搞掂晒以上嘅嘢會收到一個電郵，電郵入邊會有你需要寄嘅英國地址，記得記得要寫返自己嘅參考編號（PEX行頭）響個地址度，方便處理嗰個人員同埋方便自己嘅申請。在情在理，你對人好，佢處理你嘅case都會快啲。如果好似我咁同時遞交兩個申請，就需要將兩個參考編號放埋響信封面嘅地址度。
其實寄件可以選擇郵政局或者DHL（其實DHL都幾貴），但嗰時我兩份文件一齊申請所以就用DHL硬紙皮厚厚地包住佢。中環排隊嘅時候身邊個個都係寄緊BNO嘅申請（29 May 2020排隊實況）。DHL Counter仲會問你如果入邊有舊嘅Passport，需唔需要加多$6x-8x買保險。要！點都要買㗎啦。嗚。兩份申請文件嘅DHL運費連保險承惠HKD508。
30 May 2020 即時更新：FedEx好似平好多。去到現場FedEx同事會問你有冇account，如果新登記一個acccount嘅話就會平啲，建議可以事先申請左個account先，唔需要去到現場先至影QR code再登記，慳返啲時間。寄一份申請如果用泡泡膠袋裝住承惠HK$3xx。如果就咁用普通紙信封裝住就HK$270。
咁當然喇，如果你要寄好多份申請嘅，運費會相對貴咗，特別係每個人嗰本彩色逐頁影印嘅特衰護照， 真係好重。
跟住我就會定期屎忽痕上佢個網，打返PEX行頭嘅參考編號，得閒就睇吓自己個status。之前睇到啦，我個申請係批得早過小寶嘅，因為佢嘅髮型問題所以佢張相係俾人彈過一次，我幫佢解釋完左之後（其實我都覺得我覆得太串）好快脆都批埋。
2019年嘅schedule：
2019年6月17日：申請日
2019年6月30日：由於冇朋友嘅關係，咁耐先搵到人加簽好
2019年7月19日：英國收到文件
2019年7月22日：申請已被通過
2019年7月23日：你的新護照已經在途中
唔需要緊張，通過咗，佢會分兩份郵件寄返啲嘢返嚟，一份係你嘅新護照，另一份係你之前寄過去嘅文件。佢亦會send個電郵嚟，提醒你新護照送到嘅時候，請你要簽上你的大名。收到之後簽上你的大名，咁就大功告成啦！
你的新BNO已經上線！