忙左一排，依家先開始研究。要點樣諗辦法賺盡一萬蚊嘅附加價值，首先要問自己總共有邊幾間銀行嘅銀行戶口，再去研究嗰間銀行戶口有啲乜嘢附加價值。而我啱啱用咗星展係登記攞政府一萬蚊。原因放咗喺最底。
如果係上年或以前申請星展戶口嘅，就需要先登記咗個星展電子印花計劃，先繼續做任務換印花。星展電子印花計劃推廣(獎賞階段II)網上登記 推廣期: 2020年1月1日起至2020年9月30日
-
獎賞階段I. 2020年1月1日至2020年3月31日 -
獎賞階段II. 2020年4月1日至2020年6月30日 (最高九個印花，可換港幣$150) -
獎賞階段III : 2020 年7月1日至2020年9月30日 (最高九個印花，可換港幣$150)
如果係今年申請星展戶口嘅，就自動申請咗以上嘅電子印花計劃㗎啦。首先可以去返短訊，搜尋「印花」去搵返你嘅印花參考編號。再去電子印花齊齊享，一開呢個網頁嘅頭頂就可以輸入你嘅印花參考編號，不過呢，佢嘅紀錄只不過係記錄你兩個星期前嘅印花記錄，所以用你嘅記性，響6月30號之前（獎賞階段II），一日做晒最多九個任務。所以，只要chok到九個印花出嚟就已經可以換港幣$150。
咁我跟住就介紹吓我哋點做。
第一個印花如何入手？根據以上輸入左你嘅印花參考編號後，錄到落最低，你會見到下圖。咪埋隻眼就㩒啦，每個階段淨係可以免費㩒一次，反正都就到6月30。因為我試過撳完之後refresh好多次，都唔肯遞交結果，但係命運係得一個印花，就只係得一個印花。當幫第二個㩒嘅時候，就發現原來有機會係可以送兩個印花嘅⋯⋯⋯⋯機率為四個人裏面，只得一個人中咗兩個印花。
好啦當你好好彩中咗一個印花（留意番，佢冇咁快可以refresh到，起碼要等兩個星期），你距離九個印花仲好遙遠。但係！人生最重要呢個但係！先用你手頭上其他銀行轉數快嘅服務，轉$50去星展。只要星展戶口入面有$50，九個印花就等緊你。
方法一：我本身有張DBS 黑Card，咁今個月都夠鐘要找卡數，所以我就響星展儲蓄戶口拎錢找卡數。我用嘅找數方法，係分咗8次，每次港幣$100，找左$800卡數。剩低餘額用返以往方法繼續找。：D 九個印花($150)袋袋平安。
方法二：只要你戶口入邊有$50，請善用銀行轉賬服務，將$50由儲蓄戶口，轉賬去支票戶口（咁樣為之一次）。然後，將支票戶口嘅$50，轉賬去儲蓄戶口（咁樣為之另一次）。聰明嘅小朋友只要玩8次（計埋上面抽獎送嘅印花）：D 九個印花($150)袋袋平安。（問咗Hotline，Save and Cheque account轉Multi-currency saving account都計架）
嘻嘻，除咗迎新優惠個$5800，留意番，7月1號之後就係獎賞階段III，等我到時又拎$50來玩九次任務先，咁樣又賺多$150。
相關閱讀推薦：老生常談之節流篇
其實你可能會問，點解唔用第二間銀行攞政府嘅一萬蚊，人哋啲銀行有送100,000、又可能送30,000、又可能送10,000喎？但要留意番佢個條款，如果第一環節10萬蚊抽唔中嘅話，所有參賽者係會自動滾落去第二階段繼續抽，所以有幾多個人響佢間銀行申請，呢一班人係會一路跑到完場為止。
我自己就自認冇乜抽獎運氣嘅，同埋越多人揀嘅銀行亦即係抽獎人數個分母會特別大。除咗恒生有9000位幸運兒可以抽倒$50，我印象中其他銀行中獎者都只不過係50名以內。我就自認冇咁嘅本事，所以我選擇咗星展，起碼我淨係用手指禁左幾分鐘，我就有$150，靠努力換取嘅金錢係特別美味嘅，笑。