人哋話九龍香格里拉(KSL) ([豪華團] 九龍香格里拉兩日一夜 Staycation Offer) 嘅服務好啲，港島香格里拉(ISL)嘅飲食好啲，今次就等我哋會一會港島香格里拉。一晚淨房價$1,000+10% ($1,100)，等慳家小能手配合Golden Circle Jade member使用，有免費早餐，再加上自費$350食埋Nadaman灘萬晚餐，就咁就可以食飽飽，仲有得帶手信走。
同以往一樣，我哋計到盡，用盡左一切辦法，用最低既價錢，將利潤最大化！內容大致會分為，(1)本身計劃可以享有嘅福利，(2)同埋Amex送既酒店翡翠會籍(Golden Circle Jade member @ Amex 細頭卡)可供疊加嘅着數。
訂房烏龍事件傳送門
酒店篇
1. Check-in
2. 房型共賞
3. 房內日景、夜景
4. 酒店內部亂逛，加映酒店餐廳
食物篇
5. Jade member Amenity
6. 灘萬晚餐（自費）送生日蛋糕
7. Petrus任食à la carte早餐
同場加映：Amex Platinum Card 美國運通白金卡(細頭) – 那些年我食盡的優惠
Golden Circle Jade member 優惠: 16:00 late check-out; Amenity x3; breakfast for two at lobster bar from 06:30 to 11:00 OR Cafe Too from 07:00 to 10:30 (stated in welcome email, subject to daily adjustment)
5. Jade member – Amenity
有西斜、有窗簾示意圖
同酒店姐姐傾完計，就坐低食Amenity。
生果盤比九香好（九香得兩粒青蘋果）有橙、蘋果、水晶梨、香梨。仲有一壺香片（餐牌入邊價值$75嘅香片！），安詳咁匿埋響個保溫野餐箱度⋯⋯我癈，拎出嚟嗰陣時差啲倒瀉。
Amenity嘅選項係會入咗落去金環會會員會籍個喜好(preference)入邊。上次KSL我哋揀咗啤酒、兩set曲奇牛奶，後尾發現都唔會點飲啤酒。今次照舊都係要兩set曲奇牛奶（曲奇真係好好味），最後一樣諗咗好耐，冇奶油要杯麵㗎，時令小吃居然係奇華合桃酥⋯⋯所以最後要咗睇落都覺得唔好食嘅朱古力⋯⋯
曲奇放咗響茶水間。
仲會驚你唔記得飲牛奶，有張曲奇形狀嘅溫馨提示卡。同九香嘅長方形盒裝牛奶唔同，港香送屋仔牛奶。
小寶問，可以食得朱古力未？我覺得要食就食咗「清朝帽」入邊嗰d朱古力先，紙盒裝「金環會」食唔晒仲可以成盒帶走做手信呀嘛。一打開「清朝帽」朱古力，呀，點解入邊朱古力得七粒？可能因為「七」係魔法嘅數字啦⋯⋯
6. 灘萬晚餐（自費）送生日蛋糕
本身諗住$1000淨房價，晚餐可以用GC Points食咗佢，當日就算食都有成千二蚊credit。因為Redeem分，係唔會儲到GC point。既然八月內餐飲都可以有Double GC point，咁啲分都係儲埋遲啲先用，嘻嘻。
本身諗住嗌嘅in-room dining
本身想朝聖灘萬，響酒店遊蕩嘅時候問咗灘萬，last order係19:30，仲天真到諗住可以上返房先打電話嗌，費事凍哂呀嘛。懶醒啊，點知原來「高級懷石料理便當」（$780）嘅last order係19:00⋯⋯所以無緣試到⋯⋯咁就食個慳家自選「190周年紀念外帶便當」（$350）算啦。唔夠半個鐘，就有人撳鐘送外賣袋上門。
開着日本台NHK world premium，食住日本便當，當正自己去咗日本咁。轉頭開個熱水風呂，浸下浴鹽，都幾開心。
右下
第一啖入口嘅紅蘿蔔同白蘿蔔嘅醬汁，完全係日本嘅味道！おいしい！
左下
一個平時唔食鰻魚嘅人覺得條鰻魚好肥美呀好甜，係無骨架！
飯上面嘅魚干仔就咸咗啲，但係飯上面嘅漬物浸泡左清酒！うまい！
