由於我本舊護照係腦囟都未生埋嗰陣時攞嘅，要更新小朋友舊護照就要經歷加簽嘅過程。有大約三版紙表格俾你列印出嚟，由於啱先已經上載左你嘅照片，張表格已經包含埋呢張相，所以已經唔需要叫加簽人士響張相片後邊簽啲乜嘢句子啦（早幾年舊制要㗎）。加簽嘅官方要求
然後就按照另一版對加簽人士嘅要求，搵你需要嘅朋友，然後捉佢幫你簽。你要有嘅朋友類型。加簽人士唔可以同你係親屬或者婚姻嘅關係。佢本人都需要現在持有英國或者其他歐盟區嘅護照，非英國護照需要提交埋彩色封面副本。最簡單既就搵一個已經申請左新BNO嘅朋友，填埋佢嘅BNO Number落去咁就搞掂啦。So far幫我加簽嗰個人冇收過任何電話去核實我既身份。
加簽朋友嘅範圍好闊，上至律師下至教師都可以，我嗰陣時搵咗個社工。但小道消息有指，有朋友叫香港註冊教師幫佢加簽，之後被彈左申請。可能搵返國際認可嘅職業會比較好，但其實我都唔知社工個牌咁國際化⋯⋯哈哈哈哈。個位朋友需要認識咗你兩年以上，但實際上你要填幾多年呢，呢個就係考驗友誼考驗記性嘅時候。
留意番加簽嘅人士唔可以係醫生，除非你嘅家庭醫生已經識咗你好多年，已經變成朋友，或者響英國HM Office度工作。搵醫生幫你加簽其實都可能會中伏，因為短時間內證明唔到佢係你嘅家庭醫生。簡單啲張名單咁長，搵個第二個啦。