當初爬文，發現最抵玩嘅月供股票響中銀，每個月手續費都只不過係$50，食餐飯都冇咗，啱晒冇乜錢買唔起一手、又想儲股票嘅小資女孩，所以為咗月供股票而開咗個中銀戶口。
當時順便再開多張中銀信用卡(Good day)，實行用信用卡買月供股票，變相有差唔多一個月嘅免息還款期，同時月供股票又可以儲信用卡積分，一箭雙鵰。玩左幾年，因為月供金額太少，信用卡積分唔多，但都叫換過幾張超市現金券，回到本啦耶。
時代嘅變遷，月供計劃要拉倒，所以順手cut埋張中銀信用卡，費事浪着啲信貸額。
延伸閱讀：
[中銀] 中銀 Good Day 白金信用卡 – 開黎做月供股票、BoC pay、cut卡需知
[信用卡] 信貸評級篇 – 如何調整信用額（+/-）
至於中銀戶口究竟需唔需要cut埋佢呢？首先，就算cut咗佢、過冷河、開新戶口都唔覺有啲乜嘢吸引嘅迎新優惠，咁點解要浪費我哋嘅人力物力去做cut呢個戶口。其次，中銀戶口仍然有佢嘅價值⋯⋯
免費郵寄銀行月結單
要去各大本地銀行、海外銀行開戶，首先你需要一張住址證明。如果你唔係自己住，水電煤係自己個名，而我印象中本地銀行唔接受手提電話單，基本上你淨係可以倚賴銀行嘅月結單去作為你嘅住址證明。咁就變成有雞先定有蛋先嘅問題，你要去開戶，首先你要有一個戶口⋯⋯呢個係另一個吐槽點⋯⋯
當你已經有多過一個銀行戶口啦，香港地寸金尺土，為環保又好為慳位都好，相信都已經將大部份銀行月結單轉為電子化。香港表面上係一個發達嘅城市，但實際上會接受電子化產物嘅機會少之又少，除非你有申請乜鬼電子證書（我到而家仲係未明佢做乜鬼嘢），各大銀行大趨勢仍然係唔接受電子月結單。當早幾年有電子月結單嘅時候，大家都蜂擁而至一次過又紙張轉晒做電子月結單。
突然有一日，你需要一張三個月內或六個月內嘅正本銀行月結單嘅時候，就捉蟲啦。好在，我刻意保留左中銀戶口⋯⋯
延伸閱讀：
[離岸戶口] Barclays – 起手篇
您可於每年1月1日至12月31日期間免費申請重發6份郵寄綜合月結單及6份信用卡月結單(中銀「易達錢」卡不受此限制)。
如您申請重發的郵寄結單數量超出上述優惠，將按每份額外郵寄結單收取手續費。
好處，唔使去銀行申請，響中銀網上銀行撳個掣就等佢寄黎。
壞處，成鬼日都等成大半個月先收到⋯⋯每次要用嘅時候，都要預留時間俾佢環繞個地球再寄返嚟你個居住地址⋯⋯
點都好，Keep住呢個戶口淨係得返呢一個功用。好心佢生性啲，唔係就cut鬼埋佢。