左上
炸鱈蟹柳完全唔肥膩
炸年糕中間非常煙韌
好似浸左鰹魚汁嘅脆蝦
炸甜蝦球入邊好似有cream咁！
右上
有日本食嘅青椒濃味
照燒雞扒有炭燒味
豚角煮浸泡左酒味連埋日本味好重嘅醬汁，豚角脂肪入口即溶
西京燒偏甜，有一邊有骨有魚鱗，諗住中伏啦，點知另一邊係肥美油脂豐富！
厚切玉子好甜，有水蛋嘅感覺
生日蛋糕 Island Gourmet，一切開見到綠色嘅，shit，我超唔鍾意綠茶。食落酸酸甜甜嘅紅桑子令到綠茶嗰層唔係好綠茶，好彩姐。以為佢好膩，但係可能有比較多酸甜嘅水果果凍形成層次，一路食都唔覺得飽滯。餅底係脆皮榛子味，吉開佢會卡一聲，清脆好味。
仲要食淨一半，放返入紙盒，又啱啱好擺到入去小冰箱，當聽日下午茶先。
7. Jade member – Petrus任食à la carte早餐
晨早起床清新開朗，早起嘅鳥兒啊有蟲吃，再睇見星期日嘅地氈，幸福。
Jade member送既 Petrus 半自助早餐地點響56/F，另外可以選擇樓下lobster bar提供全自助餐。
等位嘅時候係朝頭早九點幾，日頭嘅太陽都幾曬下，但係我哋係冒着曬黑嘅危機，死都要揀窗口位坐。好彩我哋夠早起身，之後黎嘅人應該都幾羨慕窗口位，我諗。
Hayden話呢度petrus係半自助餐，主食任叫，如果想試多啲款，portion(份量)都可以斟酌控制。如果向第二度食開既野，但menu無，都可以試下睇下廚房幫唔幫到你（震驚寶寶了）。喪心病狂嘅小寶話想要鵝肝，打死佢。其實我都想食九香嘅西京燒⋯⋯無啦，我哋唔夠膽亂叫非餐牌上嘅嘢，驚比人打死（笑）。
要左杯Cappuccino (唔記得左flat white先係多奶d)、Mocha，Starter黎個自制火腿蜜瓜，仲自制左花之戀on melon。
Pam-seared beef medallion香煎牛柳配炒蛋及牛油果沙律
係呀你冇睇錯，早餐係有得嗌牛柳㗎！幾浮誇！
牛柳不槐係牛柳，外焦內嫩，無筋，無肥油，牛味重，絕對排向牛扒排行榜前幾名！
本身唔鍾意食sunny side, 叫左scrambled egg，仲係on toast咁上。
牛油果大大粒，但沙律菜苦澀，乜我地好熱氣咩。
Japanese breakfast日本式朝食少飯
三文魚扒（雖然成塊雞扒咁）嫩滑，魚油配珍珠米一流，三文魚扒上有清爽紅蔥，用嚟漱口refresh very 骨！伴菜有迷你菇連菜菜子（完全反映到日本人有幾咁唔鍾意食菜）、蔥豆腐（食落好似係香港蔥，兩者分別似港女同日本女，一隻辣啲）、漬物牛蒡（牛蒡唔算太酸，易入口唔使送飯）、麵豉湯（偏淡，怕咸嘅人就岩曬啦）。
Steamed Dover sole roll
蒸龍脷三文魚卷配蘆筍蘑菇及香草牛油汁。蘆筍有削過，細心。
車厘茄超甜，上碟前削咗10分1，令到上碟時唔會碌黎碌去，有驚喜。
Caramelised Pancakes
本身一份有三塊，我哋淨係要咗一塊試味，連楓糖、忌廉上。巨型士多啤梨，紅桑子，眾多藍莓伴碟。
諗住嚟多個淨牛柳收尾，點知佢話今朝九點幾牛柳已經賣晒，真誇張。又衰懶醒，總之一早就嗌兩份啦。估唔到Petrus嘅早餐（當brunch），真係可以咁好食。可惜食唔到第二份牛柳⋯⋯憑Petrus嘅早餐，直情令人想encore住ISL⋯⋯
比起九龍香格里拉，我哋兩個人響早午餐(brunch)嘅飯量又有顯著嘅進步。兩個人都係食咗四個餐(仲有叫到少份量呢)加自助小食，都唔算食得好多嘢姐下化XD
傳送門跳去：[豪華團] 九龍香格里拉兩日一夜 Staycation Offer – 配合Golden Circle 翡翠級會員Jade member
聽聞樓下lobster bar好似話因為疫情關係，自助餐少左款、精簡左，乾身d，無生滾粥，無咖喱⋯⋯淨係偷聽到呢方面嘅評價。
*****************************************