港幣$1,000 Hotel Credit
繼續秉承我哋一向以來嘅慣例，晚餐內容當然要望住Hotel Credit $1000黎嗌。首先睇Menu有冇額外附加費，然後將港幣$1000除1.1（＝$909），再逐道餸既價錢減到零。點知，望住個餐牌叫黎叫去既野，都係同澳洲Shangri-La嘅內容一樣。
唯有欺騙自己話香港份量一定比澳洲少，同時又可以試吓香港同澳洲嘅同款美食質素有幾唔同⋯⋯
請見菜單：
好似加個餐具響側邊有情調啲
咩都唔使講，首先黎個澳洲肉眼扒。我有認真選擇過㗎，美國肉眼扒300克$458，澳洲牛柳180克又係$468，所以我有理由相信澳洲牛柳per克嘅價值比較高。Meatlover嘅經驗，感覺上美國牛係爭緊啲嘢；喺澳洲食嘅澳洲牛（正宗啲嘅應該）肉味濃、肉質無咁肥；和牛就不嬲都唔係太鍾意㗎啦，我個人覺得佢油味太重。揀個紅酒汁，side dishes要蘆筍同薯蓉。
相關閱讀推薦：大新360出糧戶口 – 每月派最多$2,000活期利息
咁冇理由兩個人食一塊肉就算嫁，咁不如嗌件三文魚扒啦，感覺上好似唔係好多肉，都係180克姐。要個香草牛油汁，side dishes要蘑菇同薯條，心諗應該好飽啦。然後，我哋就咁又燒焦啦。
甜品本身就叫咗，朱古力曲奇紐約芝士餅配芒果及士多啤梨。然後我話我唔想要芒果得唔得呀，哥哥仔話：隨便啦你想要咩生果。呃，你有咩生果⋯⋯（我成個腦好似Fruit Ninja咁，有好多火龍果啊、榴槤啊飛來飛去）最後揀咗藍莓同士多啤梨。
啱啱送餐嚟嘅時候適逢橫風橫雨（定係好大霧呢）；咦，枱面係咩嚟㗎？有個朱古力蛋糕、薄脆同朱古力馬卡龍，勁搞笑上面仲有個朱古力牌有QR code，仲有埋QR code俾你去Trip Advisor到評分， 真係生意難做。仲有嘅就係有愛嘅心意卡，潛台詞係，咁你識做啦。早知唔使額外嗌甜品啦。
有得Eat啦！餐枱下面個櫃係鏡面板，空間感睇落幾大，可惜空間感唔食得。點會估到，Room Service晚餐前菜會送一籃麵包，一打開餐車嘅時候就嘩咗出嚟，我果斷將佢留到最後先食。
首先，要試食牛扒餐，嘩，個薯蓉呢Creamy到一個點。我懷疑蘆筍當做，幾個餐上面都有小蘆筍。到主角牛扒啦，不愧為五星級廚房出產嘅牛扒，牛扒啲筋係近幾年食過最香唔肥膩，連小寶都話未試過牛扒嘅牛筋係有牛香味。紅酒汁就不過不失啦，可能我哋唔識食，但反正牛扒如果好味，基本上都唔需要點汁。
澳洲牛柳180克$468 （$909-$468=$441）
好可惜，食完牛扒之後好後悔，飽到上心口。又要講返後悔嘅猶大。三文魚扒由於真係太飽，油花味有嘅，唔係太品嚐到佢嘅美味。但係嗰個香草牛油汁香滑又容易入口，真係值得一讚。蘑菇就略嫌鹹咗啲。
三文魚扒180克$310（$441-$310=$131）
朱古力曲奇紐約芝士餅配藍莓及士多啤梨$150（$131-$150=-$18.9）
由於已經out of budget補咗$20，飲品就飲番Amenity送嘅啤酒（需要配合翡翠會籍疊加使用），仲有加送Nuts添（笑）。所以根本就唔需要嗌甜品，早知留返百幾蚊quota第二日食個light d 既Room Service午餐啦。又咁講，其實第二日食完個翡翠會籍送嘅早餐，跟住就已經食唔落午餐⋯⋯
同場加映食海景