫度，所以熱風轉凍風時要有個過渡期⋯⋯
轉過咗衣帽間，就入到去睡房嘅範圍。超級大！加上落地玻璃，採光良好，由上以下望返熟悉嘅尖沙咀街道，唔係旅行去外地，反而有一種熟悉感。輕紗窗簾由上而下咁放落嚟，冇咗一般酒店式嘅感覺，更有住宅feel。
又響衣帽間轉返個左彎，就見到梳洗間，有兩個洗面盤，就算朝頭早一齊起身梳洗，都唔使咁迫夾。果然要有錢、先可以買到階磚、先有空間裝兩個洗面盤⋯⋯浴缸同花灑位都放咗落玻璃浴屏入邊，乾濕分離，一句講晒，「空間夠大，點設計都得」。
要讚一讚，ARTUS個刷背球（絲瓜布面有拉手）好好用，雖然濕住但我都包咗返屋企用。全套梳洗用品都係用Aesop，正因為係咁，去到澳洲嘅時候，小寶先至話要買呢一個牌子嘅洗頭水。
「作為一個知慳識儉的小婦人，到旅館的第一件事當然要打包茶包咖啡用品、洗澡用品。儲起來的小瓶裝洗髮水沐浴乳也是可以倒進透明大瓶用很久呢。還未用到的洗手肥皂還可以放衣櫥充當衣物香芬劑。當時在ARTUS看到全套的Aesop套裝，眼睛都快跑出來了，給我通通包起來！除了它的售價偏貴外，它的原料味道是一等一的好捧捧喔。」
傳送門：【202002 澳洲樹熊之旅】Day 2 – 悉尼的Aesop有趣購物體驗
將衣帽間又轉返個彎（係呢真係好三尖八角），雖然冇門分隔，但係非常精致嘅廁所位（估唔到有一日我會用精致黎形容廁所）。佢嘅三尖八角設計，又真係可以令到你放鬆坐喺馬桶嘅時候，面前仍然係一埲牆，令你唔會覺得冇私隱而放鬆唔到嘅，真係寫個服字。係呀，佢又有一個獨立嘅洗手盆，究竟響呢間屋同一時間可以洗幾多對手呢？有空間（錢）就是任性。
***********************
Artus小短篇快捷鍵
房價包左$1000 Dinner Credit、雙人自助早餐、1小時Personal Training